1 លោកយ៉ូបឆ្លើយវិញថា៖ 2 «លោកប៉ិនប្រសប់ជួយ អ្នកដែលគ្មានកម្លាំងមែន! លោកប៉ិនប្រសប់ជួយស្រោចស្រង់ មនុស្សទន់ខ្សោយ! 3 លោកក៏ប៉ិនប្រសប់ជួយយោបល់ អ្នកដែលគ្មានប្រាជ្ញាដែរ! លោកពូកែណែនាំគេអោយចេះរិះគិតណាស់! 4 តើលោកថ្លែងសេចក្តីទាំងនេះប្រាប់នរណា ? នរណាបណ្តាលចិត្តលោកអោយថ្លែងដូច្នេះ? អំណាចរបស់ព្រះជាម្ចាស់ 5 អស់អ្នកដែលស្លាប់ទៅហើយ នាំគ្នាញ័ររន្ធត់នៅពីក្រោមសមុទ្រ និង ក្រោមអ្វីៗដែលរស់នៅក្នុងសមុទ្រ។ 6 ស្ថានមច្ចុរាជមិនលាក់កំបាំងចំពោះព្រះភ័ក្ត្ររបស់ព្រះអង្គឡើយ ព្រះអង្គមើលធ្លុះដល់រណ្តៅនៃសេចក្តីវិនាស។ 7 ព្រះអង្គលាតត្រដាងទិសឧត្តរនៅលើអាកាស ព្រះអង្គព្យួរផែនដីនៅលើលំហ។ 8 ព្រះអង្គបង្ខាំងទឹកទុកនៅក្នុងពពក តែពពកមិនធ្លាយ ដោយសារទម្ងន់ទឹកឡើយ។ 9 ព្រះអង្គលាតត្រដាងពពកបាំងបល្ល័ង្ករបស់ព្រះអង្គ។ 10 ព្រះអង្គគូសរង្វង់មួយនៅលើផ្ទៃទឹក ត្រង់ព្រំប្រទល់រវាងពន្លឺ និង ងងឹត។ 11 សសររបស់មេឃរញ្ជួយ និង ភ័យតក់ស្លុត នៅពេលឮព្រះអង្គស្រែកគំរាម។ 12 ព្រះអង្គបង្ក្រាបសមុទ្រ ដោយសារព្រះចេស្តារបស់ព្រះអង្គ។ ព្រះអង្គកំទេចសត្វដ៏សំបើមនៅក្នុងសមុទ្រ ដោយសារព្រះតំរិះរបស់ព្រះអង្គ។ 13 ព្រះអង្គធ្វើអោយផ្ទៃមេឃប្រែជាស្រឡះ ដោយសារខ្យល់ដង្ហើមរបស់ព្រះអង្គ ព្រះអង្គចាក់ទម្លុះពស់ដែលកំពុងតែគេចខ្លួន ដោយសារព្រះហស្តរបស់ព្រះអង្គ។ 14 នេះគ្រាន់តែជាស្នាព្រះហស្តដ៏តូចរបស់ព្រះអង្គ ហើយយើងក៏បានឮតែបន្តិចបន្តួចប៉ុណ្ណោះ ចំណែកឯប្ញទ្ធានុភាពដ៏ខ្លាំងក្លារបស់ព្រះអង្គវិញ តើនរណាអាចស្វែងយល់បាន?»។
