2 Kɔrɛnti 12

1Nyɛrɛ-matɔgɛ kɛ ti ko nyinya n ma kɔnɔ hali wo, n ni n nyɛrɛ matɔgɔ fɔlɔn. Mari ya ko-rayirɛ anubɛ lankɛnimayɛ minnu di n ma, n ni wonu bara-koe fɔ kaka. 2A ara san tan-ni-nani bɔ gbɛ, dɛnkɛninya-mɔgɛ do layɛlɛta san kole bɛɛ kuma pon! (Ni a nyɛrɛ le yɛlɛta, ka, ni a ya ko-rayirɛ le yen dɔrɔn, n ma wo lɔn. Alla kelen pe le ya wo lɔn. 3N ya a lɔn ko kei wo layɛlɛta Alla warɛ. Kɔnɔ n ma a lɔn ni a nyɛrɛ le yɛlɛta, ka, ni ko-rayirɛ le nun dɔrɔn. Alla le ya wo lɔn.) 4A ya koe donu namɔɛn nyɔ, hadama dan ti ke minnu fɔla, ado a ti ke minnu nakaranna. 5Woletɔ n si n nyɛrɛ matɔgɔ mɔgɛ wo rɔ kɔnɔ n ti matɔgɔlɛ kɛ n nyɛrɛla ko la. Koe minnu si nna sɛnbɛbɔninyɛ yira, n si n nyɛrɛ matɔgɔ wonu tɔ. 6Ni n bi a fɛ ka n nyɛrɛ matɔgɔ, wo ti a ma, n ni ma kuntan la bawo n bi tonyɛ le fɔla. Kɔnɔ n ti n nyɛrɛ matɔgɔ bawo n sa a fɛ, mɔgɛnu ni anu miri nde ma bɛrɛkɛ! Anu bara n yen min kɛla ka n kan lamɔɛn min fɔla, anu miriya kana tenbi wo la. 7Nba, ka a tɛgɛ wo kabana-ko-waranɛnuna ko la n ya minnu tayen, fɛrɛta-dumɛ ba dira n ma min manɛ n yala iko Setanɛta kilayɛ. Wo si to n gbesila ka n tanka wasinteyɛ ma. 8N ya Mari madiya wola ko la kinyama sawa. N ko a ni fɛrɛta-dumɛ wo bɔ n tɔ 9kɔnɔ a ya n yabi ka le. A ko n mako sa fen gbɛrɛ la ata hinɛ kɔma. A ko ni sɛnbɛ sa n bolo, ata sɛnbɛ si koloya n tɔ worɔ. Nba, n sewanɛ bɛrɛkɛ worɔ ka wasi nta sɛnbɛbɔninya koenuna ko la. N ni a lɔn ko Kirasitita sɛnbɛ ye n matankala. 10Woletɔ n bi fɛrɛta-dumɛ wo kɔrɔ, hali mɔgɛnu ba n manyini wo, gbɛlɛyɛ wa na n ma wo, mɔgɛnu ba n tɔrɔ Kirasitila ko la wo, n sewanɛ wo bɛɛ rɔ. Bawo ni n sɛnbɛ sa tumɛ min, Allata sɛnbɛ ye n tɔ worɔ. 11Wole le wara a ma, n bara kun-takolonyɛ kɛ. A bɛnta wole ni n matɔgɔ nun. Hali fen ma nde la wo yala, wola kilaya-makawanɛ wonu fenfen ma tenbi nde la. 12Kabana koe anubɛ ko-makawanɛ minnu ya a yira ko kilaya-bɛrɛ le nde la, n bara n munyu wo bɛɛ ma-tinɛ wo tɛma. 13Nba, n ya wo bira boloko-yogomɛ-kɛ ka tenbi chɔchi donu na nun kama? Fɔ n ma wo yakɔrɔ-mamɔ min kɛ wodi-ko-dɛnbɛnɛ la dɔrɔn. Wo yandi, wa n makoto hakɛ wo la! 14A sawa nyɔgɛ le kɛ la, n bi n tabɛnna ka ta wo kɔndɔn tinɛ. N ti wo manyinika fenfenna ko la. Ado n sa wola wodi fɛ, fɔ wole nyɛrɛ. Fɛda, a ma bɛn, dennɛnu ni fen nadɛn anu sɔrɔnnɛnu ye. A kakɛn, anu sɔrɔnnɛnu ni fen nadɛn anuna dannu ye. 15N si sewa ka n bolo-fan bɛɛ ni wola ko la, hali ka n nyɛrɛ niyi fanan sa a kuma wo dɛnbɛn koe la. Nta keninteyɛ ye koloyala wo ye min kɛ, wo si a ma, wota keninteyɛ ma ni to yigila n bara la, wa? 16Wole nyɛrɛ ara sɔn ko n ma ma dunɛ la wo kuma. Kɔnɔ mɔgɛ donu si a fɔ ko nde halli nun. Anu ko n ya wo bole labira. 17Wo mara kama? N ya kilayɛ minnu nata wo ma, n ya tɔnɛ sɔrɔn wo bolo wonu fɛ nun, ba? 18N ya Taita madiya anubɛ ma na kelen nyɔgɛ do ko anu ni ta. Wo si a fɔ ko Taita ya tɔnɛ sɔrɔn wo bolo, wa? Ade, mabɛ wo taranta ko kelen kɛla yisi kelen na nun. 19Tumado, wo ye wo mirila ko ma ye ma rayala wati bɛɛ ka ma nyɛrɛ fɛka wo ye. Ade! Ma ye kumala iko Kirasiti ye a fɛ, ma ni kuma nya min Alla yala. Ma diyana-mɔgɛ le wole la. Ma ye koe min bɛɛ mala, ma ye wo kɛla wo dɛnbɛn koe le la. 20N kilannɛ ko n ba ke nyɔ tumɛ min, n bi wo taranna nya gbɛrɛ ma iko a ma di n ye ka wo taran nya min. Wo fanan si n taran nya do ma iko a ma di wo ye ka n taran nya min. Sɔsɔlɛ wo, keliyɛ wo, yisi-bɔɛ wo, kɔrɔndiyɛ wo, lafɛyɛ wo, nafigiyɛ wo, wasinteyɛ wo, sɔnkɔ-sɔnkɛ wo, n kilannɛ ko wo donu si taran wo tɛma. 21N kilannɛ fanan ko n ba ta tumɛ min, nta Alla si n nafɛya wolela ko la. Wo siyaman bara hakɛ kɛ fɔlɔn. N kilannɛ, wo ti sɔn tubila ko-kɔsɔnɛ wonuna ko la. Wo ya min kɛ, wola yɛlɛnya-hakɛnu anubɛ nata-kɛwɔlɛnu si a ma, n ni di biribiri wo siyamanna ko la.

will be added

X\