2 Pita 1

1Nde, Saimon Pita ye kɛdi kɛ sɛbɛla, nde min bi Yisa Kirasitila wɔli kɛlɛ anubɛ kilayɛ la kɔni. Minnu bara dɛnkɛninya-bɛrɛbɛrɛ-wɛ sɔrɔn iko male, n bi kɛ sɛbɛla wonu denu ma. Anu ya wo sɔrɔn ma kisilɛ Yisa Kirasitila telenbagayɛ baraka le tɔ, mata Alla kɔni. 2Alamɛ Alla hinara wo la ka yisi-kimɛ di wo ma duk! Alamɛ wola lɔnnɛ kuma-sara Alla anubɛ ma Mari Yisa wara-koe rɔ. 3Alla ye a fɛ, ma ni ata gbiliyɛ anubɛ ata nyimayɛ sɔrɔn a fɛ bawo ma ya a lɔn min ya ma kele. Lɔnnɛ wo baraka rɔ, ma makoe ye fan min bɛɛ la ka Alla diyana koe kɛ, wo bɛɛ dinɛ ma ma. 4Woletɔ a ya lanyiri-kinama-wɛ anubɛ lanyiri-kɛndɛ-kɛndɛnu kiri ma ye. Ka a tɛgɛ kɔ-fan kɛnu ma, ma ni ata kɛ-nya fanan sɔrɔn. Wo kɔma, ma si na kisi duninya-natanu ma minnu bi mɔgɛnu tinyana. 5Wola ko la, wo ni wo se-koe-bɛɛ kɛ ka nyimayɛ sa wola dɛnkɛninyɛ kuma. Wo ni lɔnnɛ fanan sa wola nyimayɛ kuma. 6Wo ni nyɛrɛ-marɛ fanan sa wola lɔnnɛ kuma. Wo ni munyɛ fanan sa wola nyɛrɛ-marɛ kuma. Wo ni Allala-kilan fanan sa wola munyɛ kuma. 7Wo ni diyanayɛ sa wota Allala-kilan kuma. Wo ni keninteyɛ sa wola diyanayɛ kuma. 8Wo makoe ye kɛ-nya-sifa kɛnu denu na. Ni wonu bi wo bolo ka wara, wo ara min lɔn ma Mari Yisa, Allata-Mɔgɔ-Yabɔnɛ wara-koe rɔ, wo si a ma, wo ni wola wɔlɛ kɛ a kin na ka ko-nyinya Allata mɔgɛnu ma. 9Kɔnɔ kɛ-nya wonu sa min bolo, fiyɔn le wo tigi la. A ti ke fen yenna wula-yan la. Ado a ara nyina ko a hakɛ-kɔrɛnu bara yesi a ma ka ban feu! 10Woletɔ n na kelen nyɔgɛnu, koe kɛ minnu si yili-latɛgɛ di wo ma ko Alla ara wo kele ka wo yabɔ, wo ni wo raya wonu ma. Ado ni wo ya wo ma, wo ti bui ka wola dɛnkɛninyɛ boloka mumɛ! 11Ni wo ya wo ma, wo wa don habadan-mansayɛ rɔ, ma Mari anubɛ ma kisilɛ Yisa Kirasiti ye kan min, anu si wo labɛn sewɛ la. 12Hali wo ya koe wonu lɔn kɔrɔma la, n si to wo hɛnkili labilala wonu ma tuma-wo-tuma. Wo ara tonyɛ minnu sɔrɔn, hali wo sabatinɛ wonu tɔ, n ti bandan wo lalɔnna tonyɛ wonu ma. 13Fananta n kɛndɛ, n ni to wo makawandila ka wo hɛnkili bila koe wonu na. N bara n miri ko wɔlɛ wo bɛnnɛ nde ma. 14N ya a lɔn ko a ti mɛ tun n si bɔ n fɛrɛ-bɔnku-tulitɛ kɛ rɔ iko ma Mari Yisa, Allata-Mɔgɔ-Yabɔnɛ ara a fɔ n ye nya min ka a gbɛ. 15N si n se-koe-bɛɛ kɛ ka kilɛ rabɛn wo ye alako n ba faga tumɛ min, wo si to wo mirila koe kɛnu ma nya min. 16Ado ma ya wo lalɔn ma Mari Yisa, Allata-Mɔgɔ-Yabɔnɛta sɛnbɛ anubɛ ala nɛ la tumɛ min, ma ma bila mɔgɛnuna halliya-kumɛ fɛ. Ma ya ala gbiliya-wɛ yen ma nyɛrɛ yɛ la! 17Ma Fa Alla ya bonyɛ anubɛ gbiliyɛ di a ma kɔnkɛ kuma tumɛ min, ma ye nyɔ nun. Ma ya kan-belebele-wɛ lamɔɛn ka bɔ Allata gbiliya-makawanɛ rɔ. A ko, “N diyana-dan le kɛ la, min bara n hɛnɛ feu!” 18Ma sɔnɛ a dafɛ kɔnkɔ-sɛnimɛ wo kuma tumɛ min, male nyɛrɛ ya kuman kan kɛ lamɔɛn ka bɔ Arinyɛni tɔ. 19Woletɔ nɛbinu ya kumɛ min fɔ, ma lanɛ wo la bɛrɛkɛ! Ni wo si wo tole masɔ wo la, wo si bɛn bawo a mani de iko lɛnpu min malannɛ pinpi rɔ ha Kirasiti wa na wati min ata wan-takani-wɛ la ka to malanna wo yisi rɔ. 20Kɔnɔ wo ni wo hɛnkili to kɛ ko fɔlɔn. Wɔlɔyiya-kumɛ minnu sɛbɛnɛ Allala kitabu rɔ, mɔgɔ wo mɔgɔ ti ke wo nya-yenna ka wo faranfasi a nyɛrɛ ma. 21Kɛnu ma bɔ anu nyɛrɛta hɛnkili rɔ! Alla ya kumɛ min don nɛbinu da rɔ, anu ya wonu denu fɔ Allala Ni Sɛnimɛ baraka rɔ.

will be added

X\