1 Kɔrɛnti 2

1N na kelen nyɔgɛnu, n nara wo wara tumɛ min ka Allata gbundu koe lagbɛ wo ye, n ma nna karan-bɛ anubɛ nna lɔnni-wɛ yira wo la. 2N ya a latɛgɛ n yisi rɔ ko n kana wo karan ko-wo-ko la fɔ Yisa Kirasiti, katarala a faga koe ma kɔlɔma ma. 3Ado n bi wo tɛma tumɛ min, n sɛnbɛ sa nun. N fɛrɛ bɛɛ ye yɛrɛyɛrɛnna kilan bolo. 4N ma wo makawandi halliya-kumɛnu anubɛ hadama-den-hɛnkilimayɛ fɛ. N ya wo ma Allala Ni Sɛnimɛ sɛnbɛ-mayirɛ dɔrɔn de fɛ. 5N ya wo ma alako wola dɛnkɛninyɛ kana to mɔgɔya-hɛnkilimayɛ kuma fɔ Allala sɛnbɛ. 6Hali wo, wole minnu lanɛ Yisa la gben, n bi hɛnkili-su-do labɔla wo ye, duninya-hɛnkili ma min na. Duninya kɛ kun tigi minnu bi nala tenbila, hɛnkili kɛ sa iko anutɛ ye nya min. 7Kɔnɔ n bi hɛnkili min nabɔla, Allala gbundu-ko-hɛnkili le wo la, min dogonnɛ mɔgɛnu ma kɔrɔma la. Ado yanni duninya ni dan, Alla ara ban a latɛgɛla nun ko hɛnkili wo si gbiliyɛ lana ma ma. 8Duninya kɛ kun-tigi-fenfen ma hɛnkili wo nya-yen. Gbiliyɛ ye Mari min bolo, ni anu ya wo lɔn nun, anu ti wo gbangban kɔlɔma ma nun. 9Kɔnɔ hali wo, iko a sɛbɛnɛ Allala kitabu rɔ nya min, “Mɔgɛ ma min yen bɛ wo, a ma min namɔɛn bɛ wo, hali ka a miri min ma wo, Alla ara wo le rabɛn wonu ye a keninɛ minnu bolo.” 10Alla ara male lalɔn ala gbundu koe ma ata Ni Sɛnimɛ baraka rɔ. Ado ata Ni Sɛnimɛ ye koe bɛɛ nya-nyinina a kilɛ fɛ, hali Allata ko-dogonnɛnu. 11I sere dɔrɔn de ya a lɔn min bi i burɔ. Allata Ni Sɛnimɛ fanan ya Alla fonde bɛɛ lɔn wo nya le. 12Ado Alla ya tonyɛ min bɛɛ di ma ma, ma ya wo nya-yen bawo Alla ya a nyɛrɛta Niyi di ma ma. A ma duninya kɛ niyi di ma ma. 13Ale ata Ni Sɛnimɛ ye wole min bolo, ma tenbi wo karanna, ma ti kuma wo ye iko hadama dannu karannɛ nya min. Allata Ni Sɛnimɛ ye ma karanna kumɛ minnu na, ma si wo karan wonu denu na. 14Kɔnɔ ata Ni Sɛnimɛ sa mɔgɛ minnu bolo, wonu ti ke karan wonu sɔrɔnna bawo tonyɛ wo dinɛ wonu ma ale bolo. Ado a ti ke wonu nya-yenna lefan! Yuwaya-koe le wonu na ale yala bawo tonyɛ wonu na si kɔrɔsi Allala Ni Sɛnimɛ baraka rɔ. 15Ata Ni Sɛnimɛ ye min bolo, wo si ke ka koe bɛɛ lakɔrɔsi kɔnɔ a sa min bolo, wo ti ke hali ale Ni Sɛnima tigi wo lakɔrɔsila. 16Iko a sɛbɛnɛ Allala kitabu rɔ nya min, “Yon ya Mari miriya lɔn? Yon si ke a makawandila?” Kɔnɔ malebɛ Kirasiti, miriya kelen de!

will be added

X\