1 ព្រះអម្ចាស់ មានព្រះបន្ទូលមកកាន់លោកម៉ូសេថា៖ 2 «ចូរប្រាប់ជនជាតិអ៊ីស្រាអែលអោយវិលមកបោះជំរំ នៅក្បែរពីហាហ៊ីរ៉ុត ដែលស្ថិតនៅចន្លោះមីគដូល និង សមុទ្រ។ អ្នករាល់គ្នាត្រូវបោះជំរំទល់មុខបាលសេផុន គឺនៅតាមឆ្នេរសមុទ្រ។ 3 ស្តេចផារ៉ោននឹងគិតថា អ្នករាល់គ្នាវង្វេងវិលវល់ក្នុងតំបន់នេះ មិនអាចចេញផុតពីវាលហោស្ថានឡើយ។ 4 យើងនឹងធ្វើអោយស្តេចផារ៉ោនមានចិត្តមានះ ហើយដេញតាមអ្នករាល់គ្នា។ ប៉ុន្តែ ពេលនោះយើងនឹងទទួលសិរីរុងរឿង ដោយវាយកំទេចស្តេចផារ៉ោន និង កងទ័ពទាំងមូលរបស់គេ។ ដូច្នេះជនជាតិអេស៊ីបនឹងទទួលស្គាល់ថា យើងជាព្រះអម្ចាស់»។ ជនជាតិអ៊ីស្រាអែលក៏នាំគ្នាធ្វើតាមព្រះបន្ទូលរបស់ព្រះអង្គ។ 5 មានគេទូលស្តេចស្រុកអេស៊ីបថា ប្រជាជនអ៊ីស្រាអែលនាំគ្នារត់បាត់អស់ហើយ។ ពេលនោះស្តេច និង នាម៉ឺនមន្ត្រី ដូរគំនិត ចំពោះប្រជាជនអ៊ីស្រាអែល ហើយនិយាយគ្នាថា៖ «ហេតុអ្វីបានជាពួកយើងបណ្តោយអោយជនជាតិអ៊ីស្រាអែលចាកចេញទៅដូច្នេះ? តើបាននរណានៅបំរើពួកយើង?»។ 6 ព្រះចៅផារ៉ោនក៏អោយគេទឹមរទេះ ហើយនាំកងទ័ពចេញដំណើរទៅជាមួយ។ 7 ស្តេចបានយករទេះចំបាំងទាំងអស់នៅស្រុកអេស៊ីបចេញទៅជាមួយ ក្នុងនោះមានរទេះដ៏មាំៗចំនួនប្រាំមួយរយគ្រឿងដែលមាននាយទាហានជិះផង។ 8 ព្រះអម្ចាស់ធ្វើអោយព្រះចៅផារ៉ោនស្តេចស្រុកអេស៊ីបមានព្រះហប្ញទ័យមានះ ហើយដេញតាមជនជាតិអ៊ីស្រាអែល។ ជនជាតិអ៊ីស្រាអែលបានចាកចេញពីស្រុកអេស៊ីប ដូចជាមានសេរីភាព។ 9 កងទ័ពអេស៊ីប ទាំងទ័ពសេះ ទាំងរទេះរបស់ព្រះចៅផារ៉ោន ព្រមទាំងពលទ័ព និង រទេះទាំងប៉ុន្មាននាំគ្នាដេញតាមជនជាតិអ៊ីស្រាអែល ហើយទាន់ពួកគេនៅត្រង់ពីហាហ៊ីរ៉ុត ទល់មុខនឹងបាលសេផុន គឺកន្លែងដែលពួកគេបោះជំរំនៅក្បែរសមុទ្រ។ 10 កាលឃើញព្រះចៅផារ៉ោន និង កងទ័ពអេស៊ីបដេញតាមប្រកិតពីក្រោយដូច្នេះ ជនជាតិអ៊ីស្រាអែលភិតភ័យជាខ្លាំង ហើយស្រែកអង្វររកព្រះអម្ចាស់។ 11 ពួកគេពោលទៅកាន់លោកម៉ូសេថា៖ «តើនៅស្រុកអេស៊ីបគ្មានផ្នូរទេឬ បានជាលោកនាំពួកយើងអោយមកស្លាប់នៅវាលរហោស្ថានដូច្នេះ? ហេតុអ្វីបានជាលោកនាំពួកយើងចេញពីស្រុកអេស៊ីប។ 12 កាលរស់នៅក្នុងស្រុកអេស៊ីបនៅឡើយ ពួកយើងបានប្រាប់លោកហើយថា: ទុកអោយពួកយើងនៅបំរើជនជាតិអេស៊ីបចុះ ដ្បិតនៅបំរើគេ នោះប្រសើរជាងស្លាប់នៅវាលរហោស្ថានបែបនេះ»។ 13 លោកម៉ូសេឆ្លើយទៅប្រជាជនវិញថា៖ «កុំភ័យខ្លាចអ្វីឡើយ! ចូរតាំងស្មារតីឡើង នៅថ្ងៃនេះអ្នករាល់គ្នានឹងឃើញព្រះអម្ចាស់សង្គ្រោះអ្នករាល់គ្នា។ ជនជាតិអេស៊ីបដែលអ្នករាល់គ្នាឃើញនៅថ្ងៃនេះ អ្នករាល់គ្នានឹងលែងឃើញគេទៀតរហូតតទៅ។ 14 ចូរនាំគ្នានៅស្ងៀមចុះ ដ្បិតព្រះអម្ចាស់នឹងច្បាំងជំនួសអ្នករាល់គ្នា»។ 15 ព្រះអម្ចាស់មានព្រះបន្ទូលមកកាន់លោកម៉ូសេថា៖ «ហេតុអ្វីបានជាស្រែកអង្វរយើងដូច្នេះ? ចូរប្រាប់កូនចៅអ៊ីស្រាអែល អោយចេញដំណើរទៅ។ 16 ចូរលើកដំបងរបស់អ្នកឡើង ហើយលើកដៃតំរង់ទៅសមុទ្រ រួចវាយទឹកសមុទ្រអោយញែកចេញពីគ្នាដើម្បីអោយកូនចៅអ៊ីស្រាអែលដើរតាមបាតសមុទ្រ។ 17 រីឯយើងវិញ យើងធ្វើអោយជនជាតិអេស៊ីបមានចិត្តរឹងចចេស ដេញតាមក្រោយអ្នករាល់គ្នា។ យើងនឹងសំដែងសិរីរុងរឿងរបស់យើង ដោយប្រហារស្តេចផារ៉ោន និង ពលទ័ពទាំងមូល ព្រមទាំងកំទេចរទេះចំបាំងនិង ទ័ពសេះរបស់ស្តេច។ 18 នៅពេលដែលយើងសំដែងសិរីរុងរឿង ដោយប្រហារស្តេចផារ៉ោន ព្រមទាំងកំទេចរទេះចំបាំង និង ទ័ពសេះរបស់ស្តេច នោះជនជាតិអេស៊ីបនឹងទទួលស្គាល់ថាយើងជាព្រះអម្ចាស់ »។ 19 ទេវតារបស់ព្រះជាម្ចាស់ដែលពីមុន នៅខាងមុខជនជាតិអ៊ីស្រាអែល បានទៅនៅខាងក្រោយពួកគេ រីឯដុំពពកដែលនៅខាងមុខក៏ទៅនៅខាងក្រោយពួកគេដែរ។ 20 ដុំពពកនោះស្ថិតនៅចន្លោះកងទ័ពអេស៊ីប និង កងទ័ពអ៊ីស្រាអែល។ ដុំពពកនោះធ្វើអោយងងឹតម្ខាង និង ធ្វើអោយម្ខាងទៀតភ្លឺ នៅពេលយប់។ ហេតុនេះ ហើយបានជាពេញមួយយប់ កងទ័ពទាំងពីរមិនបានចូលទៅជិតគ្នាឡើយ។ 21 លោកម៉ូសេលើកដៃតំរង់ទៅសមុទ្រ ពេញមួយយប់នោះ ព្រះអម្ចាស់ធ្វើអោយមានខ្យល់បក់ពីទិសខាងកើតយ៉ាងខ្លាំង រុញច្រានទឹកសមុទ្រ ធ្វើអោយទឹកសមុទ្ររីងស្ងួត។ ផ្ទៃទឹកក៏ញែកចេញពីគ្នា 22 ហើយជនជាតិអ៊ីស្រាអែលនាំគ្នាដើរតាមបាតសមុទ្រ ដោយមានទឹកសមុទ្រ ដូចកំពែងនៅសងខាងពួកគេ។ 23 កងទ័ពអេស៊ីប ទាំងសេះរបស់ព្រះចៅផារ៉ោនទាំងរទេះចំបាំង និង ទ័ពសេះទាំងប៉ុន្មានដែលដេញតាមពីក្រោយ ក៏ចូលទៅកណ្តាលសមុទ្រដែរ។ 24 លុះពេលទៀបភ្លឺព្រះអម្ចាស់ដែលគង់នៅក្នុងដុំភ្លើង និង ដុំពពកទតទៅកងទ័ពអេស៊ីបធ្វើអោយកងទ័ពនោះជ្រួលច្របល់។ 25 ព្រះអង្គធ្វើអោយរទេះចំបាំងរបូតកង់ ហើយកឿងទៅមុខមិនរួច។ ជនជាតិអេស៊ីបស្រែកឡើងថា៖ «ចូរយើងនាំគ្នារត់អោយឆ្ងាយពីជនជាតិអ៊ីស្រាអែលទៅ ដ្បិតព្រះអម្ចាស់រួមជាមួយពួកគេ ច្បាំងតទល់នឹងពួកយើងហើយ!»។ 26 ព្រះអម្ចាស់មានព្រះបន្ទូលមកកាន់លោកម៉ូសេថា៖ «ចូរលើកដៃតំរង់ទៅសមុទ្រ អោយទឹកសមុទ្រវិលមកគ្របលើជនជាតិអេស៊ីបរទេះចំបាំង និង ទ័ពសេះរបស់ពួកគេ»។ 27 លោកម៉ូសេលើកដៃតំរង់ទៅសមុទ្រ។ នៅពេលថ្ងៃរះទឹកសមុទ្រក៏ហូរត្រឡប់មកកន្លែងដើមវិញ។ ជនជាតិអេស៊ីបនាំគ្នារត់គេចមិនទាន់ ដ្បិតព្រះអម្ចាស់ធ្វើអោយពួកគេលិចលង់នៅកណ្តាលសមុទ្រ។ 28 ទឹកហូរត្រឡប់មកវិញ គ្របលើរទេះចំបាំងទ័ពសេះ និង កងទ័ពទាំងមូលរបស់ព្រះចៅផារ៉ោនដែលដេញតាមជនជាតិអ៊ីស្រាអែល គ្មាននរណាម្នាក់រត់រួចឡើយ។ 29 ចំណែកឯជនជាតិអ៊ីស្រាអែលវិញ គេបានដើរតាមបាតសមុទ្រ ដោយមានទឹកសមុទ្រដូចកំពែងនៅសងខាងពួកគេ។ 30 នៅថ្ងៃនោះព្រះអម្ចាស់បានសង្គ្រោះជនជាតិអ៊ីស្រាអែល អោយរួចពីកណ្តាប់ដៃរបស់ជនជាតិអេស៊ីប។ ជនជាតិអ៊ីស្រាអែល ឃើញសាកសពជនជាតិអេស៊ីបនៅតាមឆ្នេរសមុទ្រ។ 31 ជនជាតិអ៊ីស្រាអែលឃើញឫទ្ធិបារមីដ៏ខ្លាំងពូកែរបស់ព្រះអម្ចាស់ដែលបានប្រហារជនជាតិអេស៊ីប។ ហេតុនេះហើយបានជាប្រជាជនកោតខ្លាចព្រះអម្ចាស់។ ពួកគេជឿលើព្រះអម្ចាស់ និង លោកម៉ូសេ ជាអ្នកបំរើរបស់ព្រះអង្គ។
