2 Kɔrɛnti 8

1N na kelen nyɔgɛnu, ma ye a fɛ, wo ni a lɔn Alla ara min kɛ Masidoniya chɔchinu ye ata hinɛ fɛ. 2Hali anu bi tɔrɔyɛ anubɛ bolo-kolonyɛ rɔ, anu sewanɛ ka nilɛ kɛ foninsereyɛ la. 3Tonyɛ le. Anu ya nilɛ kɛ iko anu sɛnbɛ ye nya min, hali min tenbira wo la. Mɔgɔ ma anu fɔrɔsɛ. Anu ya wo kɛ anu nyɛrɛ ma le. 4Anu ya ma madiya bɛrɛkɛ ko anu bole ni taran Allala mɔgɛnu dɛnbɛn koe rɔ Yudiya nyamanɛ rɔ. 5Ado anu ya nilɛ kɛ ka tenbi ma miriya la pon! Kɔnɔ min tenbira wo bɛɛ la, anu ya anu nyɛrɛ di Mari ma. Wo kɔma, anu ya anu nyɛrɛ di male fanan ma iko a di Alla ye nya min. 6Woletɔ Taita min ya wɔlɛ kɛ dabira, ma ya a madiya ko a ni to a kɛla. A ni to wo dɛnbɛna ka keninteya-wɔlɛ wo dafa. 7Dɛnkɛninyɛ ye wo bolo, wo kusan kumala, ado lɔnnɛ ye wo bolo fanan. Wo ara wo raya ka dɛnbɛnɛ kɛ anubɛ ka wola keninteyɛ yira ma la. Wo ara ma-a-la koe wo bɛɛ rɔ. Woletɔ ma ye a fɛ, wo ni keninteya-wɔlɛ kɛ fanan kɛ foninsereyɛ la. 8N sa tɔn sigila wo kuma. Donu bara anu taya dɛnbɛni koe rɔ, woletɔ n ba wo sanka anu ma, n bi a fɛ ka a lɔn ni keninteya-bɛrɛ ye wo bolo wo nya. 9Ado wo ya ma Mari Yisa, Allata-Mɔgɔ-Yabɔnɛta hinɛ lɔn. Nɔnfulu-tigi-ba le ale la nun kɔnɔ a ya a nyɛrɛ ma bolo-kolɔn la wolela ko la. A ya wo ma alako ala bolo-kolonyɛ ni wo ma nɔnfulu-tigi la. 10Serun, wole fɔlɔn ya miriya wo sɔrɔn ka Allata mɔgɛnu kɔ. Ado wole fɔlɔn wulita fen dila anu ma nun. Nta miriya rɔ, wo ya min dabira, wo ni a dafa kelenna! 11Nba, wa wo raya ka wɔlɔ-nyimɛ wo laban feu! Iko wo miriya ye wɔlɛ wo ma nya min nun, wo ni wo raya a laban koe ma gbɛ! Wo ni a kɛ iko wo sɛnbɛ danta kan min. 12Ni fen bi wo bolo min ni-sɔgɛ ye wo la, Alla si sɔn wola kɔ-fan wo la iko wo bole danta kan min. Fan min sa wo bolo, wo sɛ sa wo ye. 13N sa n tayala ka dunɛ bɔ doinu kuma ka a sa wole kuma. Fen siyaman bi wo bolo wati-kundunɛ kɛ kɔrɔ min kɛ, a bɛnnɛ, minnu makoe ye fen na, wo ni wonu dɛnbɛ. Ado wole makoe wa bila fen na tumɛ min, fen siyaman ba taran anu denu fanan bolo tumɛ min, anu si wo fanan dɛnbɛ. Wo le ya a to, wo dama ra si kɛnya worɔ. 15Iko a sɛbɛnɛ Allala kitabu rɔ nya min ko, “Minnu ya a siyaman bi, wonutɛ to ma to. Minnu ma a siyaman bi, fen ma dasa wonu bolo.” 16Ma si baraka bira Alla ye bawo keninteyɛ min nyɔgɔn ye male bolo, a ya wo nyɔgɔn di Taita ma wo dɛnbɛn koe la! 17Ka a fɔ ko Taita sɔnta mala madiyalɛ ma dɔrɔn, wo ma. Wo dɛnbɛn-sɔgɛ ye ale nyɛrɛ la kati! Ale le ya a latɛgɛ a nyɛrɛ ma ko a ni ta wo wara. 18Ma ye ma na kelen nyɔgɛ do latala a fɛ, min gbiliyanɛ chɔchi bɛɛ bolo bɛrɛkɛ! A ara gbiliyɛ wo sɔrɔn ala wɔlɛla ko la kibara-nyimɛla kawandili-bɔɛ rɔ. 19Min tenbira wo la, chɔchinu bara a yabɔ ko a ni tagama ma fɛ. A si keninteya-wɔlɛ kɛ kɛ Marita gbiliyɛla ko la. Ma ye a fɛ ka a yira wo la ko wo dɛnbɛn-sɔgɛ ye ma la. 20Ma ye a mala ma fɛrɛma alako mɔgɛ kana fɛɛ woo yen ma la kɔ-fen-belebele kɛla ko la. 21Ma sako le ka ko-latelennɛ kɛ. Ka a kɛ Mari yala dɔrɔn, wo ma, fɔ mɔgɛnu yala fanan. 22Woletɔ ma ye ma na kelen nyɔgɛ latala anu fɛ. Ma ara a lakɔrɔsi wati siyaman. Ado ma ara a yen ko dɛnbɛni-sɔgɛ ye a la tuma-wo-tuma. Nba, a rayanɛ gbɛ ka wo dɛnbɛ nya bɛɛ ma bawo a yigi sanɛ wo kuma bɛrɛkɛ! 23Nba, Taita kɛ, n ta-nyɔgɛ le. A ye wɔlila n fɛ wo dɛnbɛn tinɛ. Nba, n na kelen nyɔgɛ minnu bi tala a fɛ, chɔchinu denu ya wonu sɔ. Anu si gbiliyɛ di Kirasiti ma. 24Wo ni wola keninteya-gbɛnɛ yira anu na. Wo ni wo ma alako chɔchi-mɔgɛnu ni a lɔn ma wasinɛ wo la min na.

will be added

X\