2 Kɔrɛnti 7

1N diyana-mɔgɛnu, lanyiri kɛ bɛɛ kirinɛ male le ye! Woletɔ koe min bɛɛ si fɛrɛ-bɔnkɛ anubɛ niyi latinya, ma ni ma nyɛrɛ sɛninya wonu ma. Ma ni ko-sɛnimɛ nyini ka to kilanna Alla la. 2Wo ni wo yisi laka male ye. Ma ma ko-yogoma kɛ mɔgɔ wo mɔgɔ la. Ma ma mɔgɛ karan ko-yogoma ma hali ka mɔgɔ kensunya. 3N ma kɛ fɔ alako ka wo rasɛ. Iko n ya a fɔ nya min nun, ma belinɛ wo, ma faganɛ wo, wola ko ye ma yisi rɔ tolon! Wola ko di ma ye kati! 4N lanɛ wole la kosɛbɛ! Ado n wasinɛ wo la kati! Hali ma tɔrɔyanɛ, wo ye a mala, n fanɛ sewɛ la tolon! 5Hali ma kera Masidoniya nyamanɛ rɔ tumɛ min, ma ma ma sulen mumɛ! Tɔrɔyɛ bilanɛ ma fɛ kan tinɛ bɛɛ rɔ. Sɔsɔlɛ le gbansan ye mala foolɛ rɔ. Kilan fanan bi ma yisi rɔ. 6Alla min si mɔgɔ-kɔndɔfilinɛ yisi-kimɛ, wo ya ma yisi-kimɛ Taitala nɛ fɛ. 7Ala nɛ dɔrɔn fɛ, wo ma. A ya dantɛgɛlɛ sa ka a bɛn wo ya a yisi-kimɛ nya min. Wo ya a ma, ma yisi kimara. N yen-sɔgɛ ya wo bira nya min, a ya wo rakaran ma ye anubɛ wo nimisara nya min. Wo rabɛnnɛ nya min ka n fɛka fanan, n ya wo bɛɛ lamɔɛn tumɛ min, n sewara kati! 8Hali nna kɛdi wo ya wo yisi lafin, n ya a sɛbɛ wo ma min kɛ, n nimisani ma wola ko la. N nimisara fɔlɔ nun ala ko la bawo n ya a lɔn ko kɛdi wo ara wo yisi lafin wati-kunduni kɔrɔ. 9Kɔnɔ tɔ-a-la, n sewani ma ko n bara a ma, wo yisi la ara fin kɔnɔ wola yisi-lafinyɛ ya a ma, wo ya wo kɛ-nyanu yɛlɛma. Yisi-lafinyɛ wo, Alla gbɛ le wo la. Woletɔ ma ma wo madumɛ hali! 10Yisi-lafinyɛ min bɔnɛ Alla bolo, wo si na yisi-yɛlɛma la, ado wo si a laban kisi-koe ma wo bolo. Wo ti mɔni wo rɔ mumɛ! Kɔnɔ hadama danta yisi-lafinyɛ si a laban sayɛ ma. 11Alla ya a ma, wo yisi lafinta min kɛ, wa a mafɛlɛn a ya wo dɛnbɛ nya min. Wo ara wo ma sɛbɛna-mɔgɛnu na gbɛ! A sɔgɛ ya wo bira ka a yira ko sɔn sa wo la! Wo diminyara kati! Ado wo kilanta bawo wo ya ko-yogomɛ le ma. N yen-sɔgɛ ya wo bira. Nta hɔnyɛ ya wo bira fanan. A di wo ye ka ko-yogoma-kɛlɛ wo tɔrɔ! Wo ya a lagbɛ ko fɛɛ sa wo la kɛ fenfen tɔ. 12N ma kɛdi wo sɛbɛ wo ma ka a tɛgɛ min bara ko-yogomɛ kɛ anubɛ ko-yogomɛ kɛra min na. N ya a sɛbɛ le alako Alla ni a gbɛ wo ye, ma di wo ye nya min. 13Wo le ya a to, ma yisi kimara. Min sanɛ mala yisi-kimɛ kuma, wo ya Taita lasewa nya min, wo ara male fanan nasewa wo nya na le. Wo damasi ara a dɛnbɛ ka a yisi sa lɛp! 14N ya n nyɛrɛ kɔgɔ raka wola ko la a ye. Ado wo ma n namiliya. Iko ma nɔrɔta tonyɛ ma nya min, mata kɔgɔ-rakɛ fanan mara tonyɛ la wo nya le. 15Taitala keninteyɛ tora warala wo ye kati! Wo dama ya ala kumɛ bira nya min wo, wo ya a labɛn kilan anubɛ yɛrɛyɛrɛn la nya min wo, a hɛnkili tonɛ wo bɛɛ ko. 16N sewanɛ kati bawo n si ke n yigi sala wo kuma feu!

will be added

X\