1 Allata Ni Sɛnimɛ ya a gbɛ ko wati-laban kɛ kɔrɔ, mɔgɛ donu si dɛnkɛninyɛ boloka. Anu si foninya-karan bira min bi bɔla nyinɛnuna karan rɔ. 2 Yanfantenu si foninya-karan wo nyɛnsɛn. Anu sɔndɔmɛ faganɛ iko fɛrɛ min bara mintan kɔrɔma la nɛgɛ-kalamɛ bolo. Woletɔ anu ti ko-nyimɛ anubɛ ko-yogomɛ dan-nafarɛ lɔn. 3 Wo mɔgɔ sufanu bi mɔgɛnu karanna ko furu-kiri-koe anubɛ dɔn-fan-donu dɔn-koe, ko-yogomɛ le wonu na. Kɔnɔ ni i wara ban baraka birala Alla ye wonuna ko la, Alla ko wonu ma yogo. A ya wonu nadan dɛnkɛninya-mɔgɛnu ye minnu bara ban tonyɛ lɔnna. 4 Alla ya fan min bɛɛ dan, wo bɛɛ kin. A ma bɛn, mɔgɛ ni a ban wo fenfen na. Alako a ni Alla ko-nyima lɔn dɔrɔn! 5 Ado iko Allala kumɛ ya a fɔ nya min, dɔn-fan wo ara sɛninya Alla-matarɛ fɛ. 6 Ni i ya i na kelen nyɔgɛnu makawandi koe kɛnu na, i si ma Yisa Kirasitita wɔli-kɛla-nyimɛ la. I si a lagbɛ ko i makolota dɛnkɛninya-kumɛ anubɛ tonya-karan wonu na i wara minnu bira. 7 I ni fara Alla-lɔnbɛlɛnuna foninya-poroto-parata-fɔɛ la. Wonu namɔɛn ti ko-wo-ko nyinya. I ni i nyɛrɛ kolo ka to Alla fɛ. 8 Tonyɛ le kɛ la, ado i ni la a la ka a bira gben, ko ka i fɛrɛ ramaga, wo si koe do nyinya. Kɔnɔ ka i ramaga Allata wɔli kɛ tinɛ, wo si ko nyinya nya bɛɛ ma. A si i dɛnbɛ duninya kɛ rɔ anubɛ lakira fanan. 10 Wo le ya a to, ma ye ma rayala ka Allata wɔlɛ kɛ kati, bawo ma ara ma yigi sa Alla nimɛ kuma, mɔgɛ bɛɛ kisilɛ kɔni, katarala male dɛnkɛninya-mɔgɛnu ma. 11 I ni to mɔgɛnu karanna koe kɛnu na. A fɔ anu ye ko fɔ anu ni wonu ma. 12 I kana sɔn, mɔgɔ wo mɔgɔ ni yoo i ma ila fonikeyɛla ko la. I kuma-nya wo, i kɛ-nya wo, ila keninteyɛ wo, ila dɛnkɛninyɛ wo, ila sɛninyɛ wo, i ni ma misala-nyimɛ la dɛnkɛninya-mɔgɛnu ye wo bɛɛ rɔ. 13 I ni to Allala kitabu karanna mɔgɛ bɛɛ yala. I ni to mɔgɛnu makawandila ka to anu karanna fanan. I raya wonu ma-tinɛ ha n ni na tumɛ min. 14 I kana i ban Allata Ni Sɛnimɛta fandɛ la min bi wɔlila i rɔ. Wo dira i ma wo tumɛ chɔchi-mɔgɔ-banu ya anu bole sa i kuma wɔlɔyiya-kumɛ fɔ tinɛ. 15 I ni koe kɛ bɛɛ kɛ ka i nyɛrɛ di anu ma fasai alako bɛɛ ni i kolo-nya yen dɛnkɛninyɛ rɔ. 16 I hɛnkili to i nyɛrɛ anubɛ ila karan ko. I ni to koe kɛnu kɛla bawo Alla si wobɛ i kan-namɔɛnnɛnu kisi ka a tɛgɛ ila wɔlɔ-nyimɛ ma.
