2 Kɔrɛnti 4

1Alla ara kinikini ma ma ka kawandili-bɔ-wɔlɛ kɛ di ma ma. Woletɔ ma ti kuri. 2Ma ara ko-dogonnɛ anubɛ miliya-koe bɛɛ boloka. Ma ti ko-wo-ko kɛ yanfanteyɛ la. Ado ma ti Allala kumɛ yɛlɛma foninyɛ la. Ma ye tonyɛ karanna gbɛ rɔ, woletɔ mɔgɛnu si a lɔn anu nyɛrɛ sɔndɔmɛ rɔ ma ye nya min Alla yala. 3Ado ma ye kibara-nyimɛ min kawandili bɔla, ni wo dogonnɛ, minnu bi nala halakila, a dogonnɛ wonu dɔrɔn de ma. 4Setanɛ min bi duninya kɛ kun na, wo ara a ma, anu ma ke lala Yisa la bawo anu yisi ara to pinpi rɔ. A ya a ma, anu ti ke kibara-nyimɛta waan yenna min bi malanna anu ye. Ado kibara-nyimɛ wo ye Kirasitita gbiliyɛ kɛla ko la. Allala muninyɛ nyɛrɛ le ale la. 5Ma sa ma nyɛrɛta koenu kawandili bɔla. Ma ye kawandili bɔla ko Yisa Kirasiti, Mari le. Ma ko male nyɛrɛ le wota wɔli kɛlɛnu na Yisala ko la. 6A sɛbɛnɛ Allata kitabu rɔ ko, “Waan ni bɔ pinpi rɔ!” Ado Alla kelan wo le ya ala waan lamalan ma yisi rɔ alako ma ni Allata gbiliyɛ lɔn min bi malanna Yisa Kirasiti yakɔrɛ ma. 7Nba, wodi ti ke kibara-nyimɛ min sanna, wo ye male min bolo, ma mani de dɔrɔn iko bɔnku-dagɛnu. Wo si a yira ko Allata sɛnbɛ ye fan bɛɛ marala. Atɛ le, mata ma. 8Ma tɔrɔnɛ wati bɛɛ kɔnɔ nɔ ma sɔrɔn ma ma. Ma kɔndɔfilinɛ kɔnɔ ma yigi tɛgɛni ma mumɛ! 9Ma yogenu siya kɔnɔ Alla ma ma boloka. Ma madumanɛ wati donu tɔ kɔnɔ ma halakini ma. 10Ma ye Yisala sayɛ dununa ma bagbu-fagatɛnu tɔ, woletɔ ata niyi fanan si yen ma bagbuyinu tɔ. 11Ma ye saya-masibɛ kɔrɔ Yisala ko la tuma-wo-tuma alako ata niyi ni yen ma bagbu-fagatɛ kɛnu tɔ. 12Ma ye ma niyi filila tuma-wo-tuma alako wo ni habadan-nimayɛ sɔrɔn. 13A sɛbɛnɛ Allata kitabu rɔ ko, “N bara dɛnkɛninya, woletɔ n kumara.” Dɛnkɛninya kelan wo ye male fanan bolo. Woletɔ ma ye kawandili bɔla bawo 14ma ya a lɔn ko Alla min ya Mari Yisa lawuli ka bɔ sayɛ rɔ, wo si male fanan nawuli. A si ma lawuli bawo mabɛ Yisa ye kan kelen tɔ. A si ma dama ladɛn ma nyɔgɔn fɛ a yakɔrɔ. 15Wo dama ye kɛla ka a tɛgɛ wole ma. Nba, Allata hinɛ min bi kela mɔgɔ siyaman ma nya min, anu siyaman si baraka bira Allata gbiliyɛla ko la wo nya na le. 16Ka a tɛgɛ wo ma, ma ti bandan. Ado hali ma bagbuyi ye fagala doni-doninyɛ ma, ma niyi min bi ma rɔ, wo ye kurayala tele-wo-tele. 17Nba, ma ara tɔrɔya-kunduni kɛ sɔrɔn min ti a laban kɔnɔ wo si habadan-gbiliya-belebele di ma ma, min kolo tɔrɔyɛ wo ko pirr! 18Fan minnu si yen, ma sa ma yɛ sɔla wonu na, fɔ mɔgɛ ti ke minnu yenna. Ma ye min yenna, wo si wati-kunduni-dɔrɔn bɔ kɔnɔ min ti ke yenna, wo si to a la tɛban!

will be added

X\