1 Kɔrɛnti 4

1Wo ni male lɔn Kirasitita wɔli-kɛla-gbansan la Allala gbundu koe kerifanɛ minnu na. 2Ado fan kerifanɛ min na, a bɛnta, wo ni lanayɛ kɛ a tigi ye. 3Woletɔ ka a fɔ ko lanaya-tigi ma n na, ni wole ya n kiti wo, ni hadama-den-gbɛrɛ ya n kiti wo, fen ma wo la nde yala. Ado nde ti n nyɛrɛ yiliki lefan! 4N sɔndɔmɛ gbɛnɛ feu! Kɔnɔ wo dɔrɔn ti a yira ko sɔn sa n na bawo Mari le n kitila. 5Woletɔ wo kana mɔgɔ wo mɔgɔ kiti yanni a wati ni ke. Mari wa na, kiti laban fɔla wati wo le. A si mɔgɛnu miriya anubɛ pinpirɔ-koenu nabɔ gbɛ rɔ. Nba, wo le si a ma, bɛɛ ni matɔgɔlɛ sɔrɔn Alla bolo iko a bɛnnɛ nya min. 6N na kelen nyɔgɛnu, n bara koe kɛ bɛɛ sanka mabɛ Apalasi ma wolela ko la. N bara male ma misalɛ la alako wo ni tili wo kɔrɛ lɔn mɔgɛnu bi min tɛgɛla ko, “Mɔgɔ kana tenbi kumɛ-dan kun na.” Wo fenfen kana wasi mɔgɛ do la ka do lafɛya. 7Yon ya wo lafisaya donu ko? Fan min bɛɛ ye wo bolo, Alla le ma wonu di wo ma, wa? Nba, nfenna wo ye wo nyɛrɛ matɔgɔla iko min bi wo bolo, ale le ma wo di wo ma, wa? 8Wole miri ko wo makoe ye fan min bɛɛ la, wo ara ban wonu sɔrɔnna? Wo ara ban mala nɔnfulu-tiginu na, wa? Ma sa wo dafɛ tumɛ min, wo ara wo nyɛrɛ ma iko mansɛnu. Kɔnɔ alamɛ wo mara mansɛnu na nun alako male fanan ni mansayɛ kɛ wo fɛ. 9Ado nde yala, Alla ara sɔ-tina-dɔgɔmɛ di male kilayɛnu ma iko mɔgɔ min kakɛn ka faga. Male manyimanɛ duninya mumɛ bɛɛ yala, a melika wo, a mɔgɔni-gbu wo. 10Kuntan le male la Kirasitila ko la kɔnɔ hɛnkili-bɔrɔ-tigi le wole la Kirasiti rɔ! Sɛnbɛ sa male bolo kɔnɔ sɛnbɛ ye wole bolo duk! Male lafɛyanɛ kɔnɔ wole gbiliyanɛ! 11Ado ha ka, kɔnkɛ ye ma la, ma kan lagbalanɛ fanan. Kura-korenu bi ma ma. Mɔgɛnu bi ma dɛnu tatiila. Ma ye yilan-yilanna tolon! 12Ma ye boloma-wɔlɛnu kɛla ka ma nyɛrɛ makoenu nyinya. Anu ba ma danka, male si duwa anu ye. Anu ba a lagbɛlɛya ma kuma, ma si ma munyu. 13Anu ba ma manyini, male si anu yabi kuma-nyimɛ la. Fenfen ma male la fɔ yefe-gbalɛ duninya kɛ rɔ. Sundu-kunyɛ le male la ha kaka! 14N bara min sɛbɛ wo ma kɛ la, n ma a sɛbɛ alako ka wo lamiliya kɔnɔ ka wo makawandi iko n diyana-dannu. 15Ado hali karan-mɔgɔ waga yirika ye wo bolo Kirasiti rɔ, fa kelen de ye wo bolo. N bara kibara-nyimɛ lana wo ma min kɛ, n bara ma wo fa la Kirasiti Yisa rɔ wo nya le. 16Woletɔ n bi wo madiyala ko wo ni wo sanka nde ma. 17Ka a tɛgɛ wo ma, n bi Timoti latala wo ma. N diyana-dan le ale la Mari rɔ. Ado n lara a la feu! N bi ni-kura kilayɛ minnu nakela chɔchi bɛɛ rɔ kan-bo-kan Kirasiti Yisa rɔ, a si wo labila wo bɛɛ la. 18Wo donu bara wasi bawo wo ye wo mirila ko n sa nala kela wo ma. 19Kɔnɔ ni Mari sɔnta, a sa mɛla tun, n bi nala kela wo ma. Nba, mɔgɔ-wasinɛ wonu si ke min kɛla worɔ, nde nyɛrɛ si a lɔn ni anu bi da-rabu-tugi le la, ka, ni sɛnbɛ-bɛrɛ le anu bolo! 20Ado da-rabu-tugi ma Allala mansayɛ la fɔ sɛnbɛ. 21Wo ye nyinina nfen ma? N ni na bosɛ la n bolo wo wara, ka, n ni na keninteyɛ anubɛ diyanayɛ le la wo wara?

will be added

X\