1 Kɔrɛnti 15

1Nba, n na kelen nyɔgɛnu, n ya kibara-nyimɛ min nake wo ma, n bi a fɛ ka wo hɛnkili bila wo ko. Ado wo ara kibara-nyimɛ wo rabira ka la a la gben! 2Ni wo ya a bira iko n bara wo makawandi nya min nun, wo si kisi kibara-nyimɛ wo fɛ. Kɔnɔ ni wola dɛnkɛninyɛ mara fuyi la, wo si baya. 3N bara sarakanɛ min sɔrɔn, n bara wo latenbi wo ma. Ado ko-belebele-wa le kɛ la ko Kirasiti fagara ma hakɛnuna ko la iko a sɛbɛnɛ Allala kitabu rɔ nya min. 4Anu ya a togon. A lawulita a tele sawa nyɔgɛ ma iko a sɛbɛnɛ Allala kitabu rɔ nya min. 5Yisa bɔra gbɛ rɔ Pita ye. Wo kɔma, a bɔra gbɛ rɔ kilaya mɔgɔ tan-ni-filɛ bɛɛ ye. 6Wo fanan kɔma, a bɔra gbɛ rɔ a gba-fɛ-bilalɛ minnu ye wati kelen tɔ, wonu siya mɔgɔ kɛmɛ loli ko. Ado ha bi, wonu siyaman kɛndɛ kɔnɔ donu bara faga. 7Wo kɔma, a bɔra gbɛ rɔ Yemesi anubɛ kilayɛ bɛɛ ye. 8Tɔ-a-la, a bɔra gbɛ rɔ nde fanan ye. N manɛ iko dan min ma sɔrɔn yona. 9Kilayɛ bɛɛ tenbira nde la. A ma bɛn defan ka n kele ko kilayɛ bawo n ya a lagbɛlɛya Allala chɔchi kuma. 10Kɔnɔ n mara kilayɛ la ka a tɛgɛ Allata hinɛ ma. Ado a ya keninteyɛ min yira n na wo la, wo ma ma fuyi la. N wɔlita bɛrɛkɛ ka tenbi kilayɛ toe bɛɛ la, hali n nyɛrɛla kɛwɔli ma kɔnɔ Allala hinɛ ye wɔlila n tɔ. 11Nba, ni nde le ya kawandili bɔ wo, ni anu denu denu ya a bɔ wo, ma ye kawandili bɔla fen kelen dela ko la. Ado wole dɛnkɛninyanɛ wo le ma. 12Nba, ma ye kawandilɛ kɛ bɔla min kɛ ko Kirasiti la ara wuli ka bɔ furinu tɛma, nfenna wo donu bi a fɔla ko furinu na ti wuli? 13Ni tonyɛ le wo la, wo kɔrɛ le ko Kirasiti la ma wuli worɔ. 14Nba, ni Kirasiti la ma wuli ka bɔ furinu tɛma, kawandili-kun sa ma bolo worɔ. Ado wo dɛnkɛninya-kun sa fanan. 15Min tenbira wo la, ma ara tɔgɛ sa Alla la bawo ma ara a fɔ ko ale le ya Kirasiti lawuli ka bɔ furinu tɛma. Kɔnɔ ni tonyɛ le ko furinu na ti wuli, nba, Alla ma Kirasiti lawuli worɔ. 16Ado ni furinu na ti wuli, nba, Kirasiti la ma wuli worɔ. 17Ni Kirasiti la ma wuli, wola dɛnkɛninyɛ ara ma fuyi la worɔ. Ado ha bi, wo ye wo hakɛ rɔ. 18Wo kɔrɛ le fanan ko minnu bara dɛnkɛninya Kirasiti ma nun ka faga, wonu bara to-a-rɔ. 19Ni ma yigi sanɛ Kirasiti kuma ma tenbi duninya kɛ rɔ ka dan wo ma, nba, kinikinitoe le male la ka tenbi mɔgɛ bɛɛ la duninya kɛ rɔ. 20Kɔnɔ tonyɛ ye min na, Alla ya Kirasiti fɔlɔn nawuli ka bɔ furinu tɛma alako ka a yira ko minnu bɛɛsi ara saya, wonu fanan na si wuli. 21Ado iko mɔgɛnu wulita fagala mɔgɔ kelen hakɛla ko la nya min, Hadama kɔni, furinu na si wuli fanan mɔgɔ kelenna ko la wo nya na le. 22Ado mɔgɛ bɛɛ bɔra ma benba Hadama le rɔ ka faga. Iko wonu bi fagala nya min, minnu bɛɛ ara dɛnkɛninya Kirasiti ma, wo bɛɛ la si wuli wo nya na le ka habadan-nimayɛ sɔrɔn. 23Kɔnɔ Alla si mɔgɔ kelen-kelennamɛ-bɛɛ lawuli a wati-latɛgɛnɛ rɔ. Kirasiti le a fɔlɛ la. Wo kɔma, Kirasiti wa na tun, minnu taranta ale rɔ, wonu si bila a fɛ. 24Ala ban si ke worɔ. Duninya-kun-tiginu wo, nyina-kun-tiginu wo, sɛnbɛ-tiginu wo, Kirasiti si sɛnbɛ sɔrɔn anu dama kuma ka mansayɛ dantɛgɛ a Fa Alla ma. 25Ado a fɛrɛ sa fɔ Kirasiti ni kun-tigiyɛ kɛ ha Alla ni a yoge bɛɛsi ladon a kin kɔrɔ. 26Ma yogo-laban min bi sayɛ la, wo la si to dogbe! 27Ado a sɛbɛnɛ Allala kitabu rɔ ko, “Alla ara fan bɛɛ sa a tontɛ kɔrɔ.” Nba, a ara a gbɛ worɔ ko ka a fɔ ko, “fan bɛɛ,” Alla nyɛrɛ bɔnɛ a ma. Ado Alla nyɛrɛ le ya fan bɛɛ sa Kirasiti tontɛ kɔrɔ! 28Kɔnɔ fan bɛɛ wa don Kirasitila kun-tigiyɛ kɔrɔ tumɛ min, wo kɔma Kirasiti nyɛrɛ, Allala dan kɔni, wo si a sa a fa Alla nyɛrɛ kɔrɔ. Ado Alla ya ala dan sigi fan bɛɛ kun na. A si wo ma alako Alla ni kun-tigiyɛ kɛ kɛ bɛɛ kun na feu! 29Nba, minnu bi batasila alako furinu ni kisi, wonu don? Ni tonyɛ le iko donu bi a fɔla nya min ko Alla ti furinu nawuli, nfenna anu denu bi batasili kɛla furinuna ko la? 30Nba, male don? Ni furinu na ti wuli, nfenna worɔ, tuma-wo-tuma, ma ye ma nyɛrɛ donna gbalo kɛ kɔrɔ wola ko la? 31N na kelen nyɔgɛnu, tele-wo-tele, n bi saya-masibɛ kɔrɔ! Ado n wasinɛ wole Kɔrɛnti kɛnu na ka a tɛgɛ ma Mari Yisa, Allata-Mɔgɔ-Yabɔnɛ ara min ma wo ye. 32Ni n ya mɔgɛnu kɛlɛ Ɛfɛsa soe burɔ minnu manɛ iko “firarɔ-sogenu,” wo si nfen nyinya n ma? Ni Alla ti furinu nawuli, iko anu bi a fɔla nya min, “A fisa, ma ni fen dɔn kɛ ka ma min ka ma nyɛrɛ ladiya bawo ma ye nala fagala le sina.” 33Wo kana sɔn ko mɔgɛnu ni wo yanfa. “Wo bɔ-yogomɛnu si wola kɛ-nya-nyimɛnu tinya.” 34Wo ni wo hɛnkili masɔ ka fara hakɛ la. N ya a fɔ min kɛ ko donu bi wo tɛma, wonu ma Alla lɔn, miliya-koe le wo la. 35Kɔnɔ mɔgɛ do si nyinikalɛ kɛ ko, “Furinu na si wuli kama? Anu si fɛrɛ-bɔnkɛ-su-nyuman sɔrɔn?” 36Bɛɛ ya wo lɔn! I wa sugi ki dugi rɔ tumɛ min, a ti fɛrɛn ni a ma ma iko a ara faga. 37I ye sugi le kila dugi rɔ dɔrɔn! Tumado, a mara sɔsɔ-sugi la, ni wo ma, sugu gbɛrɛ. I ya a kole le ki, i ma a fɛrɛnnɛ ki. 38Alla le ya a lɔn a si sugu-fɛran wonu ma nya min. I ye sugu kelen-kelennamɛ-bɛɛ min kila, wonu si fɛrɛn iko anu sunu bi nya min. 39Nima-fan bɛɛ fɛrɛ ma kɛn. Mɔgɔ-fɛrɛ ye a dan na. Sogetɛ ye a dan na. Konatɛ ye a dan na. Yɛgɛtɛ ye a dan na. 40Dali-fan minnu bi dugu kole kɛ kuma anubɛ minnu bi Arinyɛni tɔ, dan-nafarɛ ye wo bɛɛ tɛma. Bɛɛta kinyɛ ye a dan na. 41Teleta kinyɛ ye nyɔ. Karɛta kinyɛ ye nyɔ. Lolenuta kinyɛnu bi nyɔ. Hali lolenuta kinyɛ fanan faranɛ. 42Alla wa furinu nawuli tumɛ min, wonu fanan si ma wo nya na le. Fɛrɛ-bɔnku-tulutɛ si togon. Alla wa a lawuli tumɛ min, wo tigi si habadan fɛrɛ-bɔnkɛ sɔrɔn min ti tuli dɛɛ! 43Anu ba a togon tumɛ min, a mafɛlɛn ma di, a sɛnbɛ sa. Alla wa a lawuli tumɛ min, a mafɛlɛn si diya, ado a si sɛnbɛ sɔrɔn. 44Anu ba a togon tumɛ min, fɛrɛ-bɔnku-gbansan de! Alla wa a lawuli, ata Ni Sɛnimɛ le ye a marala. Nba, ni fɛrɛ-bɔnkɛtɛ ye nyɔ, ata Ni Sɛnimɛtɛ fanan bi nyɔ wo nya na le. 45Ado a sɛbɛnɛ Allala kitabu rɔ ko, “Alla ya mɔgɔ fɔlɛ min dan, ma benba Hadama kɔni, a ya niyi di wo ma.” Kɔnɔ Yisa min bi Hadama laban la, wo le si niyi di mɔgɛ ma kaka. 46Min si niyi di mɔgɛ ma, wo fɔlɔn ma na fɔ min danta ka bɔ gbangban rɔ, ma benba Hadama kɔni. 47Hadama fɔlɔtɛ danta ka bɔ gbangban rɔ. Hadama fila nyɔgɛ bɔra Arinyɛni tɔ. 48Dugu kole kɛtɛ ye minnu na, wonu mani de iko ale min danta ka bɔ gbangban rɔ. Kɔnɔ Arinyɛnɛtɛ ye minnu na, wonu mani de iko ale min bɔra Arinyɛni tɔ. 49Min danta ka bɔ gbangban rɔ, wola muninyɛ ye male la nya min, ale min bɔra Arinyɛni tɔ, ma si muninya wo la wo nya na le fanan, Kirasiti kɔni. 50N na kelen nyɔgɛnu, n bi min ma, wo le kɛ la. Min danta fɛrɛ anubɛ yele la, wo ti ke Allala mansayɛ sɔrɔnna. Ma fɛrɛ-bɔnku-tulutɛ kɛnu ti to habadan! 51Wo ni wo tole masɔ gbundu koe kɛ la. Ma dama ti faga kɔnɔ buru-laban wa fɛ, ma dama si yɛlɛma tiriya iko ya-makeri kelan. Ado buri wa fɛ tumɛ min, furinu na si wuli ka bagbuyi sɔrɔn min si to tolon! Male min tonɛ ma niyi la, Alla si bagbu-kurɛ di ma ma min si to burubukai! 53A fɛrɛ sa fɔ bagbuyi min si tuli ni yɛlɛma bagbuyi la min ti tuli. Bagbuyi min si faga si yɛlɛma bagbuyi la min ti faga. 54Woletɔ bagbuyi min si tuli, wo wa yɛlɛma bagbuyi la min ti tuli tumɛ min, wo si a ma, min sɛbɛnɛ Allala kitabu rɔ, wo ni bɔ a la. A sɛbɛnɛ ko, “Sayɛ ara halaki. Nɔlɛ ara kanbali!” 55“E sayɛ, ila nɔlɛ ye mintɔ gbɛ? E sayɛ, ila mɔgɔ-duma-sɛnbɛ ye mintɔ?” 56Sayɛ ye ala mɔgɔ-duma-sɛnbɛ sɔrɔnna hakɛ le bolo. Hakɛ ye ata sɛnbɛ sɔrɔnna Nɛbi Musata tɔn le bolo. 57Kɔnɔ tabarakala Alla ma min bara nɔlɛ di ma ma ma Mari Yisa, Allata-Mɔgɔ-Yabɔnɛ baraka rɔ! 58Woletɔ n na kelen nyɔgɛnu, wo ni wo sɔ gben! Wo ni to wɔlila Mari ye tuma-wo-tuma bawo wo ya a lɔn ko wo ye min kɛla Marita wɔlɛ rɔ, wo ti ma fuyi la mumɛ!

will be added

X\