1 Pita 3

1Musinu fanan ni sɔnnaya anuna keinu ye wo nya na le. Woletɔ ni minna kei dɛnkɛninyani ma Allala kumɛ ma, a si yɛlɛma ka dɛnkɛninya ala musi wo kɛ-nyala ko la. Hali a ma fenfen fɔ 2bawo a si ala musi kɛ-nya sɛnimɛ anubɛ a gbiliya-nya yen. 3Ile musi, i kana i nyɛrɛ makiri ka i lakinya wo nya dɔrɔn. I ye i kunyɛ danna nya min wo, i ye sɛnɛ dunna nya min wo, i ye fɛrɛya-bɔ-hakikɛ min bila wo, i kana i to wonu dɔrɔn ma. 4Kɔnɔ ila kinyɛ ni taran i yisi fɔlɔn tɔ. Ila sabari-nya anubɛ ila dinyɛ, wonu denu si Alla hɛnɛ. Alla ya a fɔ ko-su kɛnu denu ma ko anu kin. Ado kinyɛ su kɛnu denu si Alla kolan labɔ! 5Ado musu-sɛnimɛ minnu ya anu yigi sa Alla kuma fɔlɔ nun, wonu sɔnnayara anuna keinu ye. 6Ni wole musinu ya ko-nyimɛ kɛ wola keinu ye, wo si ma Sirala dunmusinu na worɔ. Ma mama Sira ye wo nya na le nun. A ya ala kei, Iburayimala kumɛ bira ka a kele ko, “N tigi.” Wo si kɛ bɛɛ kɛ hali kilan sa a fɛ. 7Keinu fanan, wo ni wo miri wola musinu ma. Wo ni a lɔn ko wota sɛnbɛ kolo anutɛ ko, woletɔ wo ni anu bira a kin na ka anu gbiliya. Ado Alla ye duwɛ min kɛla ka habadan-nimayɛ di wo ma, wo dama rakɛn wo sɔrɔn koe rɔ Alla bolo. Ni wo ya wo ma, fenfen ti wola Alla-matarɛ tinya. 8Ala ban, wo dama miri-nya anubɛ wo kɛ-nya ni ma kelen na. Wo ni wo nyɔgɔn keni iko na kelen nyɔgɛnu. Wo ni ko-nyimɛ kɛ ka wo famayigi wo nyɔgɔn ye. 9Wo kana ko-yogomɛ sara ko-yogomɛ la. Ni min ya wo mɔɛn ka wo lafɛya, duwa wo tigi ye bawo Alla le ya wo kele alako wo ni duwa mɔgɛnu ye. Ni wo ya wo ma, Alla si ata duwɛ layigi wole fanan kuma. 10Iko a sɛbɛnɛ Allala kitabu rɔ nya min ko, “Wo ye a fɛ, wo ni to wo diya? Wo ye nyinina simayɛ anubɛ sewɛ ma? Wo ni wo fara foninya-fɔɛ anubɛ kuma-gbondani-fɔɛ la. 11Wa wo bole bɔ ko-yogoma-kɛ rɔ ka ko-nyimɛnu kɛ. Wo ni wo raya ka sigi yisi-kimɛ rɔ. 12Bawo Mari kolan bɛnnɛ mɔgɔ-latelennɛnu ma. A wɔlɔ matɔlɔnɛ anu di-kɛ-kannu na. Kɔnɔ ko-yogoma-kɛlɛnu, a ye wonu kan ma.” 13Ni wo ye gbaranna wo nyɛrɛ la ko-nyima-kɛ-koe la, yon si wo tɔrɔ worɔ? 14Kɔnɔ hali wo tɔrɔta bawo wo ye ko-telennɛ kɛla, mɔgɔ-sewanɛ le wo la worɔ! Wo kana kilan mɔgɛnu na. Ado wo kana hɔn anuna ko la. 15Min fisa, wo ni Kirasiti gbiliya wo yisi rɔ ka a ma wo Mari la. Yigi min bi wo rɔ, mɔgɔ wo mɔgɔ wa wo manyinika wo ma, wo rabɛnnɛ ni taran tuma-wo-tuma ka wo faranfasi mɔgɛ wo ye. 16Kɔnɔ wo tenbi a faranfasila, wo ni a kɛ dinyɛ anubɛ gbiliyɛ rɔ. Wo sɔndɔma-sɛninyanɛ ni to, woletɔ anu ba wo manyini tumɛ min, minnu bi kuma-yogomɛ fɔla wo ma wo kɛ-nya-nyimɛla ko la Kirasiti rɔ, wonu si miliya anuna kumɛ wonuna ko la. 17Ado ni Alla sako le, yanni i ni tɔrɔ ko-yogomɛla ko la, a fisa, i ni tɔrɔ ko-nyimɛla ko la. 18Wa wo miri kɛ ma. Kirasiti nyɛrɛ fagara ma ye iko kelen pe ma hakɛla ko la. Ale mɔgɔ-nyimɛ fagara male mɔgɔ-yogomɛnuna ko la alako a ni ma lana Alla ma nya min. A ye hadama denyɛ la tumɛ min, anu ya a faga kɔnɔ a tora a niyi la Allata Ni Sɛnimɛ baraka rɔ. 19Ado a tara lakira ata Ni Sɛnimɛ baraka rɔ fanan ka ta kawandili bɔ furinu ye nyɔ. 20Wo tumɛ Nowa ye kulɔn ladanna, Alla ya a munyu mɔgɔ wonu kɔrɔ kati, bawo anu ma sɔn ala kumɛ birala. Mɔgɔ siyaman ma don kulɔn wo rɔ fɔ anu mɔgɔ segin pe minnu kisira yi-fɛ wo ma. 21Ado yi-fɛ wo le batasili-misalɛ la bawo wole ara kisi Yisa Kirasitita lawuli-sɛnbɛ fɛ wo nya na le. Ka a fɔ ko wo ni wo ku, wo dɔrɔn ma de! Ma wa batasili kɛ, ma ye Alla matarala ko a ni ma sɔndɔmɛ gbɛ. 22Ale Yisa tara Arinyɛni tɔ. A siginɛ a Fa Alla kɔɛn-nyimɛ rɔ nyɔ. A ye kun-tigiyɛ kɛla Arinyɛnitɔ-melikanu anubɛ sɛnbɛ-tiginu anubɛ nyɔ-kun-tigi-bɛɛ kun na.

will be added

X\