2 Kɔrɛnti 9

1Nba, hali n ma kɛdi sɛbɛ wo ma ka a tɛgɛ Allala mɔgɛnu dɛnbɛn koe ma Yudiya nyamanɛ rɔ. 2N ya a lɔn ko wo fanan si sɔn dɛnbɛni koe wo ma. N bara n kɔgɔ raka wola ko la Masidoniya kɛnu ye. N ya a fɔ anu ye ko kebi serun, wole, ma na kelen nyɔgɛ minnu bi Akeya sigisɔn rɔ, wo ya wo rabɛn dɛnbɛni-koe wo rɔ. Ka a tɛgɛ wola dɛnbɛnɛ wo ma, wo ara mɔgɛ donu yisi lawuli dɛnbɛni kɛ tinɛ. 3N bi n na kelen nyɔgɛ kɛnu natala, wo le ya a to, mala kɔgɔ-rakɛ kana ma fuyi la. Wo ni wo rabɛn wota dɛnbɛnɛ wo la wo bolo iko n ya a fɔ nya min. 4Ni Masidoniya kɛnu nara n fɛ, anu ni a taran ko wo rabɛnni ma, ma dama si miliya worɔ bawo ma lara wo damasi la. Wole bɛrɛn si miliya fanan! 5Woletɔ n ya n miri ko a bɛnnɛ n na kelen nyɔgɛ kɛnu ni sɔ ma yarɔ. Wo ya lanyiri kiri kɔ-fan minna ko la, yanni n ni ke nyɔ, wo ni wonu nadɛn. Woletɔ, n ba ke tumɛ min, n si koe bɛɛ rabɛnnɛ taran. Wo si a yira ko wo bolenu fulenta bawo a di wo ye. Wo ye a bɔla wo yisi bɛɛ la. Mɔgɔ ma wo fɔrɔsɛ. 6Wa wo hɛnkili to kɛ ko. Mɔgɛ min si sugi doni fui, wo si doni de tɛgɛ. Min si sugi siyaman fui, wo si a siyaman tɛgɛ. 7Bɛɛ ni kɔlɛ kɛ worɔ iko a ara a miri a burɔ nya min. A kana kɔli kɛ yisi-magboyɛ la. A kana kɔli kɛ bawo anu bi i lagbengbenna. Mɔgɛ min bi fan dila a sewanɛ, wo le di Alla ye. 8Nba, Alla si ke hɛrɛ dila wo ma ka tenbi wo makoe dan la. Woletɔ wo makoe-nyinya-fannu si taran wo bolo ka mɔgɔ donu fanan kɔ sewɛ la. 9Iko a sɛbɛnɛ Allala kitabu rɔ nya min ko, “Min si fan di bolo-kolɔnnu ma foninsereyɛ la, ala nyimayɛ si to tolon!” 10Alla le ye sugi dila sɛni-salɛ ma anubɛ a si min dɔn. A si sugi bɛɛ di wole fanan ma ka wola sɛnɛnu nasabati alako wo ni fan ni bolo-kolɔnnu ma duk! 11A si wo ma fen-tiginu na alako wo ni to mɔgɛnu kɔla wati bɛɛ. Ma wa wola kɔ-fannu natenbi anu ma, wo si a ma, mɔgɔ siyaman ni baraka bira Alla ye wola kɔ-fan wonuna ko la. 12Wola dɛnbɛnɛ ma Allala mɔgɛnu makoe dɔrɔn nyinya. Wo si a ma, mɔgɛnu ni baraka bira Alla ye fanan. 13Wola ko-nyima-kɛ si wola dɛnkɛninyɛ yira Kirasitita kibara-nyimɛ rɔ, wo lanɛ min na kɔni. Wo ye Kirasitila kumɛ birala min kɛ, mɔgɔ siyaman bi Alla tantola wola ko la. Wo ye anu dɛnbɛna foninsereyɛ la anubɛ mɔgɔ gbɛrɛnu fanan. 14Woletɔ ka a tɛgɛ Allata hinɛ ma wole wara la, anu bi Alla matarala wo ye anu yisi-lakanɛ la. 15Ma ni baraka bira Alla ye ala kɔ-fanla ko la, mɔgɛ ti ke min sanna.

will be added

X\