1 Kɔrɛnti 11

1Nba, wo ni wo sanka nde ma iko nde ye n sankala Kirasiti ma nya min. 2N si wo tanto bawo wo ye wo hɛnkili tola n ko tuma-wo-tuma ka koe wonu bira n ya wo karan minnu na. 3Kɔnɔ n bi a fɛ, wo ni a lɔn ko Kirasiti ye kei bɛɛ kun na. Kei le ala musi kun na. Kɔnɔ Alla le ye Kirasiti fanan kun na. 4Woletɔ kei tenbi Alla matarala, ni wo ma, ka wɔlɔyiya-kumɛ fɔ nyama tɛma, ni a kunyɛ yamatogonnɛ, a ye ala kun tigi Kirasiti le lafɛyala wo la. 5Kɔnɔ musi min bi Alla matarala, ni wo ma, ka wɔlɔyiya-kumɛ fɔ nyama tɛma, ni a kunyɛ yamatogonni ma, a ye ala kun tigi le lafɛyala, ala kei kɔni. Dan-nafara mumɛ sa ale anubɛ musu-kun-gbananɛ tɛma a lamiliya-koe la. 6Ni musi sa a fɛ ka a kunyɛ yamatogon, a fisa, a ni a kun-sigi matɛgɛ. Kɔnɔ ni musi kunyɛ siinɛ, ni wo ma, a matɛgɛnɛ, miliya-koe le wo la ale ye. A fisa, a ni a kunyɛ yamatogon. 7Hali kei ma a kunyɛ yamatogon bawo Allala muninyɛ anubɛ Allala gbiliyɛ le ale la. Kɔnɔ musi le ye ala keila gbiliyɛ labɔla gbɛ rɔ. 8N bi wo fɔla bawo Alla ma kei dan ka bɔ musi rɔ kɔnɔ musi le bɔra kei rɔ. 9Alla ma kei ladan musila ko la kɔnɔ musi le ladanta keila ko la. 10Nba, ka a tɛgɛ wo ma, musi ni a kunyɛ yamatogon ka a yira ko a ye ala keila sɛnbɛ kɔrɔ. Ado wo si melikanu fanan wasa minnu bi ma kumafɛlɛnna. 11Kɔnɔ hali wo, ma tenbi wɔlila Mari ye, kei ni musi sɔrɔn a dɛnbɛn koe la, musi fanan ni kei sɔrɔn a dɛnbɛn koe la. 12Ado iko musi fɔlɔtɛ bɔra kei rɔ nya min, kei fanan sɔrɔnta musi bolo wo nya na le. Ado Alla le ya fan bɛɛ dan. 13A bɛnnɛ ko musi ni Alla matara nyama tɛma ni a kunyɛ yamatogonni ma, wa? Wo nyɛrɛ ni kiti wo tɛgɛ. 14Ado Alla ya mɔgɛ dan nya min, wo nyɛrɛ ye wo karanna ko ni kei kun-sigi siya, miliya-koe le wo la ale ye. 15Kɔnɔ musila gbiliyɛ le a kun-sigi la bawo Alla ya kun-sigi-yanmɛ di a ma a kunyɛ-yamatogon-koe la. 16Kɔnɔ ni mɔgɔ wo mɔgɔ ye a fɛ ka sɔsɔli sa kɛla ko la, n si kɛ le dɔrɔn fɔ wola ko la. Male wo, Allata chɔchi doinu wo, namu woo sa batoli kɛ tinɛ ma tɛma kɛ kɔma. 17Hali wo, n bi koe min fɔla wo ye kɛ la, n sa wo matɔgɔla wo rɔ. Wola chɔchi-ladɛnnu sa ko-rabɛn-kɛla fɔ ka tinyalɛ kɛ. 18A fɔlɔtɛ, mɔgɛnu bara a fɔ n ye ko wo wa wo ladɛn tumɛ min, dan-nafarɛ ye wo nyɔgɔn tɛma. Ado n lanɛ a la ko tonyɛ ye wo donu tɔ. 19Ado a fɛrɛ sa fɔ wo ni taran kan kelen tɔ alako minnu bi ko-latelennɛ kɛla Alla ye, wonu ni gbɛ wo tɛma. 20Wo wa wo ladɛn tumɛ min, wo sa nala Marita kimanɛ dɔn tinɛ fɔ wo nyɛrɛta ladiyɛ. 21Wo tenbi fen dɔnla, mɔgɔ kelen-kelennamɛ-bɛɛ ye fen dɔnna iko a di a ye nya min. Anu ti doinu makɔni, woletɔ do kɔnkɔtoe tenbi, do kun tafinnɛ gbɛɛ minyɛ bolo. 22Bon sa wo bolo wo si fen dɔn kɛ kan min ka wo min, wa? Ka, a di wo ye, Allala chɔchi la ni fɛya ka bolo-kolɔnnu namiliya, wa? Wo miriya ye kama? N si nfen fɔ wola ko la? N ni wo matɔgɔ, wa? Ade, n ti wo matɔgɔ mumɛ! 23Mari ya n karan min na, n ya wo le latenbi wo ma. N ko anu ya Mari Yisa don a yogenu bolo suyi min tɔ, a ya biredi bi 24ka baraka bira Alla ye. A ban a rakerila, a ko, “N fɛrɛ-bɔnkɛ le kɛ la min bi wola ko la. Wo ni kɛ dɔn alako wo yili ni to n ko nya min.” 25Anu ban biredi wo dɔnna, Yisa ya yi-lafɛ fanan bi wo nya. A ko, “Allatalata sarama-kan-kurɛ min kirinɛ n yelela ko la, wo le kɛ la. Wo ni kɛ min alako wo ni to wo mirila n ma nya min.” 26Wo tenbi biredi kɛ dɔnna ka wo min tuma-wo-tuma, wo si wo miri Marita saya-koe ma ka to a fɔla ha a ni na tumɛ min. 27Ado ni mɔgɔ wo mɔgɔ ma Marita biredi dɔn ka a min Marita yi-lafɛ la a kilɛ fɛ, wo tigi ara kiti lana a nyɛrɛ kuma. A ara yilikiyi sɔrɔn bawo a ma Mari fɛrɛ-bɔnkɛ anubɛ a yele gbiliya. 28Woletɔ yanni wo ni Marita biredi dɔn ka wo min Marita yi-lafɛ la, wo kelen-kelennamɛ-bɛɛ ni wo nyɛrɛ lakɔrɔsi ka wo nyɛrɛ fɛsɛfɛsɛ. 29Ni min ya biredi kɛ dɔn ka a min yi-lafɛ kɛ la, a ma a miri Mari fɛrɛ-bɔnkɛ ara min ma a ye, a tenbi a dɔnna ka a min, a si kiti lana a nyɛrɛ kuma. 30Ka a tɛgɛ wo ma, wo siyaman rafaganɛ, wo kirɛ, ado donu bara faga wo rɔ! 31Kɔnɔ ni ma ya ma nyɛrɛ lakɔrɔsi fɔlɔn a kilɛ fɛ, Alla ti ma kiti. 32Mari ye ma kitila ka ma tɔrɔ kaka alako mabɛ dɛnkɛninyabɛlɛnu kana halaki ma nyɔgɔn fɛ kiti-tɛgɛ-lunyɛ. 33Woletɔ n na kelen nyɔgɛnu, wo wa wo ladɛn Marila kima-dɔn-koe rɔ tumɛ min, wo ni wo nyɔgɔn makɔni. 34Wo wa wo ladɛn fen dɔn tinɛ tumɛ min, yanni wo ni kiti sɔrɔn Alla bolo, ni kɔnkɛ ye wole do la, a bɛnnɛ wo tigi ni fen-dɔn-kɛ ala bɔn la. N ba na kɛ kɔma tumɛ min, wo ya n manyinika minnu na wola kɛdi rɔ, n si wonu natelen.

will be added

X\