2 Kɔrɛnti 11

1Wo yandi! Hali n kuntanyanɛ doni, wo ni wo munyu n kɔrɔ. 2N bi wo makeliyala iko Alla ye wo makeliyala nya min. Wo bɛɛ mani de iko sunkurun-nasɔlɔni-bɛrɛ, n bara min furu-koe lanyiri kiri mɔgɔ kelen pe ye, Kirasiti kɔni. 3N kilannɛ ko fenfen kana wo hɛnkili yabasan iko duguma-fan ya ma mama Hawa yanfa ala foninya-wɛ la nya min. Wo kana bɔ wola keninteya-bɛrɛ rɔ min bi wo bolo Kirasiti wara la. 4Min bɛɛ ye nala wo wara ka Yisala kawandili dogbɛrɛ bɔ wo ye, wo sewanɛ wonu na ka wo munyu wonu kɔrɔ. Male ya Yisala kawandilɛ min bɔ, kelen ma wonu na. Nba, wo ara niyi anubɛ kibara-nyimɛ min bira foninya-kilayɛnu bolo, wonu faranɛ matɛ ma feu! Wo ya Allata Ni Sɛnimɛ anubɛ kibara-nyimɛ min sɔrɔn male bolo, kelen ma anu na feu! 5N mirini ma ko nde dɔgɔ ka tenbi wola kilaya-makawanɛ wonu na hali doni! 6Tumado, nde ma kusan kumala kɔnɔ n sa wo nya lɔnnɛ rɔ. Ma ara wo gbɛ wo ye koe bɛɛ rɔ. 7N ya Allala kibara-nyimɛ-kawandili bɔ wo ye tumɛ min, n ma wo manyinika fenfenna ko la. N ya n nyɛrɛ famayigi alako wo ni gbiliyɛ sɔrɔn. Wo yoge wo yala, wa? 8N bi wɔlila wo tɛma tumɛ min, chɔchi gbɛrɛnu ya n sara. A mani de nun iko n bi chɔchi wonu kankanna le nun alako n si wo dɛnbɛ nya min. 9N bi wo tɛma tumɛ min nun, ni n makoe bilara fenfen na, n ma wo yakɔrɔ-mamɔ n dɛnbɛn ko la. N makoe ye fan min bɛɛ la, ma na kelen nyɔgɛ minnu bɔra Masidoniya, wonu nara wo bɛɛ la n ye. Iko a ye nya min kebi fɔlɔ, n ti ma dunɛ la wo ye mumɛ! Alamɛ a tora wo nya fanan. 10N bara n keli Kirasitita tonyɛ rɔ min bi n tɔ. Akeya sigisɔn mɔgɛ fenfen ti ke n nakalala n nyɛrɛ-matɔgɛ kɛ la. 11N ya kɛ fɔ nfenna? N ya wo fɔ bawo n ma wo keni, wa? Alla ya a lɔn ko wola ko di n ye kati! 12N bi min ma tinɛ kaka, n si to wo kɛla bawo foninya-kilaya-makawanɛ doi wonu kana nyɛrɛ-matɔgɔ-kunya sɔrɔn ka a fɔ ko male ye wɔlila nya min, anu fanan bi wɔlila wo nya na le. 13Kilayɛ wonu, kilaya-bɛrɛ ma anu na kɔnɔ anu bi anu nyɛrɛ mala iko Kirasitita kilayɛnu denu bi anu na serr! Foninya-kilayɛ le anu na minnu bi foninyɛ fɔla anuna wɔlɛla ko la. 14Nba, kabana ko ma wo la! Hali Setanɛ si ke a nyɛrɛ mala iko waanta melika! 15Wo kana kawa ni Setanɛta wɔli kɛlɛnu ya anu nyɛrɛ ma iko Allala wɔli kɛla bɛrɛnu. Anuta wati wa ban duninya kɛ rɔ, anu ya min ma, anu si wo sarɛ sɔrɔn, yɔ! 16N ni a fɔ tun, mɔgɔ wo mɔgɔ kana a miri ko kuntan le nde la. Kɔnɔ ni min bi a mirila wo nya, nba, wo tigi ni n tabira iko kuntan. N ni n nyɛrɛ matɔgɔ doni. 17Nba, n bi min fɔ tinɛ kaka, Mari ma n sɔ wo fɔ tinɛ. N bi n nyɛrɛ-matɔgɔla min kɛ, n bi kumala iko kuntan. 18Mɔgɔ siyaman bi anu nyɛrɛ matɔgɔla anuna kɛwɔlɛnuna ko la. Nde fanan si ke wo nyɔgɔn mala. 19Ado wole le dɔrɔn bi hɛnkilimɛnu na! Wo le ya a to, wo sewanɛ ka wo munyu kuntannu kɔrɔ! A sa wo nya, wa? 20Ni mɔgɛ ya wo bira ka wo ma iko yɔɔn ka wo bolo labira ka wo kensunya ka yoo wo ma ka wo dɛ ratii, wo si wo munyu mɔgɔ su wo kɔrɔ. 21N bi miliyala ka a fɔ wo ye ko n ma ke wo mala! Ma yɛ ra ma fara wo nya. Ni mɔgɛ do si sisi a nyɛrɛ matɔgɔla fan dola ko la, nde fanan si sisi le wo mala. (N bi kumala iko kuntan.) 22Hiburunu le anu na, wa? Wo le nde fanan na. Anu bi Yahudiyanuna dina rɔ, wa? Nde fanan bi a rɔ. Iburayima bɔnsɔn le anu na, wa? Wo le nde bɛrɛni na. 23Kirasitita wɔli kɛlɛ le anu na, wa? Nde wɔlita ka tenbi anu denu na pirr! Anu bara n nadon yele la kinyama siyaman ka tenbi anu na. Mɔgɛnu bara n gbesi ka tenbi anu denu na. Sayɛ ara foo n na ka tenbi anu denu na. (Kɛ bɛɛ rɔ, n bi kumala iko hɛnkilibɔnɛ.) 24Kinyama loli kɔrɔ, Yahudiyanu bi n gbesila bosɛ-nya bi-sawa ani kɔnɔntɔ (39) la. 25Romu kɛnu ya n gbesi gbelekɛ la kinyama sawa. Anu ya n mabon kuri la kinyama kelen. Kulɔn tinyara n na kinyama sawa. Lunyɛ do, n ya su kelen anubɛ tele kelen bɔ kɔgɔ-yi rɔ. 26Nna tagama-siyamɛ rɔ, n taranta yi-fɛ-masibɛ rɔ anubɛ kankannu-masibɛ rɔ anubɛ n na kelen nyɔgɛ Yahudiyanu-masibɛ rɔ. Sibolo gbɛrɛnu fanan ya a lagbɛlɛya n kuma. So-burɔ-masibɛ wo, wulɛrɔ-masibɛ wo, kɔgɔ-yirɔ-masibɛ wo, foninya-dɛnkɛninya-mɔgɛnu-masibɛ rɔ wo, n ya n munyu wo bɛɛ kɔrɔ. 27N taranta wɔlɔ-wɛ anubɛ yakɔrɔ-mamɔɛ rɔ. N kira n ya-la tuma siyaman. Kɔnkɛ ya n bira. N kan lagbalata. Tuma siyaman, dɔn-fan ma n tabɔ. Yiya sa n bolo. Fɛrɛya-bɔ sa n bolo. 28Min sanɛ kɛ bɛɛ kuma, chɔchi bɛɛla hɔnyɛ ye n na tele-wo-tele min si n niyi ragbɛrɛn n ma. 29Ni nta mɔgɛ dola sɛnbɛ ma ara dɔgɔya, nde fananta sɛnbɛ ma si dɔgɔya. Ni mɔgɛ do ya nta mɔgɛ do ladon hakɛ rɔ, wo si n yisi tɔrɔ ha ka a dan natenbi. 30Ni fɔ n ba n nyɛrɛ matɔgɔ le, n si n nyɛrɛ matɔgɔ wo koenu tɔ minnu si nna sɛnbɛbɔninyɛ yira. 31Alamɛ ma Mari Yisa Fa Alla tɔgɛ ni tanto tolon! Alla le ya a lɔn ko n sa foninya fɔla. 32N bi Damasika soe burɔ tumɛ min, sigisɔn-mansɛ min bi Mansa Arɛtasi kɔrɔ, wo ya a kandannɛnu sɔ soela foolɛ rɔ, n bira-koe la. 33Kɔnɔ n diyana-mɔgɛnu ya n nayigi sende rɔ ka n natenbi tarɛ kɔma alako n ni bɔ anu bolo.

will be added

X\