1 Nba, ma na kelen nyɔgɛnu, koe kɛnu si kɛ tumɛ min, hali n ma kɛdi sɛbɛ wo ma 2 bawo wo nyɛrɛ ya a lɔn ko Mari na-tumɛ si na iko surɔ-kankan. 3 Mɔgɛnu tenbi a fɔla ko anu bi yisi-kimɛ anubɛ lafɛrɛ rɔ, nba, anu si tɛrɛna halakiyi la wo wati le tɔ, yɔ! A si ma iko musu-kolomɛ buyi wa a lamaga. Anu ti kisi Mari na-tumɛ rɔ. 4 Kɔnɔ ma na kelen nyɔgɛnu, wo sa pinpi rɔ min kɛ, wo tumɛ ti wole latɛrɛna iko kankan. 5 Waan anubɛ teleta mɔgɛ le wo dama la min kɛ, wo kɛ-nyanu ni bɛn anu ma. Suyi anubɛ pinpita mɔgɔ ma male la. 6 Nba, ma kana kinɔgɔ iko doinu. Ma kundennɛ ni to ka ma yɛ lakalan anubɛ ka ma hɛnkili masɔ. 7 Kinɔgɔlɛnu si kinɔgɔ suyi le tɔ. Gbɛɛtoenu fanan si gbɛɛ min suyi le tɔ. 8 Kɔnɔ teleta-mɔgɛ le male la, woletɔ fɔ ma ni ma hɛnkili masɔ. Ma ni dɛnkɛninyɛ anubɛ keninteyɛ don iko kɔgɔ-matanka-fan. Alla ara lɔnnɛ min di ma ma ko ma ara kisi, wo ni ma mala kɛlɛ-kɛ-fulɛ la. 9 Alla ma a latɛgɛ ko ma ni ala diminyɛ sɔrɔn kiti-tɛgɛ-lunyɛ. A ye a fɛ, ma ni kisi-koe sɔrɔn ma Mari Yisa, Allata-Mɔgɔ-Yabɔnɛ baraka rɔ. 10 Yisa fagara ma ye alako ni ala nɛ ya ma kɛndɛ taran, ni wo ma, ma faganɛ, wo bɛɛ rɔ, ma si nimayɛ sɔrɔn a bolo. 11 Woletɔ wo ni wo nyɔgɔn sɛnbɛ don ka wo nyɔgɔn madɛnbɛ iko wo ye a kɛla nya min kaka. 12 Nba, ma na kelen nyɔgɛnu, ma ye wo madiyala ko kelen pela ko la. Mari ara wɔli kɛlɛ minnu sɔ wo yarɔ, wo karan-mɔgɛnu anubɛ wo makawandilɛnu kɔni, wo ni wonu gbiliya nya bɛɛ ma. 13 Wo ni anu bira gbiliyɛ anubɛ keninteyɛ rɔ ka a tɛgɛ anu bi wɔlɛ min kɛla wola ko la. Wo ni to yisi-kimɛ rɔ dɛɛ! 14 Ma na kelen nyɔgɛnu, wo ni kalabantenu makawandi. Wo ni yisi-latɛgɛ di kilandɔgɛnu ma. Minnu yisi rafaganɛ, wo ni to wonu dɛnbɛna ka wo munyu wo nyɔgɔn kɔrɔ. 15 Wo kana sɔn, mɔgɔ wo mɔgɔ ni ko-yoge sara ko-yoge la. Tuma-wo-tuma, wo ni to ko-nyimɛ kɛla wo nyɔgɔn ye anubɛ mɔgɛ bɛɛ. 16 Wo yisi ni to sewɛ rɔ tumɛ bɛɛ. 17 Wo kana kuri Alla matara tinɛ. 18 Ni ko-wo-ko mara, wo ni baraka bira Alla ye wati bɛɛ. Ado Alla ye nyinina wo le ma. Wo ni to wo mala Kirasiti Yisa rɔ. 19 Wo kana Allata Ni Sɛnimɛta wɔlɛ mabeli. 20 Wo kana wɔlɔyiya-kumɛnu nafɛya. 21 Wo ni koe bɛɛ fɛsɛfɛsɛ. Min kin, wo ni wo mara gben! 22 Min yogo, wo ni wo tanka ko su wo bɛɛ ma. 23 Alla min bi yisi-kimɛ dila wo ma, alamɛ wo ya wo dɛnbɛ ka wo nyɛrɛ mara feu! Wo niyi wo, wo sɔndɔmɛ wo, wo fɛrɛ-bɔnkɛ wo, alamɛ wo ya wo bɛɛ mara a kin na! Ma Mari Yisa, Allata-Mɔgɔ-Yabɔnɛ wa na tumɛ min, a ni wo taran, fɛɛ woo sa wo la. 24 Ale Yisa min bara wo yabɔ, kan-kelen-tigi le ale la min kɛ, wo si la a la ko a ni koe wo bɛɛ ma wo ye. 25 Ma na kelen nyɔgɛnu, wo ni Alla matara male fanan ye. 26 Wo ni ma na kelen nyɔgɛ bɛɛ kɔndɔn keninteyɛ la. 27 N bi wo madiyala ma Mari tɔgɔ rɔ ko wo ni kɛdi kɛ karan dɛnkɛninya-mɔgɛ bɛɛ ye. 28 Ma Mari Yisa, Allata-Mɔgɔ-Yabɔnɛta hinɛ ni to wo fɛ.
