1 Timoti 5

1I kana kɛmɔgɛnu makuma fɔ ka anu manugu-nɛgɛ iko i fanu. I ni i ta-nyɔgɛ fonike-keimɛnu bira iko i na kelen nyɔgɛnu. 2Musu-kɔrɛnu bira iko i nanu. Fonike-musumɛnu bira iko i tirisan-musinu. 3Mɔgɔ woo sa kɛɛ-musi minnu bolo, i ni wonu makoe nyinya. 4Kɔnɔ ni dan anubɛ mamanɛ ye min bolo, i ni wonu karan ko anu denu ni anu sɔrɔnnɛnu anubɛ anu benbanu makoe nyinya. Wo le ye Alla hɛnɛna bawo wonu denu ya anu makolo. 5Kɛɛ-musi min kun makolɔn, wo si a yigi sa Alla kuma fasai! A si to Alla matarala ata dɛnbɛnɛla ko la su-ni-tele. 6Kɔnɔ kɛɛ-musi min bi tola a nyɛrɛ diyana koenu kɛla, hali a ye a kɛndɛ la, a faganɛ le. A tɔnɔ sa a la. 7I ni anu makawandi koe kɛnu tɔ alako mɔgɔ woo kana fɛɛ yen anu na. 8Ni mɔgɛ do ma a warɛ-mɔgɛnu makoe nyinya katarala a nyɛrɛta denbayɛ ma, wo ara a kan-kɔ sɔ dɛnkɛninyɛ la. Mɔgɔ sufa wonu yogo dɛnkɛninyabɛlɛnu ko. 9Kɛɛ-musi min sɔrɔn ma tenbi wɛ san bi-wɔrɔ la, i kana wo tɔgɛ sɛbɛ kɛɛ-musi-doinu tɔgɛ sɛbɛnɛ kan min ado a nyɛrɛ latɛgɛnɛ ala kei kelen pe le ma. 10Ni mɔgɛnu bi musi wo matɔgɔla ala kɛwɔli-nyimɛnuna ko la, anu ni a tɔgɛ sɛbɛ. A ni ma musi la min bara ala dannu makolo a kin na ka sundannu yiya a warɛ. A ni famayigiya-wɔlɛ kɛ a ta-nyɔgɛ dɛnkɛninya-mɔgɛnu ye ka mɔgɔ-tɔrɔnɛnu fanan dɛnbɛ. A ni a nyɛrɛ di kɛwɔli-nyimɛ-sufa-bɛɛ ma. 11Kɔnɔ i kana kɛɛ-musu-fonikenu tɔgɔ sɛbɛ bawo furu-ko-nata wa anu bira tumɛ min, anu si anuna sarama-kan tinya Kirasiti wara la worɔ. 12Anu si yiliki sarama-kan fɔlɛ wo tinyɛ fɛ anu bolo. 13Wo kɔma, anu si anuna wati tinya tagamana mɔgɛnuna bɔnnu na. Kɔnɔ min yogo wo ko, anu si to nafigiyɛ anubɛ kolandiyɛ kɛla. Anu si kumɛ donu fɔ, a ma bɛn, anu ni minnu fɔ. 14Woletɔ min fisa, kɛɛ-musu-fonikenu ni sigi furi rɔ ka to dannu sɔrɔnna. Anu ni anuna bɔnnu fɛ-bira alako ma kana fɛrɛ di ma yogenu ma ka kuma-yogomɛ fɔ ma ma. 15Ado kɛɛ-musi donu bara ban yɛlɛmana ka bila Setanɛ fɛ. 16Kɔnɔ ni kɛɛ-musinu bi dɛnkɛninya-musi do bolo ala denbayɛ tɛma, ale le ni wonu makoe nyinya. A kana dunɛ wo sa chɔchi kuma. Fɔ kɛɛ-musi minnu bi anu nyɛrɛ ma, chɔchi si wonu makoe nyinya. 17Chɔchi-mɔgɔ-ba minnu bi kun-tigiya-wɔlɛ kɛla a kilɛ fɛ, a bɛnnɛ, wonu ni gbiliyɛ anubɛ sara-kɛndɛ sɔrɔn, katarala minnu bi wɔlila bɛrɛkɛ kawandili bɔ tinɛ anubɛ mɔgɔ karan tinɛ. 18Ado a sɛbɛnɛ Allala kitabu rɔ ko, “Sara-ninki tenbi fui-fan tɛnna tumɛ min, i kana a dɛ makiri.” A sɛbɛnɛ fanan ko, “Wɔli kɛlɛ ni a sarɛ sɔrɔn.” 19I kana i tole sigi chɔchi-mɔgɔ-banu maburi-kan la fɔ sereya fila, ni wo ma, sawa bɔra a ma. 20Minnu ti sɔn hakɛ bolokala wo tɛma, wonu makuma gbɛ rɔ, alako mɔgɛ toenu si kilan nya min. 21N bi kɛ fɔla i ye Alla anubɛ Yisa Kirasiti anubɛ melika-sɛnimɛnu yala ko i ni kawandili kɛnu bira. I kana mɔgɛ do latenbi mɔgɛ do la. I ni ko-latelennɛ kɛ mɔgɛnu tɛma koe bɛɛ rɔ. 22I kana gbaran i nyɛrɛ la ka i bole sa mɔgɔ kuma tiriya Marita wɔlɛla ko la. Ni i ya wo ma, wo wa bui, wo filɛ ara don hakɛ rɔ. I ni i nyɛrɛ mara sɛninyɛ rɔ wati bɛɛ. 23N bara a lamɔɛn min kɛ ko i buyi ye i dimila, ado kirayɛ sa i bolokala, i kana dan yi dɔrɔn ma fɔ ka to nɔnbɔ-gbɔ-yi doni minna. 24Mɔgɛ donu hakɛ yen-koe ma gbɛlɛ, bɛɛ si a yen gbɛ rɔ. Ado anu nyɛrɛ ya a lɔn ko Alla, ni wo ma, mɔgɔni-gbuyi si anu kiti. Kɔnɔ donu hakɛ yen-koe gbɛlɛ, mɔgɛnu ti anu yen fɔ wati-laban. 25Kɛwɔli-nyimɛ fanan bi wo nya na le feu! Kɛwɔlɛ donu ti ke dogonna. Hali minnu dogonnɛ, wonu si bɔ gbɛ rɔ wati-laban.

will be added

X\