2 Kɔrɛnti 2

1Woletɔ n ya a latɛgɛ n yisi rɔ ko n ti na wo wara tun ka wo ladiminya iko n ya a ma nya min nun fɔlɔ. 2Ado ni n ya wo ladiminya nun, yon si nde lasewa worɔ fɔ wole n bara minnu nadiminya? 3Wo le ya a to, n ya kɛdi doi wo sɛbɛ wo ma bawo n sa a fɛ ka na wo wara ka diminya wole ma minnu kakɛn ka n nasewa. N lanɛ a la ko n ba sewa tumɛ min, wole fanan sewanɛ worɔ. 4N ya kɛdi wo sɛbɛ tɔrɔyɛ anubɛ yisi-lafinyɛ le la. Ado n ya-yi yigira biribiri! N ma a sɛbɛ ka a tɛgɛ wo ladiminya-koe ma fɔ ka wo lalɔn n bara wo dama keni nya min. 5Nba, ale min ya tɔrɔyɛ kɛ bɛɛ lana wo tɛma, a ya wola chɔchi mumɛ tɔrɔya ka tenbi a ya nde tɔrɔ nya min. N ya wo fɔ min kɛ, n sa a makawala. 6Ale ara tɔrɔyɛ min sɔrɔn wo bolo, wo ara a bɔ. 7Nba kaka, wo ni a makoto ka a madɛnbɛ alako a yisi la kana fin ha a ni Yisata kilɛ boloka feu! 8N bi wo madiyala ko wo ni a yira a la ko wo ya a keni bɛrɛkɛ! 9N ya kɛdi wo sɛbɛ wo ma ka a lɔn ni wo rabɛnnɛ ka nta kumɛ bira tuma-wo-tuma. N bi a fɛ ka wo kɔrɔbɔ nun, ni wo si koe wo bira sɛbɛ la nya min. 10Wo wa mɔgɛ do makoto ala ko-tinya-gbɛla ko la, nde fanan bara a makoto. Ado ni a ya ko-yoge woo kɛ, n si a makoto min na, n bara a makoto ka a kɛ wolela ko la Kirasiti yala alako 11Setanɛ kana nɔ-ko sɔrɔn ma ma. Ado ma ya ale Setanɛ kɛ-nyanu lɔn. 12Nba, n tara Tarayasi tumɛ min ka Kirasitita kibara-nyimɛ kawandili bɔ, n ya a yen ko Mari ara fɛrɛ di n ma ka ata wɔlɛ kɛ nyɔ. 13Kɔnɔ hali wo, n hɔnta ha ka a dan natenbi bawo n ma ke ma na kelen nyɔgɛ Taita yenna. Wo le ya a to, n ya n masara nyɔ-mɔgɛnu na ka Masidoniya nyamanita-kilɛ bira. 14Tabarakala Alla ma! Mabɛ Kirasiti ye kan kelen tɔ min kɛ, Alla ya ma ma yelela-mɔgɛnu na ka ma mayira gbɛ rɔ Kirasitita nɔlɛ rɔ. Nba kaka, ma tenbi tala kan-tina wo kan-tina, a si male bi ka Marita kibara-nyimɛ lake doinu ma. Kibarɛ wo si nyɛnsɛn iko sɛnti-suma-diyamɛ. 15Ma niyi mani de iko sɛnti-suma-diyamɛ, Kirasiti ye min nabɔla Alla ye kɔni. Minnu bi kisila wo, minnu bi halakila wo, wo bɛɛ si fen-sumɛ wo lamɔɛn. 16A ara ma saya-sumɛ la wonu ye minnu bi nala halakila. Kɔnɔ a ara ma nimaya-sumɛ la wonu ye minnu bi nala kisila. Wo mɔgɔ sa min si ke wonu kɛla a nyɛrɛ ma. 17Male sa iko mɔgɔ siyaman bi nya min. Wonu bi Allala kumɛ mayirala iko fere-kɛ-fan min dɛ ma gbɛlɛ. Kɔnɔ Alla ara ma sɔ min kɛ, ma ye kumala gbɛ rɔ Alla yala iko Kirasitita wɔli kɛlɛnu.


Copyrighted Material
Learn More

will be added

X\