1 កូនអើយ ចូរនាំគ្នាស្តាប់ពាក្យទូន្មានរបស់ឪពុក ចូរប្រុងស្មារតី នោះកូននឹងបានយល់អំពីការចេះដឹង 2 ដ្បិតឪពុកបង្រៀនកូនអំពីគោលគំនិតដ៏ល្អ កុំបោះបង់ចោលដំបូន្មានរបស់ឪពុកឡើយ។ 3 ពីដើម ឪពុកធ្លាប់ស្តាប់ជីតារបស់ឯង ហើយឪពុកក៏ជាកូនសំណប់របស់ជីដូនឯងដែរ។ 4 ជីតាឯងបានបង្រៀនឪពុកថា៖ «ចូរកូនចងចាំពាក្យរបស់ឪពុកទុកក្នុងចិត្ត ចូរប្រតិបត្តិតាមដំបូន្មានរបស់ឪពុក នោះកូននឹងមានជីវិត។ 5 ចូររកប្រាជ្ញា និង ការចេះដឹងអោយបាន។ មិនត្រូវបំភ្លេចឬងាកចេញពីពាក្យរបស់ឪពុកឡើយ។ 6 កុំបោះបង់ប្រាជ្ញាអោយសោះនោះប្រាជ្ញានឹងការពារកូន ចូរស្រឡាញ់ប្រាជ្ញានោះប្រាជ្ញានឹងថែរក្សាកូន។ 7 រីឯប្រភពនៃប្រាជ្ញា ចាប់ផ្តើមដូចតទៅ : គឺត្រូវរកប្រាជ្ញាអោយបាន ហើយចំណាយអ្វីៗទាំងអស់ដែលកូនមាន ដើម្បីរកអោយបានការចេះដឹង។ 8 ចូរអោបរឹតប្រាជ្ញាអោយជាប់ក្នុងដួងចិត្ត នោះប្រាជ្ញានឹងលើកតម្កើងកូនឡើងយ៉ាងថ្លៃថ្នូរ។ 9 ប្រាជ្ញានឹងផ្តល់អោយកូនបានរុងរឿង គឺប្រៀបដូចជាមកុដ និង ជាគ្រឿងអលង្ការដ៏ថ្លៃបំផុត សំរាប់កូន»។ 10 កូនអើយ ចូរស្តាប់ពាក្យរបស់ឪពុកនោះកូននឹងមានអាយុវែង។ 11 ឪពុកបានណែនាំកូនអោយស្គាល់របៀបរស់នៅប្រកបដោយប្រាជ្ញា និង បានអប់រំកូនអោយដើរតាមមាគ៌ាទៀងត្រង់។ 12 បើកូនប្រកាន់យកមាគ៌ានេះ នឹងគ្មានឧបសគ្គអ្វីមករារាំងកូនអោយជំពប់ដួលឡើយ។ 13 ចូរកាន់តាមដំបូន្មានឪពុក ដោយឥតលះបង់ចោលឡើយ ចូរថែរក្សាអោយជាប់ដ្បិតដំបូន្មាននេះជាជីវិតរបស់កូន។ 14 មិនត្រូវចូលរួមក្នុងផ្លូវរបស់មនុស្សពាលឡើយ ហើយក៏មិនត្រូវយកតំរាប់តាមមនុស្សអាក្រក់ដែរ។ 15 ចូរចៀសវាងដើរតាមផ្លូវនោះ ត្រូវដើរវាងអោយឆ្ងាយ។ 16 អ្នកទាំងនោះមិនចូលដំណេកទេ ដរាបទាល់តែបានប្រព្រឹត្តអំពើអាក្រក់ជាមុនសិន គឺប្រសិនបើគេមិនបានធ្វើទុក្ខទោសអ្នកផ្សេងទេនោះគេដេកមិនលក់ឡើយ 17 ដ្បិតគេចិញ្ចឹមជីវិត ដោយសារអំពើទុច្ចរិតហើយគេផឹកស្រាដែលបានមក ដោយសារអំពើឃោរឃៅ។ 18 មាគ៌ារបស់មនុស្សសុចរិត ប្រៀបបីដូចជាពន្លឺអរុណរះ បញ្ចេញរស្មីកាន់តែភ្លឺឡើងៗរហូតដល់ព្រះអាទិត្យពេញកំដៅ។ 19 រីឯផ្លូវរបស់ជនពាលវិញ ប្រៀបបាននឹងភាពងងឹតអន្ធការ គឺពួកគេមិនអាចមើលឧបសគ្គដែលធ្វើអោយខ្លួនជំពប់ដួលនោះឃើញឡើយ។ 20 កូនអើយ ចូរផ្ទៀងត្រចៀក ចូរត្រងត្រាប់ស្តាប់ពាក្យទូន្មាន និង ឱវាទរបស់ឪពុក។ 21 កុំបំភ្លេចពាក្យឪពុក គឺត្រូវរក្សាទុកអោយជាប់នៅក្នុងដួងចិត្តជានិច្ច។ 22 ដ្បិតឱវាទនេះនឹងផ្តល់ជីវិត និង សុខភាព ដល់អស់អ្នកដែលសុខចិត្តទទួល។ 23 ចូរកូនថែរក្សាចិត្តគំនិត ដោយប្រុងប្រយ័ត្ន ដ្បិតចិត្តគំនិតរបស់កូនយ៉ាងណា ជីវិតរបស់កូនក៏យ៉ាងនោះដែរ។ 24 ចូរទប់មាត់កុំអោយពោលពាក្យអាស្រូវឡើយ ហើយក៏កុំគ្រលាស់អណ្តាតពោលពាក្យមួលបង្កាច់គេដែរ។ 25 ចូរសំដែងអោយមនុស្សលោកឃើញទឹកចិត្តស្មោះត្រង់របស់កូន គឺកុំមើលទៅនរណាដោយចិត្តវៀចវេរឡើយ។ 26 ចូររៀបចំផ្លូវដែលកូនត្រូវដើរអោយត្រង់ គឺធ្វើយ៉ាងណាអោយផ្លូវនោះបានត្រឹមត្រូវ 27 កុំងាកស្តាំ ងាកឆ្វេងហើយចៀសអោយឆ្ងាយពីផ្លូវអាក្រក់។
