1 Kɔrɛnti 12

1Nba, n na kelen nyɔgɛnu, n bi a fɛ ka kuma wo ye Allata Ni Sɛnimɛta fandɛnu bara-koe rɔ. N bi a fɛ, wo ni tonyɛ lɔn wonuna ko la. 2Yanni wo ni dɛnkɛninya Yisa ma tumɛ min, wo le ya a lɔn ko niyi sa bɛsɛ minnu tɔ, wonu ya wo lasama kilɛ bɛrɛ ma. 3Nba, n bi a fɛ ka kuma-kolomɛ fɔ wo ye. Min bɛɛ maranɛ ata Ni Sɛnimɛ bolo, wo fenfen ti ke a fɔla ko, “Yisa dankanɛ.” Ado ni ata Ni Sɛnimɛ sa mɔgɛ min fɛ, wo ti ke a fɔla ko, “Yisa, Mari le.” 4Fanda su siyaman bi nyɔ ka bɔ Alla bolo kɔnɔ Allata Ni Sɛnima kelan wo le ye wo bɛɛ dila ma ma. 5Kila siyaman bi nyɔ ma si wɔli Mari ye nya min kɔnɔ ma dama ye wɔlila Mari kelen de ye. 6Wɔli su siyaman bi nyɔ-wɔli kɛ tinɛ kɔnɔ Alla kelen de ye fɛrɛ dila ma kelen-kelennamɛ-bɛɛ ma. 7Alla si ata Ni Sɛnimɛ yira mɔgɔ kelen-kelennamɛ-bɛɛ la alako bɛɛ si sabati anu nyɔgɔn fɛ nya min. 8Ata Ni Sɛnima kelan wo si hɛnkilimaya-kumɛ di do ma. Lɔnnɛ ye kawandili min tɔ, a si sɛnbɛ wo di mɔgɔ gbɛrɛ ma fanan. 9Ata Ni Sɛnima kelan wo si dɛnkɛninya-wɛ di mɔgɛ do ma ka mɔgɔ-lakɛndɛya-sɛnbɛ di mɔgɔ gbɛrɛ fanan ma. 10Ata Ni Sɛnimɛ si kabana-ko-wɔli-sɛnbɛ di mɔgɛ do ma ka kawandili-labɔ-sɛnbɛ di mɔgɔ gbɛrɛ ma. Fandɛ minnu bɔra Allata Ni Sɛnimɛ bolo anubɛ minnu ma bɔ a bolo, wonu dan-nafarɛ-lɔn-sɛnbɛ dinɛ mɔgɔ gbɛrɛ ma. Kan-gbɛrɛ-fɔ-sɛnbɛ dinɛ mɔgɔ do ma. Kan wo latenbi-sɛnbɛ dinɛ mɔgɛ gbɛrɛ fanan ma. 11Kɔnɔ Allata Ni Sɛnima kelan le ye wo bɛɛ kɛla. Mɔgɔ kelen-kelennamɛ-bɛɛ fandɛ dinɛ a ma Allata Ni Sɛnimɛ bolo iko a di ata Ni Sɛnimɛ ye nya min. 12Kirasiti mani de iko bagbu kelan, sɔlɔmɔnya siyamɛ. Hali wo fɛrɛ sɔlɔmɔnyanu siya, bagbu kelen de! 13A ye wo nya na le fanan Kirasitita bagbuyi rɔ. I mara Yahudiya la wo, i mara sibolo gbɛrɛ la wo, i mara yɔɔn na wo, i mara hɔrɔ la wo, ma dama ara batasi bagbu kelen tɔ ata Ni Sɛnima kelen de bolo. Ma dama ara fa Allata Ni Sɛnima kelen wo la. 14Nba, bagbu nyɛrɛ, sɔlɔmɔnya kelen ma, fɔ sɔlɔmɔnya siyaman. 15Ni kian ya a fɔ ko, “Nde tugunni ma fɛrɛ la bawo bolo ma n na,” wo ti a ma, a ti ma fɛrɛ kan tinɛ do la. 16Ni tole ya a fɔ ko, “Nde tugunni ma fɛrɛ la bawo ya ma n na,” wo ti a ma, a ti ma fɛrɛ kan tinɛ do la. 17Ni bagbuyi bɛɛ mara ya-gbansan la nun, a si ko lamɔɛn kama? Ni a bɛɛ mara tole la nun fanan, a si fen sumɛ lamɔɛn kama? 18Kɔnɔ iko a ye nya min, Alla ara sɔlɔmɔnya-su-siyamɛ tugun anu nyɔgɔn na iko a di a ye nya min. 19Ado ni sɔlɔmɔnya kelen pe le nun, bagbu ti taran nun! 20Kɔnɔ iko a ye nya min, sɔlɔmɔnya siyaman bi nyɔ kɔnɔ bagbu kelen de! 21Woletɔ yɛ ti ke a fɔla bole ma ko, “N mako sa i la!” Kunyɛ ti ke a fɔla kian ma ko, “Nba, n mako sa i la!” 22Ado ma sɔlɔmɔnya minnu manɛ iko anu sɛnbɛ sa, wonuna wɔli gbɛlɛ a toenu ko. 23Ma ye ma mirila ma sɔlɔmɔnya minnu ma ko anu ma gbili ma ma, ma si wonu denu kandan bɛrɛkɛ! Ma sɔlɔmɔnya minnu ma kin, ma si wonu makiri a kila bɛrɛbɛrɛ fɛ. 24Kɔnɔ ma sɔlɔmɔnya minnu kin, hali ma ma wonu makiri wo nya na. Alla nyɛrɛ ara ma sɔlɔmanyanu tugun anu nyɔgɔn na ka gbiliya-wɛ di ma sɔlɔmɔnya ma, gbiliyɛ dasanɛ minnu na. 25Alla ya a ladan wo nya alako sɔsɔli kana taran sɔlɔmɔnyanu tɛma. Ado sɔlɔmɔnya bɛɛ ni a lɔn ko anu kelen-kelennamɛ-bɛɛ makoe ye anu nyɔgɔn na. 26Ni sɔlɔmɔnya kelen tɔrɔta, a sɔlɔmɔnya toe bɛɛ si tɔrɔ a fɛ. Ni sɔlɔmɔnya kelen ya gbiliyɛ sɔrɔn, a sɔlɔmɔnya-toe-bɛɛ si do sɔrɔn gbiliyɛ wo rɔ. 27Nba, Kirasiti bagbuyi le wo dama la. Kirasiti sɔlɔmɔnya do le wo kelen-kelennamɛ-bɛɛ la. 28Alla ara bɛɛta wɔlɛ di a ma chɔchi la, a fɔlɛ, kilayɛnu, a fila nyɔgɛ, wɔlɔyiya-kuma-fɔlɛnu, a sawa nyɔgɛ, karan-mɔgɛnu, wo kɔma, kabana-ko-kɛlɛnu anubɛ lakɛndɛyali-sɛnbɛ dinɛ minnu ma anubɛ minnu si ke bolo-kolɔnnu dɛnbɛna, minnu si ke kun-tigiyɛ kɛla, ni wo ma, ka kan gbɛrɛnu fɔ. 29Anu dama ma ma kilayɛnu na anubɛ wɔlɔyiya-kuma-fɔlɛnu anubɛ karan mɔgɛnu na. Kabana-ko-kɛ-sɛnbɛ ma di mɔgɛ bɛɛ ma. 30Bɛɛ ti ke kirayatoenu nakɛndɛyala anubɛ ka kan gbɛrɛnu fɔ anubɛ ka kan gbɛrɛ wonu natenbi. 31Nba, fanda-tɔnɔnamɛnu bira-sɔgɛ ni wo bira. Kɔnɔ min kolo kɛ bɛɛ ko, n si na wo yira wo la gbɛ!

will be added

X\