1 Timoti 6

1Yɔɔn bɛɛ ni a lɔn ko a kakɛn, anu ni anu tigi gbiliya. Ni anu ya wonu gbiliya, mɔgɔ wo mɔgɔ ti kuma-yogomɛ fɔ Alla anubɛ mala karan ma. 2Wole minnu bi dɛnkɛninya-mɔgɛnu kɔrɔ, wo kana wo tiginu nafɛya bawo wo na kelen nyɔgɛ le wonu na. Wo ni wɔlɛ kɛ anu ye bɛrɛkɛ, bawo anu bi tɔnɛ sɔrɔnna wola wɔlɛ wonu fɛ. Ado wo diyana-dɛnkɛninya-mɔgɛ le wonu na. I ni koe kɛnu karan ka mɔgɛnu makawandi. 3Ni mɔgɔ wo mɔgɔ ya karan gbɛrɛ do kɛ ado a ma sɔn Mari Yisa, Allata-Mɔgɔ-Yabɔnɛta kumɛnu ma, hali maleta dina karan wara-koe rɔ, 4wo tigi ara a nyɛrɛ kɔrɔbi ka wasi. A ma ko-wo-ko lɔn. A hɛnkili rabasannɛ. Wo si a ma, anu ni sɔsɔli kɛ kumɛnuna ko la. Sɔsɔlɛ wonu si na keliyɛ la min si a ma, wo si faralɛ lana anu tɛma. Wo kɔma, anu bi suila anu nyɔgɛnu ma, 5ado tuma-wo-tuma anu bi sɔsɔli sala. Mɔgɛ wonu hɛnkili tinyanɛ, tonya sa anu bolo muk! Anu bi anu mirila ko dina koe, nɔnfulu-sɔrɔn-kilɛ le. 6Ado, ni min bi ma bolo, ni wo ya ma wasa, mala dina kɛ si mɔgɛ ma nɔnfulu-tigi la, yɔ! 7Ma ma na fenfen na ma bolo duninya kɛ rɔ. Ado ma ti ke tala fenfen na ma bolo fanan! 8Woletɔ ni dɔn-fan anubɛ kurɛnu bi ma bolo, wonu ni a bɔ ma bolo. 9Kɔnɔ minnu bi a fɛ ka ma nɔnfulu-tigi la, wonu si bui nata-yogomɛ su bɛɛ rɔ. Yuwaya-koe anubɛ sɔn-yogoma-siyamɛ si ma gbɛrɛ la anu ye. Wonu bi nala buila ka don nyɛrɛ-tinya anubɛ halaki koe rɔ. 10Ado ko-yogoma-sufa-bɛɛ-dabirɛ le wodi-kenɛ la. A sɔrɔn-sɔgɛ ya mɔgɛ donu bira kati! Ado wonu tigi bara bɔ dɛnkɛninya-koe rɔ. Ado anu yisi ara tinya mɔni siyaman bolo. 11Ile Allata mɔgɛ, i ni i nyɛrɛ tanka koe wo bɛɛ ma. Telenbagayɛ wo, ka kilan Alla la wo, dɛnkɛninyɛ wo, keninteyɛ wo, munyɛ wo, dinyɛ wo, i raya kɛnu ma. 12I ni i se-koe-bɛɛ kɛ ka ta yarɔ dɛnkɛninya koe rɔ woletɔ i si habadan-nimayɛ bira i bolo filɛ la i nyɛrɛ ye. Alla ya i kele niyi wo le ma, wo tumɛ i ya sereya-nyimɛ yira dɛnkɛninya-koe rɔ sereya-siyaman yala. 13N bi Alla rakelela min bi nimayɛ dila fan bɛɛ ma anubɛ Yisa Kirasiti min ya sereya-nyimɛ bɔ Pontiyasi Pailɛti yala. N bi wonu takelela ko anu ni ma n sere la. 14Alla ya i sɔ min ma-tinɛ, i ni wo bira ka a mara sɛninyɛ rɔ ha ma Mari Yisa, Allata-Mɔgɔ-Yabɔnɛ ni bɔ gbɛ rɔ tumɛ min. Ni i ya wo ma, mɔgɔ ti ke fɛɛ sala i la. 15Mɔgɛnu bi Alla min gbiliyala, ma kun-tigi-kelan kɔni, wo si Kirasiti labɔ gbɛ rɔ a nyɛrɛta wati-latɛgɛnɛ rɔ. Allatala le mansɛnuna Mansɛ la anubɛ marinuna Mari. 16Ale kelen pe ti faga. A ye waan min tɔ, mɔgɔ wo mɔgɔ ti a madon wo la. Mɔgɔ wo mɔgɔ ma ale yen bɛ. Ado mɔgɔ wo mɔgɔ ti ke a yenna lefan. Alamɛ gbiliyɛ anubɛ habadan-sɛnbɛ dira ale ma! Amina. 17Nɔnfuli ye minnu bolo duninya kɛ rɔ, i ni wonu makawandi ko anu kana wasi. Anu kana anu yigi sa nɔnfuli kuma iko fen de min bi mɛla. Anu ni anu yigi sa Alla kuma min bi fan bɛɛ dila ma ma foninsereyɛ la ka ma lasewa. 18I ni anu makawandi ko anu ni ko-nyimɛ kɛ anuna wodi rɔ. Anu ni ma nɔnfulu-tiginu na anuna kɛwɔli-nyimɛnu tɔ. Anu fanan ni foninsereyɛ kɛ ka mɔgɛnu kɔ. 19Anu si nɔnfuli ladɛn anu nyɛrɛ ye worɔ. Wo si ma sinan-sigi-kunya la anu ye yarɔ. Ado anu si ke ka nimaya-bɛrɛ bira wo la. 20Timoti, min dantɛgɛnɛ i ma, i ni wo mara gben! I kana i tole masɔ Alla lɔnbɛliya-kuma teleka-telekɛnu na anubɛ yuwaya-sɔsɔlɛnu. Anu bi a fɔla ko lɔnnɛ le sɔsɔlɛ wo la kɔnɔ a sa wo nya de! 21Ado donu ko lɔnnɛ ye anu bolo kɔnɔ a laban, anu bara dɛnkɛninya-kilɛ to. Alamɛ Allala hinɛ tora wo dama fɛ.

will be added

X\