2 Kɔrɛnti 5

1Ma ya a lɔn ko ma ye fani-bɔn kɛ minnu burɔ duninya kɛ rɔ, ma bagbuyi kɔni, wonu ba wayan tumɛ min, bɔn ye Alla bolo Arinyɛni tɔ ma niyi ye. Ado hadama den ma bɔn wo sɔ. Wo si ma habadan-bɔn la ma ye. 2Kɔnɔ ma ye kurunna fani-bɔn kɛnu tɔ kaka, ma bagbuyi kɔni. A sɔgɛ ye ma la ko ma fɛrɛ-bɔnku-kurɛ minnu bi Arinyɛni tɔ, wonu ni bila ma kan na iko duruki. 3Ni wonu bilanɛ ma kan na, ma gbu-makolɔn ti taran worɔ. 4Ma tenbi duninya fani-bɔn kɛ la, ma ye kurunna iko mɔgɛ tenbi dunu-belebele-wɛ kɔrɔ. Ma sa a fɛ, ma ni bɔ ma fɛrɛ-bɔnkɛ kɛnu tɔ fɔ ka Arinyɛnɛtɛ fanan bila ma kan na. Woletɔ ma fɛrɛ-bɔnku-fagamatoe kɛnu si yɛlɛma nimayɛ la. 5Alla ara ma rabɛn mayɛlɛma koe kɛ la. A ara ala Ni Sɛnimɛ di ma ma alako ma ni a lɔn bɛrɛbɛrɛ-wɛ-kɛ ko a ara fan kɛnu bɛɛ rabɛn malela ko la. 6Woletɔ ma hɛnkili latɛgɛnɛ dɛɛ! Ma ya a lɔn ko ma tenbi fɛrɛ-bɔnkɛ kɛnu tɔ, ma fɛ-yan Mari la worɔ. 7Ma ye ko ladanna mala dɛnkɛninyɛ le fɛ. Ma sa ko ladanna iko ma ye a yenna nya min. 8Ma hɛnkili latɛgɛnɛ. A di ma ye bɛrɛkɛ ka bɔ ma fɛrɛ-bɔnkɛ kɛ rɔ ka ta ma sigi Mari fɛ. 9Kɔnɔ min tenbira wo bɛɛ la, ni ma ye ma warɛ yan, ni wo ma, nyɔ, ma ye a fɛ le ka Alla hɛnɛ tolon! 10Ma ye a fɛ ka a hɛnɛ bawo a fɛrɛ sa fɔ ma dama ni ma sɔ gbɛ rɔ Kirasitila kiti tɛgɛ tinɛ yarɔma. Ma kelen-kelennamɛ-bɛɛ si kiti ka wo sɔrɔn iko a bɛnta ma ma nya min. Ma tenbi fɛrɛ-bɔnkɛ kɛnu tɔ, ni ma ya min ma, a mara a nyima la wo, a mara a yogoma la wo, ma ye wo sarɛ sɔrɔnna le, yɔ! 11Ma kilannɛ Mari la min kɛ, ma ye ma rayala ko mɔgɛ bɛɛ ni a yɛ lamunun Mari la. Alla ya ma lɔn feu! Ado wole ya nde lɔn wo yisi rɔ wo nya na le fanan. 12Ma sa ma rayala ka ma nyɛrɛ matɔgɔ wo ye tun kɔnɔ ma ye a fɛ, wo ni fɛrɛ sɔrɔn ka wasi ma la. Wo le ya a to, wo si ke wonu yabila minnu bi anu nyɛrɛ matɔgɔla ka a tɛgɛ anuna ko-ladan-nya ma kɔnɔ min bi anu yisi rɔ, wo ma de! 13Ni ma mara iko yuwɛnu, wo mara Alla lela ko la. Ni ma mara hɛnkilimɛnu na, wo mara wo munanfaga koe lela ko la. 14Kirasitita keninteyɛ ye ma marala bawo ma ara a lɔn ko mɔgɔ kelen fagara mɔgɛ bɛɛ ye, woletɔ mɔgɛ bɛɛ fagara a fɛ ka bɔ anuna hakɛnu tɔ. 15Ale Yisa fagara mɔgɛ bɛɛ ye, woletɔ minnu belinɛ, wonu kana beli anu nyɛrɛ ye tun fɔ ka beli ale ye min fagara anu ye. Ado a wulita anu ye fanan. 16Nba, ma ti mɔgɛ mafɛlɛn tun iko hadama dan miriya ye nya min. Fɔlɔ nun, ma ya Kirasiti mafɛlɛn iko hadama dan miriya ye nya min kɔnɔ ma ti wo ma tun. 17Mɔgɔ wo mɔgɔ wa ma Kirasiti halalɛ la, mɔgɔ-kurɛ le wo tigi la. Ko-kɔrɔmɛnu bara tenbi, nba, koe bɛɛ ara ma a kurɛ la gbɛ! 18Wo bɛɛ bɔnɛ Alla le bolo. Kirasiti baraka rɔ, male ma ma a yoge la fɔ ka ma a diyana-mɔgɛ la. A ya wɔlɛ kɛ di ma ma ko ma ni mɔgɛ doinu nana a ma ka wonu fanan ma a diyana-mɔgɛnu na. 19Ma ye a fɔla mɔgɛnu ye ko Alla ara mɔgɛ bɛɛ ma a diyana-mɔgɛ la Kirasiti baraka rɔ. Alla ti a miri anu hakɛ ma tun. A ya anu ma a diyana-mɔgɛ la nya min, a ara wo kumɛ di ma ma ka wo lake mɔgɛnu ma. 20Nba, male mara Kirasitita kilayɛnu na alako ma ni ata kumɛ fɔ mɔgɛnu ye. Alla nyɛrɛ ye ma sɔla ka ma ata kuma-lakelɛ la min kɛ, ma ye wo madiyala Kirasitila ko la ko wo ni sɔn ko wo ti to mani Alla yogenu na fɔ ka wo ma a diyana-mɔgɛnu na! 21Kirasiti ma hakɛ-wo-hakɛ kɛ kɔnɔ Alla ya a bira iko hakɛ-tigi ma hakɛnuna ko la alako ma ni ma mɔgɔ-latelennɛ la Alla yala.

will be added

X\