1 Pita 2

1Woletɔ wo ni fara ko-yogomɛ bɛɛ la. Wo kana foninyɛ fɔ tun. Nyɛrɛmankolayɛ wo, keliyɛ wo, mɔɛn-kɛ wo, wo ni fara wonu na! 2Wo ni ma iko den-sɔrɔn-sannu susun-sɔgɛ si minnu bira tuma-wo-tuma. Kin-yi-sɛnimɛ-sɔgɛ ni male bira wo nya na le. Woletɔ wo tenbi wo susunna, wola dɛnkɛninyɛ si to koloyala. 3Ado iko a sɛbɛnɛ Allala kitabu rɔ nya min ko, “Wole nyɛrɛ ara ban Marita nyimayɛ ragbɛla.” 4Wo na Mari ma, Allata kuru-nimɛ kɔni, mɔgɛnu ya anu ban min na nun. Anu ma a lɔn fenfen na kɔnɔ a yabɔnɛ Alla bolo bawo a gbiliyanɛ Alla ya la. 5Wo ni wo nyɛrɛ yira iko kuru-nimɛnu alako wole nyɛrɛ ni ma Allala bon-sɛnimɛ dandan la. Wo si wɔlɛ kɛ bɔn wo la ka ma saraka-masɔla-sɛnimɛnu na. Wo si saraka-sɛnimɛnu bɔ min si Alla hɛnɛ Yisa Kirasiti baraka rɔ. 6Ado a sɛbɛnɛ Allala kitabu rɔ ko, “N bara sɛbɛna-kuru-tɔnɔnamɛ yabɔ n bi min sigila Yerusalɛm soe tɔnkɔn rɔ, mɔgɔ wo mɔgɔ wa dɛnkɛninya a ma, wo ti baya mumɛ!” 7Kuri kɛ gbiliyanɛ wole dɛnkɛninya-mɔgɛnu bolo kati! Kɔnɔ dɛnkɛninyabɛlɛnu ma a lɔn ko, “Bon-sɔlɛnu ya a fɔ kuri min ma ko fen ma, wo le ara ma sɛbɛna-kuru-tɔnɔnamɛ la.” 8A sɛbɛnɛ Allala kitabu kan-tinɛ-do rɔ ko, “Mɔgɔ kin-natugu-kuri le kɛ la. Kuri kɛ si mɔgɛnu nabui.” Anu ya anu kian latugu bawo anu ma la Allala kumɛ la. Ado Alla sako le wo la anu ye nun. 9Kɔnɔ sibolo yabɔnɛ le wole la, Mansɛla saraka masɔla yabɔnɛnu kɔni. Wo mara sibolo-sɛnimɛ la anubɛ Alla nyɛrɛta mɔgɛnu. Wo yabɔnɛ ka Allala kabana-ko-wɔlɛnu fɔ bɛɛ ye. Alla le ya wo kele ka wo bɔ pinpi rɔ ka wo ladon ata wan-makawanɛ rɔ 10Fɔlɔ nun, Allala mɔgɔ ma wo la kɔnɔ kaka, wo ara ma ata mɔgɛnu na. Fɔlɔ nun, wo ma Allala kinikinɛ lɔn kɔnɔ kaka, wo ara ala kinikinɛ sɔrɔn. 11Nba, n diyana-mɔgɛnu, sundan anubɛ kɛlɛ-kɔrɔ-maburilɛ ye wole min na duninya kɛ rɔ, n bi wo madiyala ko fɛrɛ-bɔnku-nata min bi mɔgɔ niyi kɛlɛla tuma-wo-tuma, wo kana sɔn wo ni wo nɔ. 12Wo ni wo kɛ-nya-nyimɛ yira Alla-batobɛlɛnu na. Woletɔ anu tenbi wo maburila tumɛ min ko ko-yogoma-kɛlɛ le wole la, anu si wola kɛwɔli-nyimɛnu yen. Ado Alla wa na lunyɛ min, anu si a tanto tele wo rɔ. 13Ka a tɛgɛ Mari ma, wo ni sɔnnaya wola kun tiginu ye, a mara a nyamanɛ-kun-tigi-ba la wo, 14a mara a sigisɔn-mansa la wo. Alla ara wonu sɔ alako anu ni ko-yogoma-kɛlɛnu tɔrɔ anubɛ ka ko-nyima-kɛlɛnu matɔgɔ. 15Ado Alla sako le wo la. A ye a fɛ, wo ni yuwaya-kuma-fɔlɛnu dɛ lakiri wola ko-nyimɛnu na. 16Mɔgɔ hɔrɔyanɛ le wole la kɔnɔ wo kana wola ko-yogomɛnu dogon wola hɔrɔyɛ fɛ. Wo ni ma yɔɔnnu na Alla ye. 17Wo ni mɔgɛ bɛɛ gbiliya. Wo ni wo ta-nyɔgɛ dɛnkɛninya-mɔgɛnu keni. Wo ni kilan Alla la ka nyamani-tigi gbiliya. 18Wole yɔɔnnu, wo ni sɔnnaya wo tiginu ye ka anu gbiliya nya bɛɛ ma. Wo kana sɔnnaya a nyimɛnu anubɛ a dinyanɛnu dɔrɔn ma kɔnɔ a yogomɛnu fanan. 19Wo ye tɔrɔyɛ min sɔrɔnna iko telenbɛlɛnu, ni wo ya wo munyu wo kɔrɔ Alla sako fɛ, a si ata duwɛ layigi wo kuma. 20Wo wa ko-yogomɛ kɛ tumɛ min, anu ni wo gbesi, ni wo ya wo munyu wo kɔrɔ, gbiliyɛ mintan bi wo rɔ? Kɔnɔ ni wo tɔrɔta wola ko-nyimɛla ko la, wo wa wo munyu wo kɔrɔ, wo si Allala duwɛ sɔrɔn wo rɔ. 21Alla ya wo kele wo le ma. Kirasiti nyɛrɛ tɔrɔta wo ye ka misalɛ to wo bolo alako wo ni bila a kin-gbɛ fɛ. 22A ma hakɛ woo kɛ! A ma foninya woo fɔ mumɛ! 23Anu ya a lafɛya tumɛ min, a ma atɛ lasɛgi ka anu fanan nafɛya. A tɔrɔta tumɛ min, a ma a kɔnkɔn fɔ ka a yigi sa Alla rɔ, bɛɛta kiti-tɛgɛla-latelennɛ kɔni. 24Male ya hakɛ min bɛɛ kɛ, Kirasiti nyɛrɛ ya wo dunɛ bi a nyɛrɛ-fɛrɛ-bɔnkɛ rɔ kɔlɔma ma alako ma ni hakɛ boloka ka ko-telennɛ kɛ. Ala bosa-gbɛ le ya a ma, ma ara kɛndɛyɛ sɔrɔn. 25Wo mani de nun iko sagɛ minnu tanɛ anu kun fɛ kɔnɔ wo ara sɛgi gbɛ kaka alako wo si bila Saga-Fɛ-Biralɛ fɛ nya min, wo niyi Kandannɛ kɔni.

will be added

X\