1 Kɔrɛnti 10

1N na kelen nyɔgɛnu, ma benba minnu bilara Musa fɛ, n bi a fɛ, wo ni wo yili to wonu ko. Banda-fin-gbɛ le ya anu yamatogon ha anu dama kɛndɛ tenbira Kɔgɔ-Yi-Wulan rɔ. 2Banda-fin-gbɛ min bi anu kun na anubɛ anu ya yi min tɛgɛ, wo ya a ma iko anu batasinɛ le. Ado anu mara Nɛbi Musa gba-fɛ-bilalɛ la batasilɛ wo fɛ. 3Anu dama ya dɔn fen kelan wo dɔn min bɔra Alla bolo. 4Anu dama ya yi kelan min, Alla ya min nabɔ farɛ rɔ. Ado Kirasiti nyɛrɛ le farɛ wo la min bilara anu fɛ. 5Kɔnɔ hali wo, Alla diminyara anu siyaman ma. Woletɔ anu furinu bolokanɛ tora wula-da-rakolɔn rɔ. 6Nba, misalɛ le wo bɛɛ la male ye ka ma lalɔn ko ma kana mala natanu sa ko-yogomɛnu kuma iko wonu ya a ma nya min. 7Ma kana bɛsɛnu kɔ iko wonu donu ya a ma nya min. Ado a sɛbɛnɛ Allata kitabu rɔ ko, “Anu ya anu de-nyini ka anu min. Wo kɔma, anu wulita Alla-lɔnbɛlɛnuna dɔn-kɛ-nya bila.” 8Ma kana yɛlɛnyɛ kɛ wona iko wo do ya a ma nya min, ha anu mɔgɔ waga mogan-ni-sawa (23,000) fagara tele kelen kɔrɔ. 9Ma kana Mari kɔrɔbɔ wona iko wo do ya a ma nya min, ha duguma-fannu ya anu faga. 10Ma kana kɔrɔtɔ iko wo do ya a ma nya min, ha niyi-bɔ-melika ya anu kasara. 11Koe kɛ bɛɛ mara anu na alako a ni ma misalɛ la mɔgɛ doinu ye. Koe kɛnu sɛbɛra ma ye alako ka ma lalɔn bawo male ye wati-laban tɔ. 12Woletɔ ni min bi a mirila ko a sɔnɛ gben, wo ni a ma a fɛrɛma alako a kana na bu boloko-yogomɛ-kɛ. 13Kɔrɔbɔlɛ wa kɛ wo ma tumɛ min, wa wo yili to kɛ ko ko kɔrɔbɔlɛ su wo duruta kɛla mɔgɛ gbɛrɛnu fanan na. Alla ti nyina ala lanyiri kirinɛ ko. A ti sɔn kɔrɔbɔlɛ su-wo-su ni ke wo ma wo ti min nɔ. Kɔnɔ kɔrɔbɔlɛ wa kɛ wo ma tumɛ min, a si kilɛ yira wo la alako wo si a nɔ nya min. 14Woletɔ n diyana-mɔgɛnu, wo ni wo matanka bɛsi-kɔ-koenu ma. 15N bi kumala wole ye iko mɔgɔ si kuma hɛnkilimɛnu ye nya min. N bi min fɔ tinɛ, wole nyɛrɛ ni wo kɔrɔbɔ ni tonyɛ le, ka, ni tonya ma. 16Ma tenbi Marita kima dɔnna chɔchi la, ma si baraka bira Alla ye. Ma wa ma min yi-lafɛ wo la tumɛ min, ma ye ta-nyɔgɔnyɛ le kɛla Kirasiti yele le tɔ wo la. Ma si biredi min takeri fanan, ma wa biredi wo dɔn tumɛ min, ma ye ta-nyɔgɔnyɛ kɛla Kirasiti fɛrɛ-bɔnkɛ le tɔ wo la. 17Hali ma siyayanɛ, ma bɛɛ ara ma bagbu kelen na bawo ma damasi ara biredi gbu kelen dɔn. 18Wa wo miri Isirɛla mɔgɛnu ma. Minnu bɛɛsi ye saraka-sogenu dɔnna, anu bɛɛsi yisi sanɛ anu nyɔgɔntɛ kuma saraka-dɔn wo fɛ. 19N bi nfen ma kɛ la? Mɔgɛnu bi bɛsɛ min kɔla wo, anu bi a kɔla dɔn-fan min na wo, fen-kolomɛ le wonu na, wa? 20Ade! N bi min fɔ tinɛ, wo le ko anu bi sarakɛ min bɔla wo la, anu sa wo bɔla Alla ye fɔ nyinɛnu. Ado n sa a fɛ, wo ni ta-nyɔgɔnyɛ kɛ nyina-kɔlɛ wonu fɛ. 21A ti bɛn wo ni wo min Marita yi-lafɛ la, wo ni ta wo min nyinɛnuta yi-lafɛ la fanan. Wo kana fen-dɔn-kɛ Marita tebulu la, wo wa ban, wo ni ta fen dɔn nyinɛnuta tebulu fanan na. 22Ka, a di ma ye, keliyɛ ni don Mari rɔ, wa? Ma miriya ko ma sɛnbɛ kolo atɛ ko woletɔ a ti ma tɔrɔ, wa? 23Anu bi a fɔla ko, “Male ye nyinina min ma, tɔn sa ma kuma wo ma tinɛ.” Tonyɛ le kɔnɔ koe bɛɛ ti ma munanfaga. Nde bɛrɛn si a fɔ ko, “N bi nyinina min ma, tɔn sa n kuma wonuna ko la.” Tonyɛ le kɔnɔ koe bɛɛ ti ma lata ya rɔ. 24Mɔgɔ ti to i nyɛrɛ makoe nyinyala dɛɛ kɔnɔ a fisa, i ni mɔgɔ gbɛrɛnu dɛnbɛ ka wonu fanan makoe nyinya. 25Anu bi soge min bɛɛ mayirala fere kɛ tinɛ, wo ni wonu dɔn fasai! Hali wo ma nyinikali kɛ wo sɔndɔmɛla ko la. 26Ado iko a sɛbɛnɛ Allata kitabu rɔ nya min ko, “Duninya anubɛ fan min bɛɛsi ye a rɔ, Maritɛ le wo bɛɛ la.” 27Ni dɛnkɛninyabɛlɛ do ya wo kele fen dɔn tinɛ, i wa ta, ni a ya min sigi wo kɔrɔ, wo ni wo dɔn. Wo kana nyinikali kɛ wo sɔndɔmɛla ko la. 28Kɔnɔ ni mɔgɛ do ya a fɔ wo ye ko, “Dɔn-fan kɛ dinɛ bɛsɛnu denu ma kɔɔ,” wo kana dɔn-fan wo dɔn ka a tɛgɛ mɔgɛ wo sɔndɔmɛla ko ma. 29Ka a fɔ ko wo kana a dɔn wo nyɛrɛ sɔndɔmɛla ko la, wo ma de, fɔ ale min ya wo fɔ wo ye. Nba, mɔgɛ do si nyinikalɛ sa ko, “Ni mɔgɛ sɔndɔmɛ ya a tɔrɔ, wo si a ma, n bi nyinina min ma, n ti wo ma, wa? N ma hɔrɔya ka n diyana koenu ma, wa? 30Ni n ya baraka bira Alla ye nna dɔn-fanla ko la, nfenna worɔ, mɔgɛ si a fɔ ko n bara ko-yogomɛ le ma?” 31Woletɔ ni wo ye fen dɔnna, ni wo ye wo minna, ni wo ye ko-wo-ko kɛla, wo ni wo bɛɛ kɛ alako Alla ni gbiliyɛ sɔrɔn wo bɛɛ rɔ. 32Wo kana ma tɔrɔya-sebu la Yahudiyanu anubɛ sibolo gbɛrɛnu ye, wo ta-nyɔgɛ dɛnkɛninya-mɔgɛnu kɔni. 33Wo ni a ma wo fɛrɛma iko nde ye a mala nya min. N bi n tayala ka mɔgɛ bɛɛ hɛnɛ koe bɛɛ rɔ. N sa n mirila ko-nyimɛ ma n nyɛrɛ ye dɔrɔn fɔ mɔgɛ bɛɛ ye alako anu denu ni kisi.

will be added

X\