1 Kɔrɛnti 3

1N na kelen nyɔgɛnu, n ma ke kumala wo ye iko n si kuma wonu ye minnu bi Allata Ni Sɛnimɛ kɔrɔ nya min. Fɔ n ni kuma wo ye iko mɔgɛ min bilanɛ duninya kɛ fɛ anubɛ den-pulannu dɛnkɛninyɛ rɔ. 2N ya kin-yi di wo ma bawo wo ma ke bɛ dɔn-fen-bɛrɛ-dɔn ma nun. Hali kaka, wo ti ke a dɔnna 3bawo wo miriya anubɛ duninya-mɔgɛnutɛ, kelen de! Ha ka, keliyɛ anubɛ sɔsɔlɛ ye wo nyɔgɔn tɛma. Wonu denu si a yira ma la ko wo ye ko ladanna iko dɛnkɛninyabɛlɛnu bi a mala nya min. 4Do wa a fɔ ko, “Nde ye Pɔli le fɛ,” do ko, “Nde ye Apalasi le fɛ,” wo wa wo ma, wo sa ko-ladanna worɔ iko duninya-mɔgɛnu, wa? 5Nfen bi a mala, mabɛ Apalasi kolo wo yala? Allala wɔli kɛlɛ le male la dɔrɔn. Wo dɛnkɛninyara Yisa ma tumɛ min, ma ya wo dɛnbɛ. Mari ya wɔlɛ min di ma kelen-kelennamɛ-bɛɛ ma, ma ye wɔlɛ wo le kɛ tinɛ tolon! 6Nde le ya sugi fui, Apalasi ya a yi sa kɔnɔ Alla le ya a ma, a fɛrɛnta ka sabati. 7A fuila wo, a yi-kɛla wo, fen ma wonu na. Alla min bi a mala, fui-fan ni fɛrɛn ka sabati, wo le kolo. 8A fuila wo, a yi-kɛla wo, dan-nafara woo sa wonu tɛma. Alla si wonu barayi iko anu kelen-kelennamɛ-bɛɛ wɔlita nya min. 9Allata wɔli-kɛ-nyɔgɛnu denu bi ma dama la. Allata sɛnɛ le wole la. Ado Allata bɔn le wo la fanan. 10Allata hinɛ fɛ, n bara nna wɔlɛ kɛ iko bon-sɔla-hɛnkilimɛ. N ya bɔn wo kurukɛ, wo kɔma, mɔgɔ gbɛrɛ ya a dagɛ lawuli. Kɔnɔ mɔgɔ kelen-kelennamɛ-bɛɛ ni a ma a fɛrɛma bɔn wo sɔ tinɛ. 11Ado Alla ara ban Kirasiti Yisa kelen pe mala bɔn wo kurukɛ la. Kurukɛ gbɛrɛ ti ke kɛla tun ale kɔma. 12Do si sɛnɛ bi, ni wo ma, wodi-gbɛ, ni wo ma, kuru-da-gbɛlɛ ka a sɔ bon-kurukɛnɛ wo kuma. Kɔnɔ donu si kɔlɔma bi, ni wo ma, kalɛ, ni wo ma, binyɛ. 13Kɔnɔ Kirasiti wa na tumɛ min, mɔgɔ kelen-kelennamɛ-bɛɛta wɔli-kɛ-gbɛ si bɔ gbɛ rɔ bawo tɛ si mɔgɛ bɛɛta wɔli-kɛ-gbɛ labɔ gbɛ rɔ wulɔn tele. Tɛ si a kɔrɔbɔ ka a mɔlɔn labɔ gbɛ rɔ. 14Ni bɔn wo kananta, wo sɔlɛ si ata barayi sɔrɔn. 15Kɔnɔ ni minta wɔli-kɛ-gbɛ mintanta, wo tigi si bɔnɔ a rɔ worɔ. Ale nyɛrɛ si kisi kɔnɔ a si ma iko anu bara a labɔ tɛ rɔ le. 16Wo ya a lɔn ko Alla Bato Bɔn le wole la serr! Ado wo ya a lɔn fanan ko Allata Ni Sɛnimɛ siginɛ wo rɔ! 17Woletɔ ni mɔgɔ wo mɔgɔ ya Alla Bato Bɔn latinya, Alla si wo tigi kasara pɔ! A ye wo nya bawo Alla Bato Bɔn sɛninyani de, ado ata Bato Bɔn le wole la. 18Mɔgɔ wo mɔgɔ kana a nyɛrɛ yanfa. Ni min mirinɛ ko hɛnkilimɛ le ale la duninya kɛ rɔ, a fisa, duninya ni a lɔn kuntan la alako a si hɛnkili-bɛrɛ sɔrɔn nya-min. 19Duninya kɛ ya min lɔn hɛnkilimayɛ la, kuntanyɛ le wo la Alla yala. Iko a sɛbɛnɛ Allala kitabu rɔ nya min ko, “Alla si hɛnkilimɛnu bira anu nyɛrɛta halliyɛ rɔ.” 20A sɛbɛnɛ kan tinɛ do rɔ tun Allala kitabu rɔ ko, “Hɛnkilimɛnu miriya Mari yala, ko-fuyi le wo la.” 21Woletɔ mɔgɔ wo mɔgɔ kana a nyɛrɛ wasi ko a ye kun tigi do le fɛ bawo wotɛ le fan damasi la. 22Nde, Pɔli wo, Apalasi wo, Pita wo, duninya kɛ wo, niyi wo, sayɛ wo, fan minnu bi nyɔ kaka wo, fan minnu bi sina wo, wotɛ le wo bɛɛ la. 23Ado Kirasititɛ le wole fanan na, Allatɛ le Kirasiti la.

will be added

X\