2 Kɔrɛnti 3

1Kɛ mani de iko ma ye ma nyɛrɛ matɔgɔla wo yala, nyɛ? Male fanan ni a ma iko mɔgɔ doinu bi a mala nya min? Ma ni na kɛdinu na ma bolo min si a yira, ni mɔgɔ-nyimɛ le male la iko doinu? Ni wo ma, wo ni kɛdi su wonu nata mɔgɔ gbɛrɛnu ma malela ko la, wa? 2Wole nyɛrɛ le mala kɛdi la min sɛbɛnɛ ma yisi rɔ alako bɛɛ si ke a karanna nya min ka mala wɔlɔ-nyimɛ lɔn wo tɛma. 3A ara gbɛ feu, ko Kirasiti nyɛrɛ le ya kɛdi kɛ sɛbɛ ka a don ma bolo. A ma sɛbɛ duwa-yi anubɛ kalɛ la. A sɛbɛnɛ Alla nimɛla Ni Sɛnimɛ le la. Ado a ma sɛbɛ kuru-walan ma. A sɛbɛnɛ mɔgɔ yisi le tɔ. 4Ma ye kɛ fɔla bawo ma lanɛ Alla la Kirasiti baraka rɔ. 5Fenfen sa male rɔ min si a ma, ma ni a fɔ ko ma si ke wɔlɛ kɛ kɛla. Min bɛɛ ye ma bolo, wo bɔnɛ Alla le bolo. 6Ale le ya sɛnbɛ di ma ma ko ma ni ma sarama-kan-kurɛta wɔli kɛlɛnu na, min sɛbɛnɛ anubɛ ala mɔgɛnu tɛma. Sarama-kan-kurɛ kɛ sɛbɛni ma kɔnɔ a nanɛ ata Ni Sɛnimɛ bolo. Tɔn-sɛbɛnɛ si na sayɛ la mɔgɛnu ye kɔnɔ ata Ni Sɛnimɛ si niyi di mɔgɛnu ma. 7Nɛbi Musa ya tɔn min sɛbɛ kuru-walan ma, wo nara sayɛ la a bolo. Kɔnɔ a dira mɔgɛnu ma tumɛ min, Allala gbiliyɛ bɔra gbɛ rɔ. Ado Nɛbi Musa yakɔrɛ malanta ha Isirɛla mɔgɛnu ma ke anu yɛ gbangbanna a rɔ hali gbiliya-tamasere min bi malan-malanna a yakɔrɛ ma, wo kɔ fagara. 8Ado gbiliyɛ min bi nala Allata Ni Sɛnimɛ baraka rɔ, wola koloyɛ si ma kama worɔ? 9Mɔgɛnu yilikira tɔn min fɛ, wo gbiliyanɛ mɔgɛnu yala. Kɔnɔ ma ara telen Alla yala sarama-kan-kurɛ min fɛ, wota gbiliyɛ tenbira doi wo la pon! 10Tɔn-kɔrɔmɛ wo gbiliyanɛ, tonyɛ le kɔnɔ wota gbiliyɛ wa sanka mata kila-kurɛ kɛ ma, gbiliyɛ min makawanɛ nun fɔlɔ, wo ara tenbi ka ban fɛsɛfɛsɛ! 11Ado tɔn wo min ya wati-kunduni kɛ ka tenbi dɔrɔn, ni gbiliyɛ ye wo fɛ nun, tɔn min bi tola habadan don? Gbiliya-ba ye wo rɔ ka tenbi doi wo la pirr! 12Ma yisi latɛgɛnɛ bawo yigi kɛ ye ma bolo. 13Nɛbi Musala yakɔrɔ-malan kɔ fagara. Male sa iko Nɛbi Musa min ya kurɛ burun a yɛ la alako Isirɛla mɔgɛnu kana na yakɔrɔ-malan wo yen a kɔ fagala. 14Isirɛla mɔgɛ wonu yisi gbɛlɛyara. Ado ha bi, anu tenbi Allata sarama-kan karanna, a manɛ iko fan do burunnɛ anu yɛ la. Ado wo ti bɔ mɔgɔ yɛ la fɔ a wa tugun Kirasiti la wati min. 15Ha bi, anu ba Nɛbi Musala tɔn karan tuma-wo-tuma, fan do ye anu hɛnkili yamatogonna. 16Kɔnɔ mɔgɔ wa yɛlɛma ka bila Mari fɛ, fan wo si bɔ a hɛnkili ma. 17Nba, Mari wo, ata Ni Sɛnimɛ le. Ado Marita Niyi wo ye kan min, hɔrɔyɛ ye nyɔ le. 18Ma dama ya-makanɛ ye Marita gbiliyɛ mayirala. Ado gbiliya kelan wo ye bɔla Marita Ni Sɛnimɛ le bolo. Ale le ye ma yɛlɛmana alako ma kɛ-nya ni ma iko ale. Wo si a ma, a ni to ala gbiliya-makawanɛ dila ma ma Marita Ni Sɛnimɛ baraka rɔ.

will be added

X\