1 Yɔni 4

1N diyana-mɔgɛnu, mɔgɛ min ko Allata Ni Sɛnimɛ ye a bolo, wo kana la wo bɛɛ la fɔ ka a kɔrɔbɔ. Wo ni wo ma alako niyi min bi a bolo, wo ni a lɔn ni wo bɔnɛ Alla le bolo. Wo ni wo ma bawo foninya-nɛbi-siyaman bara wuli kan bɛɛ rɔ. 2Wo si a lɔn wo le fɛ ni Allatalata Niyi le a fɛ -- min bɛɛ si a lawasa a dɛ la ko Yisa Kirasiti le hadama dan la, Allala Niyi ye wo tigi bolo. 3Kɔnɔ ka a fɔ ko Yisa Kirasiti mara hadama dan la, ni min si wo masɔsɔ, Allala Niyi sa wo yisi rɔ. Niyi min bi mɔgɛ wo rɔ, wo bɔnɛ Kirasiti-yogo-finma-wɛ le bolo. Ado wo ara a lamɔɛn nun ko a yogo-finma-wɛ wo ye nala. Nba, kaka a ara na duninya rɔ. 4N diyana-dannu, Allatɛ le wole la. Wo ara foninya-nɛbi wonu nɔ bawo ata Ni Sɛnimɛ min bi wole rɔ, wo sɛnbɛ kolo doinuta niyi ko, duninyatɛ ye minnu na kɔni. 5Duninyatɛ ye nɛbi wonu na min kɛ, anu bi duninya-koenu fɔla. Woletɔ duninyata mɔgɛnu bi anu tole masɔla anu na. 6Kɔnɔ Allatɛ le male la. Ma si dan-nafarɛ lɔn tonya-Niyi anubɛ foninya-niyi tɛma kɛ le fɛ -- min ya Alla lɔn, wo si a tole masɔ male la. Allata ma min na, wo ti a tole masɔ ma la. 7N diyana-mɔgɛnu, ma ni ma nyɔgɔn keni bawo keninteyɛ bɔnɛ Alla le bolo. Keninteyɛ ye min bolo, Allala dan le wo tigi la. A ya Alla lɔn. 8Keninteya sa min bolo, wo tigi ma Alla lɔn bawo Alla le keninteyɛ la. 9Alla ya ala keninteyɛ yira ma la kɛ le fɛ ko a ya ala den kelen pe lana duninya rɔ alako ma ni nimayɛ sɔrɔn a fɛ. 10Keninteya-bɛrɛ le kɛ la -- ka a fɔ ko ma ya Alla keni, wo ma, fɔ ko ale ya male keni. A ya ala dan, Yisa lana alako a ni ma sarakɛ la min ya mala hakɛ makoto. 11N diyana-mɔgɛnu, ni Alla ara male keni wo nya le, a fisa, male fanan ni ma nyɔgɔn keni wona! 12Mɔgɔ ma Alla yen fɔlɔn. Kɔnɔ ni ma ya ma nyɔgɔn keni, Alla ara sigi ma yisi rɔ. Ala keninteyɛ ara kanbali male wara la. 13A ara a Niyi di ma ma min kɛ, ma ya a lɔn ko male ye Alla rɔ, Alla ye male rɔ. 14Ma ara a yen ka a fɔ doinu ye ko ma Fa Alla ara ala dan, Yisa lana alako a ni ma duninya kisilɛ la. 15Min si a lawasa a dɛ la ko Yisa, Allala dan le, Alla ye wo tigi rɔ, ado wo ye Alla rɔ. 16Male nyɛrɛ ya keninteyɛ wo lɔn min bi Alla bolo male ye. Ado ma lanɛ keninteyɛ wo la gben! Alla le keninteyɛ la. Min tonɛ keninteyɛ rɔ, wo tigi ye Alla rɔ, Alla ye ale fanan tɔ. 17Ma si a lɔn kɛ le fɛ ko ni Allata keninteya-kanbalinɛ ye male rɔ, ado ni ma sigi-bole duninya kɛ rɔ wonubɛ Kirasititɛ, kelen de, ma ti kilan kiti-tɛgɛ-lunyɛ ma. 18Kilan ko sa keninteyɛ rɔ mumɛ! Allata keninteya-kanbalinɛ si kilan bɔ ma rɔ. Woletɔ kilan ye min tɔ, keninteya-kanbalini sa wo tigi rɔ bawo kilan-koe tugunnɛ tɔrɔyɛ le la. 19Ma si ma nyɔgɔn keni bawo Alla fɔlɔn ya male keni. 20Ni mɔgɛ ko a ara Alla keni, hali wo, a na kelen nyɔgɛla ko lamaranɛ a yisi rɔ, foninya-fɔlɛ le wo tigi la. Ma ara ma na kelen nyɔgɛ min yen, ni ma ma wo keni, Alla don, ma ma min yen bɛ? Ma si a fɔ kama ko ma ye wo kenina? 21Kirasiti ya tɔn kɛ di ma ma -- a ko min bi Alla kenina fɔ wo ni a na kelen nyɔgɛ keni fanan.

will be added

X\