2 Kɔrɛnti 10

1Donu bi a fɔla nde, Pɔli ma ko n tenbi wo tɛma, n famayiginɛ kɔnɔ n ba bɔ wo fɛ tumɛ min, n kerinteyanɛ wo la. N bi a fɛ ka kuma wo ye dinyɛ anubɛ nyimayɛ la iko Kirasiti duruta a mala nya min nun. 2N bi wo madiyala ko wo kana n fɔrɔsɛ n ni kerinteya wo la. Minnu ko male ye koenu kɛla duninya kɛ-nyanu denuna ko la, n lanɛ a la ko n ba na tun, n si ke n kerinteyala wonu na serr! 3Tonyɛ le, ma ye duninya kɛ rɔ kɔnɔ ma sa kɛlɛ kɛla iko duninya kɛ si kɛlɛ kɛ nya min. 4Ma ye kɛlɛ-kɛ-fan minnu bila kɛlɛ kɛ tinɛ, duninyata kɛlɛ-kɛ-fen ma wonu na. Ma ye Allata kɛlɛ-kɛ-fen-sɛnbɛmɛnu bila ka Setanɛta kan-tina-latankanɛnu tinya wonu na. Anu bi hɛnkili minnu nabɔla, 5anubɛ anu wasinɛ fan min bɛɛ la, minnu si a ma, mɔgɔ kana na Alla lɔn, ma ye wonu kasarala le pɔ! Ma ye kɛlɛ-kɛ-fan wonu nawɔlila ka miriya bɛɛ ladon Kirasitita marɛ kɔrɔ alako anu ni ala kumɛ bira nya min. 6Wo ni wota kuma-birɛ yira fɔlɔn, wo kɔma, ma si ma rabɛn ka kuma-birabɛlɛ-bɛɛ tɔrɔ! 7Wo ni koe kɛnu mafɛlɛn a kila-bɛrɛbɛrɛ fɛ. Wo mirinɛ ko Kirasititɛ le wole la, nyɛ? Nba, wo hɛnkili ni to kɛ fanan ko ko Kirasitita mɔgɛ le male fanan na iko wo ye nya min. 8Mari ya sɛnbɛ min di ma ma, n wasinɛ sɛnbɛ wo le la bɛrɛkɛ! Ado n ti miliya wo la bawo sɛnbɛ wo sa n bolo ka wo lasɛgi kɔma fɔ ka wo lasabati. 9N sa a fɛ, a ni ma iko n bi wo makilanna nna kɛdi kɛnu tɔ. 10Do si a fɔ ko, “Min sɛbɛnɛ Pɔlita kɛdinu tɔ, wo gbɛlɛ ma wara la kɔnɔ ni ale nyɛrɛ ye ma fɛ, a ma gbɛlɛ wo nya. Fen ma ala kumɛnu na!” 11Wo mɔgɔ su ni a lɔn ko n ba taran wo fɛ wati min, min sɛbɛnɛ n bolo, n si wo le ma, yɔ! N si a lagbɛlɛya wo kuma gben! 12Nba, minnu bara anu nyɛrɛ ma fen na, ma ti sisi ma nyɛrɛ sankala wonu ma. Anu hɛnkili sa mumɛ! Anu bi anu nyɛrɛ sankala anu nyɔgɔn ma! Anu miri a ma ko min telenta anu nyɛrɛ yala, anu bi anu nyɛrɛ kitila wonu denu fɛ. 13Kɔnɔ ma ti wasi fenfen na, a ma kɛn, ma ni wasi min na. Alla ara wɔlɛ min di ma ma, ma ye wasila wo le dɔrɔn na. Ado ma ya wɔlɛ min kɛ wo tɛma, wo ye mala wasɛ kɛ rɔ. 14A kakɛn, ma ni wasi nya min, mala wasɛ ti tenbi a dan wo la. Ado male fɔlɔn nara Kirasitita kibara-nyimɛ la wo ye nun bi ma! 15Woletɔ donu bara wɔlɛ min kɛ, ma wasini ma wonu na fɔ Alla ara min don male bolo. Kɔnɔ ma yigi le ko wola dɛnkɛninyɛ si to koloyala. Wo le si a ma, Alla ara dan min sa, ma si ke ka wɔlɛ kɛ ka ke a dan ma. 16Wo le, ma si ke ka kibara-nyimɛ-kawandili bɔ nyamanɛ wonu tɔ minnu bi wo kɔma. Donu bara wɔlɛ min kɛ mɔgɛ donu barɛ, ma kana wasi wo la. 17Kɔnɔ iko a sɛbɛnɛ Allala kitabu rɔ nya min ko, “Min bi a fɛ ka wasi, Mari ara min kɛ a ye, a ni wasi wo le tɔ.” 18Mɔgɛ min bi a nyɛrɛ matɔgɔla, wola nyɛrɛ-matɔgɛ wo, fuyi le wo la. Min kolo wo bɛɛ ko, Mari wa min matɔgɔ, wo le fisa a bɛɛ ko.

will be added

X\