1 Kɔrɛnti 6

1Ni sɔsɔlɛ taranta minnubɛ a na kelen nyɔgɔn tɛma, a ma bɛn hali ko a ni ta wo la Alla-lɔnbɛlɛnuna kiti tɛgɛ tinɛ. Yanni a ni wo ma, a fisa, Allata mɔgɛnu ni kiti wo ban anu nyɔgɔn tɛma. 2Wo ma a lɔn ba, ko Allata mɔgɛnu si duninya kiti? Nba, ni wole si na duninya kiti, wo ti ke kiti dɔgɔmɛ kɛnu tɛgɛla, wa? 3Ado wo ma a lɔn ba, ko male si melikanu fanan kiti kumanato duninya kɛ koenu? 4Nba, ni wo kuma sifanu nara, nfenna wo si ta wonu sa mɔgɛnu kɔrɔ minnuta sa chɔchi koe rɔ. 5Miliya-koe le wo la. Hɛnkilima kelen bɛrɛn sa wo tɛma min si ke sɔsɔlɛ banna wole dɛnkɛninya-mɔgɛnu tɛma, wa? 6Kɔnɔ dɛnkɛninya-mɔgɛnu bi anu ta-nyɔgɛnu samasila alako Alla-lɔnbɛlɛnu ni anuna kiti tɛgɛ. Wo ma bɛn mumɛ! 7Wo ye wola kitinu sala duninya-kiti-tɛgɛlɛnu kɔrɔ min kɛ, wo ara a yira wo la ko dɛnkɛninyabɛlɛnu bara wo nɔ feu! Hali anu bagara wo ma, wo ma fisa? Nfenna wo ti sɔn anu ni wo kensunya? 8Kɔnɔ wo nyɛrɛ ye ko-yogomɛ kɛla wo ta-nyɔgɔn dɛnkɛninya-mɔgɛnu na. Wo nyɛrɛ ye anu kensunyala. Ado wo ta-nyɔgɛ dɛnkɛninya-mɔgɛnu denu bi kɛnu na. 9Wo ya a lɔn serr, ko mɔgɔ-yogomɛnu ti Allala mansayɛ sɔrɔn. Wo kana wo nyɛrɛ mayuwaya. Sɔn-yogoma-tiginunu wo, bɛsi-kɔlɛnu wo, yɛlannu wo, minnu bi anu ta-nyɔgɔ-keinu makila wo, minnu bi anu ta-nyɔgɔ-musinu makila wo, 10kankannu wo, wasabɛlɛnu wo, baan-minnɛnu wo, nafiginu wo, minnu bi buila mɔgɛnu ma wo, wonu fenfen ti Allala mansayɛ sɔrɔn. 11Ado wo donu bi wo nya na le nun fɔlɔ. Kɔnɔ ma Mari Yisa Kirasiti anubɛ Allata Ni Sɛnimɛ ara wo sɛninya ka wo ma Allatɛ la ka wo latelen Alla ye. 12Do si a fɔ ko, “N bi nyinina min ma, tɔn sa n kuma wo ma tinɛ.” Tonyɛ le kɔnɔ koe bɛɛ ti ma munanfaga. Nde bɛrɛn si a fɔ ko, “N bi nyinina min ma, tɔn sa n kuma wo ma tinɛ.” Kɔnɔ nde ti ma yɔɔn la fenfen kɔrɔ. 13Dogbɛrɛ si a fɔ ko, “Buyi ye dɔn-fanla ko la. Dɔn-fan fanan ye buyila ko la.” Tonyɛ le kɔnɔ wo filɛ bɛɛ si ban Alla bolo. Kɔnɔ fɛrɛ-bɔnkɛ ma dan yɛlɛnyɛla ko la fɔ ka wɔli Mari ye. Ado Mari le ye ko-nyinyala fɛrɛ-bɔnkɛ ma. 14Alla min ya Mari lawuli ka bɔ furinu tɛma, a si male fanan nawuli sɛnbɛ kelan wo le rɔ. 15Wole ya a lɔn ko Kirasiti fɛrɛ-bɔnkɛ-tɔnkɔ-do le wole la, wa? A ye kama? N si Kirasiti fɛrɛ-bɔnkɛ-tɔnkɔ-do bi ka a tugun yɛlan-fɛrɛ-bɔnkɛ la, wa? Alamɛ ma kisira wo ma! 16Wo ma a lɔn ba ko kei min bara a fɛrɛ-bɔnkɛ tugun yɛlan la, anubɛ wo ma ma kelen na? Allala kitabu ya a lagbɛ ko, “Anu filɛ si ma fɛrɛ-bɔnku kelen na, wa?” 17Kɔnɔ ni min si a nyɛrɛ tugun Mari la, wonubɛ Mari kelen de. 18Wa wo buri yɛlɛnyɛ kɔrɔ! Mɔgɛ si hakɛ gbɛrɛ min bɛɛ kɛ, wo bɛɛ ti a fɛrɛ-bɔnkɛ tɔrɔ iko kɛ. Mɔgɛ wa yɛlɛnyɛ kɛ, wo ye hakɛ su kɛla min si a nyɛrɛ fɛrɛ-bɔnkɛ tɔrɔ. 19Wo ma a lɔn ba ko wo fɛrɛ-bɔnkɛ, Allata Ni Sɛnimɛta bato bɔn le? Alla ya ata Ni Sɛnimɛ min di wo ma, wo siginɛ wole le tɔ. Ado wo sa wo nyɛrɛ bolo. Allatɛ le wole la. 20A ya wo san ka wo sɔnkɛ di. Woletɔ wo ni Alla gbiliya wo fɛrɛ-bɔnkɛ la.

will be added

X\