1 Kɔrɛnti 14

1Nba, wo ni wo raya keninteyɛ ma worɔ. Wo ni wo niyi sa Allata Ni Sɛnimɛta fandɛnu kuma katarala fandɛ wo ma min si a ma, wo ni Allala kumɛ fɔ a kila bɛrɛ fɛ. 2Min bi kan gbɛrɛ fɔla, wo sa kumala mɔgɔ ye fɔ Alla bawo mɔgɔ sa a kan lamɔɛnna. A ye gbundu koenu denu fɔla Allata Ni Sɛnimɛ baraka la wo la. 3Kɔnɔ min bi Allala kumɛ fɔla, wo ye kumala mɔgɛnu denu ye. Kumɛ wo si mɔgɛnu dɛnbɛ ka anu sɛnbɛ don anubɛ ka anu yisi kimɛ. 4Min bi kan gbɛrɛ fɔla, wo ye a nyɛrɛ le dɔrɔn dɛnbɛna kɔnɔ min bi Allala kumɛ fɔla, wo ye chɔchi bɛɛ le dɛnbɛna. 5Ni wo dama si ke kan gbɛrɛ fɔla, wo si a diya don n tɔ. Kɔnɔ min di n ye wo ko, wo le, ko wo dama ni Allala-kuma-fɔɛ fandɛ sɔrɔn. Ado Allala-kuma-fɔɛ tenbira kan-gbɛrɛ-fɔɛ la. Kɔnɔ ni mɔgɔ do taranta nyɔ min si a kan latenbi alako chɔchi mɔgɛ bɛɛ ni dɛnbɛnɛ sɔrɔn wo fɛ, nba, wo fisa. 6N na kelen nyɔgɛnu, ni n nara wo wara ka kuma kan gbɛrɛ rɔ, wo si nfen nyinya wo ma? Ni n ma koe do lankɛnɛmaya wo ye ka bɔ Alla bolo, ni n ma lɔnnɛ do di wo ma, ni n ma wɔlɔyiya-kumɛ fɔ wo ye, ni n ma karan do di wo ma, n ti ko-wo-ko nyinya wo ma. 7Hali fɔli-fan minnu nadannɛ mɔgɛnu bolo iko fuli anubɛ bɔlɔn, wonu bi sigi min sala, mɔgɛ si sigi wo lɔn kama, ni sigi wo yabasannɛ? 8Ado min bi kɛlɛ-buri fɛla, ni wo ma a fɛ a kilɛ fɛ, yon si a rabɛn kɛlɛ-kɛ-koe la? 9A ye wo nya na le. Wo ye min fɔla, mɔgɛ si wo nya-yen kama, ni wo ye a fɔla kan gbɛrɛnu tɔ? Wo manɛ kuma-fuyi le la! 10Kan siyaman bi duninya rɔ kɔnɔ hali wo, kelen sa min kɔrɔ sa a la. 11Kɔnɔ ni n sa kan wo lamɔɛnna, kan wo fɔlɛ si ma iko mɔgɔ gbɛrɛ nde yala. Nde si ma iko mɔgɔ gbɛrɛ, mɔgɛ wo fanan yala. 12Nba, wole fanan bi wo nya na le. Wo hɔnnɛ Allata Ni Sɛnimɛta fandɛ fanan na min kɛ, a fisa, wo ni wo raya ka wonu sɔrɔn min si chɔchi dɛnbɛ. 13Min bi kan gbɛrɛ fɔla, wo ni Alla matara ko a ni sɛnbɛ sɔrɔn ka anu kɔrɛ fɔ mɔgɛnu ye. 14Ado ni n ya Alla matara kan gbɛrɛ rɔ, n sɔndɔmɛ ye tarali kɛla kɔnɔ n miriya ma wo la. 15N ni nfen ma worɔ? N si Alla madiya n sɔndɔmɛ la kɔnɔ n si Alla madiya fanan n miriya la. N si bɛti bɔ n sɔndɔmɛ la, wo kɔma, n si bɛti bɔ fanan n miriya la. 16I wa baraka bira Alla ye i sɔndɔmɛ la ladɛn kuma, minnu ma kan wo lɔn, wonu si a fɔ kama ko, “Amina?” I ye min fɔla, anu ma wo lɔn. 17Hali ila baraka-birɛ kin nya bɛɛ ma Alla yala, mɔgɛ gbɛrɛ ti dɛnbɛnɛ sɔrɔn wo rɔ hali! 18N bi baraka birala Alla ye ko nde ye kan gbɛrɛ fɔla ka tenbi wo dama la. 19Kɔnɔ n tenbi Alla batola chɔchi la, yanni n ni kuma waga yirika siyaman fɔ kan gbɛrɛ rɔ, a fisa, n ni kuma loli pe fɔ mɔgɛnu si min nya-yen ka donu karan wo la. 20N na kelen nyɔgɛnu, wo kana ma iko dennɛnu wo miriyanu tɔ. Wo ni ma den pulan la ko-yogomɛ kɛ koe rɔ kɔnɔ wo ni ma kinanu na wo miriyanu tɔ. 21A sɛbɛnɛ Allala kitabu rɔ ko, “Mari ko a si kuma ata mɔgɛnu ye. A si mɔgɛ donu nana wo karan tinɛ kan-yabasannɛ la. A ko wo ma mɔgɛ minta kan lamɔɛn, wonu si ata kumɛ fɔ wo ye kɔnɔ hali wo, a ko ata mɔgɛnu ti anu tole masɔ wo kan la.” 22Woletɔ kan-gbɛrɛ-fɔɛ ye dɛnkɛninyabɛlɛnuna ko la, dɛnkɛninya-mɔgɛnu ma de! Kɔnɔ Allala-kuma-fɔɛ ye dɛnkɛninya-mɔgɛnuna ko la, dɛnkɛninyabɛlɛnu ma de! 23Nba, ni wole kan-gbɛrɛ-fɔlɛnu nadɛnta wo nyɔgɔn fɛ chɔchi burɔ ka kan-gbɛrɛ-fɔɛ dabira, mɔgɔ-kurɛ wa taran wo tɛma, ni wo ma, dɛnkɛninyabɛlɛ, a si a fɔ worɔ ko wo dama ara yuwaya. 24Kɔnɔ ni wo dama ya Allala kumɛ fɔ, mɔgɔ-kurɛ wa taran wo tɛma nyɔ, ni wo ma, dɛnkɛninyabɛlɛ, a si min namɔɛn, wo si a ma, a ni a hakɛ lɔn ka a nyɛrɛ yiliki. 25A si a sɔ ala ko-dogonnɛnu na. Wo kɔma, a si a nyɛnkin ka Alla bato ka a sɔ a la ko, “Tonyɛ le, Alla ye wo tɛma yan!” 26N na kelen nyɔgɛnu, n bi nfen ma kɛ la? Wo wa wo ladɛn Alla bato tinɛ, a fɛrɛ sa fɔ koe bɛɛ ni ma chɔchi-dɛnbɛn-koe la. Bɛti do ye mɔgɔ kelen bolo, mɔgɛ do ye karan kɛla, dogbɛrɛ ye ko-rayirɛ kɛla ka bɔ Alla bolo, dogbɛrɛ ye kumala kan gbɛrɛ rɔ, mɔgɔ gbɛrɛ ye a kan latenbila ka a kɔrɛ fɔ. 27Ni mɔgɛ do ye kumala kan gbɛrɛ rɔ, mɔgɔ fila, ni wo ma, sawa dɔrɔn ni kuma. Wonu ni kuma kelen-kelenyɛ ma ado fɔ mɔgɛ gbɛrɛkɛ ni wo latenbi. 28Ni mɔgɔ sa nyɔ min bi a latenbila, mɔgɔ kana kuma ladɛn wo rɔ. A ni kuma a nyɛrɛ yisi anubɛ Alla ye dɔrɔn. 29Mɔgɔ fila, ni wo ma, sawa minnu bi Allala kumɛ fɔla, wonu ni kuma kɔnɔ anu tenbi kumala, a toenu ni wo lakɔrɔsi. 30Kɔnɔ ni mɔgɛ do siginɛ ladɛn wo rɔ, Alla wa kumɛ do fɔ a ye, min bi kumala wo wati rɔ, wo ni a made fɔlɔn. 31Wo dama ni Allala kumɛ fɔ kelen-kelenyɛ ma. Wo le si a ma, wo dama ni karan. Ado wo sɛnbɛ si koloya. 32Allala-kuma-fɔɛ dinɛ minnu ma, wonu ni anu nyɛrɛ bira 33bawo Alla sa nyinina ko-yabasan ma, fɔ yisi-kimɛ. Allala mɔgɛ bɛɛ wa anu nadɛn chɔchi la, 34musinu ni anu made chɔchi ladɛn rɔ. A ma bɛn anu ni kuma. Iko a sɛbɛnɛ Nɛbi Musala tɔn rɔ nya min, anu kana kun-tigiyɛ kɛ keinu kuma. 35Ni anu bi a fɛ ka ko-wo-ko lɔn, anu ni anuna keinu manyinika bɔn la. Musi wa kuma chɔchi ladɛn rɔ, a si a nyɛrɛ lamiliya wo la. 36Allala kibara-nyimɛ da ma bira wole Kɔrɛnti kɛnu barɛ. Ado a ma na wole dɔrɔn ma. 37Ni mɔgɔ wo mɔgɔ ye a mirila ko Allala kilayɛ le ale la, ado ni min ko Allata Ni Sɛnimɛta fandɛ ye a bolo, ale nyɛrɛ ni a lɔn ko n bi min sɛbɛla wo ma, Marita tɔn le wo la. 38Kɔnɔ ni a ma a tole masɔ nna kumɛ kɛ la, wo fanan kana wo tole masɔ a la. 39Woletɔ n na kelen nyɔgɛnu, Allala-kuma-fɔɛ-sɔgɛ ni wo bira kɔnɔ wo kana tɔn sigi kan-gbɛrɛ-fɔɛ la. 40Koe bɛɛ ni kɛ a kin na anubɛ a kilɛ fɛ.

will be added

X\