1 Tɛsalonaika 2

1Ma na kelen nyɔgɛnu, wole nyɛrɛ ya a lɔn ko ma ara wati min nyɔgɔn kɛ wo fɛ, wo ma kɛ fu! 2Yanni ma ni ke wo ma Tɛsalonaika, Filipai kɛnu bara ma bira boloko-yogomɛ-kɛ. Mɔgɛnu ya ma lafɛya nyɔ kɔnɔ hali wo, mata Alla ya yisi-latɛgɛ di ma ma ko ma ni ata kibara-nyimɛ fɔ wo ye. 3Ma ya kibara-nyimɛ min nake, ma ma wo lake ka a tɛgɛ foninyɛ anubɛ ni-yogoyɛ ma. Ma ma ma raya ka mɔgɔ wo mɔgɔ yanfa. 4Iko Alla ara ma lakɔrɔsi nya min, a ye a fɛ, ma ni kibara-nyimɛ fɔ mɔgɛnu ye wo nya na le. A ya wɔlɛ wo bɛɛ kerifa ma la. Ma wa kuma, ma sa ma rayala ka mɔgɛnu hɛnɛ fɔ Alla min bi ma yisi lakɔrɔsila. 5Wo ya a lɔn serr, ko ma ma darɔ-diyɛ kɛ wo ye alako wo ni mala kumɛ bira. Ma sa bilala mɔgɔna-wodi fɛ. Ado ma sa ma nyɛrɛ diyana koenu kɛla dogɔn rɔ. Alla le ma sere la! 6Ma ma ma raya ka tɔgɛ sɔrɔn hadama den woo bolo, wole wo, mɔgɔ gbɛrɛ wo. 7Kirasitita kilayɛ le male la. Sɛnbɛ ye ma bolo nun ka a lagbɛlɛya wo kuma. Kɔnɔ ma dinyanɛ tora wo fɛ iko musu-denbɛ si dinya ala dannu kɔrɔ nya min. 8Nba, ka a tɛgɛ mala keninteyɛla ko ma wole ye, ma rabɛnnɛ ka Allala kibara-nyimɛ lake wo ma hali ka ma nyɛrɛ niyi fanan sa wo kuma. Wo diyara ma ye kati! 9Ma na kelen nyɔgɛnu, wo hɛnkili ye mala wɔlɛ anubɛ mala nyagbɛ ko, yɔ! Ma tenbi Allala kibara-nyimɛ kawandili bɔla wo ye, ma tora wɔlila ma bole la su-ni-tele alako ma kana wo tɔrɔ. 10Ma siginɛ wo fɛ tumɛ min, ma sɛninyanɛ, ma telennɛ, fɛɛ ma taran ma la wole dɛnkɛninya-mɔgɛnu tɛma. Wo nyɛrɛ le wo sereyɛ la anubɛ Alla. 11Wo ya a lɔn ko ma ya wo kelen-kelennamɛ-bɛɛ bira iko denbɛnu si anuna dannu bira nya min. 12Ma ya wo makawandi ko wo yisi ni kimɛ. Ma ya wo madiya ko wo ni tagama-nyimɛ kɛ ka Alla hɛnɛ. Ado ale le ara wo kele ka wo ladon ata mansayɛ anubɛ ala gbiliyɛ rɔ. 13Ma ye baraka birala Alla ye tumɛ bɛɛ ko ma nara Allala kumɛ la wo ye tumɛ min, wo ya a lamɔɛn ka a bira a kilɛ fɛ. Wo ma a bira iko a bɔra mɔgɛ le bolo. Wo ya a bira iko Allata kumɛ. Ado Allala kumɛ ye wɔlila wole dɛnkɛninya-mɔgɛnu burɔ hali kaka. 14Ma na kelen nyɔgɛnu, koe minnu mara Allata mɔgɛnu na Yudiyanuna nyamanɛ rɔ, wo le wara ma wole fanan na. Wo ya tɔrɔya su min sɔrɔn wo nyɛrɛta nyamanita-mɔgɛnu bolo, anu denu fanan ya wo sufa sɔrɔn Yahudiyanu bolo fɔlɔ nun. 15Wonu denu ya Mari Yisa faga anubɛ Allata nɛbinu. Anu ya male gben nyamanɛ wo burɔ. Anu sa Alla hɛnɛna ni! Ado anu bi mɔgɛ bɛɛ kan ma! 16Anu bi anu tayala nun ka male lakala alako ma kana kisi-ko-kumɛ kawandili bɔ sibolo gbɛrɛnu ye. Anu bi hakɛ min kɛla tumɛ bɛɛ, wo dan natenbi le. Ado Allala fondo-bɔɛ ara a laban anu kuma! 17Ma na kelen nyɔgɛnu, hali ma bɔnɛ wo fɛ watini kɔrɔ, wo yen-sɔgɛ ye ma la bɛrɛkɛ! Hali ma sa wo fɛ, ma ye wo fɛ ma yisi rɔ. Ado ma ya ma raya ko ma ni wo yen tun, yɔ! 18Wo sɔgɛ ya ma bira kati! Nde, Pɔli ya n taya sɛgi-koe ma wo wara. A ma dan kinyama kelen ma kɔnɔ Setanɛ ya kilɛ tɛgɛ ma ma. 19Wole Tɛsalonaika kɛnu, ma yigi anubɛ mala sewɛ le wole la. Mari Yisa wa na tumɛ min, ma si wasi wole rɔ iko mɔgɔ wa mansaya-fulɛ don ma kunyɛ la. 20Ɔnde, wole le si a ma, n ni wasi wo rɔ ka nyagalen!

will be added

X\