1 Kɔrɛnti 9

1Hɔrɔ ma nde la, wa? Kilaya ma nde la, wa? Ado nde nyɛrɛ ya Mari Yisa yen n yɛ la. Nta wɔli-belebele Mari ye, wo le ma a ma, wo mara dɛnkɛninya mɔgɛ la? 2Hali donu ma n lɔn kilayɛ la kɔnɔ wole nyɛrɛ ya n lɔn! Wo ara dɛnkɛninya Mari ma min kɛ, wo ara a yira ko kilayɛ le nde la. 3Mɔgɛnu ba n tasɛ, n si n fɛka anu ye ka le. 4A bɛnta mɔgɛnu ni mabɛ Banabasi fanda bawo Marita wɔli kɛlɛ le male la. 5Ni a diyara n ye, nde fanan si dɛnkɛninya-musi do furu ka ta wo la n bolo nna tagama kɛnu tɔ iko kilayɛ donu bi a mala nya min. Ado Pita anubɛ Mari na kelen nyɔgɛnu bi wo le mala. Yoe ye male fanan bolo ka wo ma. 6Mabɛ Banabasi dɔrɔn de si wɔlɛ kɛ ma balula ko la, wa? 7Yon bara a lamɔɛn ko kɛlɛ dan ye a nyɛrɛta balu sarala? Nako-tigi don, wo ti a nyɛrɛta ki-fen-gbɔɛnu dɔn, wa? Ninki-tigi ti nonɛ min ka bɔ ata ninkinu tɔ, wa? 8N sa kɛ fɔla hadama denta hɛnkili la bawo a sɛbɛnɛ tɔn kitabu rɔ wo nya na le fanan. 9Ma ara a karan Nɛbi Musala tɔn rɔ ko, “Sara-ninki tenbi fui-fan tɛnna, i kana a dɛ makiri.” Wo ma a yen Alla hɔnnɛ sara-ninkinu na nya min? 10Nɛbi Musa ma kɛ fɔ ka a tɛgɛ male ma, wa? Ɔnde, kɛ sɛbɛnɛ malela ko la, yɔ! Dugu-wɔrɔlɛ anubɛ fui-fen-tɛgɛlɛ, wonu bi wɔlɛ kɛnu kɛla bawo anu yili ye a ma ko anu si fan sɔrɔn a rɔ. 11Male ara Allata sugi fui wo tɛma. Ni ma ya ma balu tɛgɛ wo tɛma, ko-yogomɛ le wo la, wa? 12Ni yoe ye donu bolo ka anutɛ sɔrɔn wo kuma, male don? Yo sa male bolo min kolo wonutɛ ko, wa? Kɔnɔ male ma yoe wo fenfen bira. Ma ya ma munyu koe bɛɛ kɔrɔ alako bɛɛ si Kirasitita kibara-nyimɛ lamɔɛn nya min. 13Wo ya a lɔn serr, ko minnu bi wɔlila Alla Bato Bɔn la, wonu si anu niyi sɔrɔn Alla Bato Bɔn wo le la. Ado minnu bi sarakɛnu bɔla saraka mintan tinɛ kuma, wonu si anutɛ sɔrɔn sarakɛ wonu denu tɔ. 14Mari ara a latɛgɛ wo nya na le fanan. Minnu bi kibara-nyimɛ lakela, wonu ni anu beli-fan sɔrɔn wo fɛ. 15Kɔnɔ nde ma yoe wo fenfen bi. Ado n sa kɛ sɛbɛla fanan kaka alako n ni yoe wonu bi n nyɛrɛ ye. Yanni n ni fara n nyɛrɛ matɔgɔla nna sarabirabɛlitayɛla ko la, n faganɛ fisa wo ko! 16N bi kibara-nyimɛ lakela min kɛ, yo-wo-yo sa n bolo ka n nyɛrɛ matɔgɔ wola ko la bawo Alla le ya a fɔ n ye ko n ni wo ma. Ado ni n ma kibara-nyimɛ lake, a si gbɛlɛya n kuma gben! 17Ni n bi wɔlɛ kɛ kɛla n nyɛrɛ sako la, n yili ye n sara koe le ma worɔ. Kɔnɔ bawo Alla le ya wɔlɛ wo don n bolo, ni n ma sarɛ sɔrɔn, n bara sɔn wo ma. 18N si sarɛ nyuman sɔrɔn worɔ? Ka kibara-nyimɛ lake sarabirabɛlitayɛ la, nta sarɛ le wo la. N ya wɔlɛ min bɛɛ kɛ kibara-nyimɛla ko la, n ma n yoe fenfen nabɔ gbɛ ma worɔ. 19Hɔrɛ le nde la, mɔgɛla yɔɔn ma n na. Kɔnɔ n bara n nyɛrɛ ma bɛɛta yɔɔn la alako n ni mɔgɔ siyaman sɔrɔn Yisa ye. 20N tenbi sereyɛ bɔla Yahudiyanu ye, n si n nyɛrɛ ma iko Yahudiya alako n ni Yahudiyanu masɔrɔn. Minnu bi Nɛbi Musata tɔn kɔrɔ, n tenbi sereyɛ bɔla wonu ye, hali nde nyɛrɛ sa tɔn kɔrɔ, n si n nyɛrɛ mara iko n bi tɔn kɔrɔ le alako n ni wo donu masɔrɔn. 21N tenbi sibolo gbɛrɛnu tɛma, n si n nyɛrɛ ma iko n sa Yahudiyanuta tɔnnu kɔrɔ lefan alako n ni sibolo gbɛrɛnu masɔrɔn nya min bawo wonu sa anuna tɔnnu kɔrɔ. Ka a fɔ ko n sa Allala tɔn birala, wo ma de! Ado n bi Kirasitita tɔn le kɔrɔ, yɔ! 22Minnu sɔndɔmɛ rafaganɛ, fɔ n ni n nyɛrɛ ma iko anu denu fanan alako n ni wonu masɔrɔn nya min. Fɔ ni n mara fan bɛɛ la mɔgɛ bɛɛ ye alako n ni donu kisi anu tɔ. 23N bi wo bɛɛ kɛla kibara-nyimɛ lela ko la alako mabɛ wonu ni barayi sɔrɔn ma nyɔgɔn fɛ. 24Wo ya a lɔn serr, ko hali buri-kɛlɛ siyaman si anu buri kɔnɔ mɔgɛ kelen pe le si sarɛ wo sɔrɔn. Nba, wa wo buri wo nya alako wo ni wota sarɛ sɔrɔn. 25Min si a raya buri-kɛ rɔ, wo si a nyɛrɛ ragbɛlɛya a kilɛ fɛ. A ye wo mala alako a ni sarɛ sɔrɔn. Kɔnɔ sara su wo ti mɛ. Male ye a kɛla alako ma ni sara su wo sɔrɔn min si to ma bolo tɛban! 26Wo le ya a to, n bi n burila ha n ni ke n dan ma. N manɛ iko kei minnu bi anu nyɔgɔn tugula minnu ti foo anu ta-nyɔgɛ la. 27N bi n nyɛrɛ fɛrɛ-bɔnkɛ ragbɛlɛyala ka n madegen feu! N bi wo mala alako n ba kawandili bɔ donu ye tumɛ min, tɔ-a-la, anu kana na ntɛ bɔ buri-kɛ ma.

will be added

X\