1 ព្រះបាទសាឡូម៉ូនបានសង់ព្រះដំណាក់ថ្វាយ ព្រះអម្ចាស់ នៅឆ្នាំទីបួនរយប៉ែតសិប ក្រោយពេលកូនចៅអ៊ីស្រាអែលចាកចេញពីស្រុកអេស៊ីប គឺនៅឆ្នាំទីបួននៃរជ្ជកាលព្រះបាទសាឡូម៉ូន ក្នុងខែពិសាខដែលត្រូវជាខែទីពីរ។ 2 ព្រះដំណាក់ដែលព្រះបាទសាឡូម៉ូនសង់ថ្វាយព្រះអម្ចាស់ មានបណ្តោយប្រវែងហុកសិបហត្ថ ទទឹងម្ភៃហត្ថ និង កំពស់សាមសិបហត្ថ។ 3 បន្ទប់ល្វែងនៅខាងមុខទីសក្ការៈនៃព្រះដំណាក់ មានបណ្តោយប្រវែងម្ភៃហត្ថ ស្របតាមប្រវែងទទឹងព្រះដំណាក់ រីឯទទឹងរបស់បន្ទប់ មានប្រវែងដប់ហត្ថ។ 4 នៅតាមជញ្ជាំងព្រះដំណាក់ ព្រះរាជាបានអោយគេធ្វើបង្អួចដែលមានដាក់ចំរឹងផង។ 5 ព្រះរាជាអោយគេសង់បន្ទប់អមភ្ជាប់ទៅនឹងជញ្ជាំងព្រះដំណាក់ពោលគឺព្រះវិហារ និង ទីសក្ការៈ។ បន្ទប់អមទាំងនោះស្ថិតនៅជុំវិញព្រះដំណាក់។ 6 ជាន់ខាងក្រោម មានទទឹងប្រាំហត្ថ ជាន់កណ្តាលមានទទឹងប្រាំមួយហត្ថ និង ជាន់ខាងលើមានទទឹងប្រាំពីរហត្ថ។ ជញ្ជាំងខាងក្រៅព្រះដំណាក់ ពីក្រោមទៅលើ មានកំរាស់មិនស្មើគ្នាទេ ធ្វើដូច្នេះ ចៀសវាងចោះជញ្ជាំងព្រះដំណាក់សំរាប់ដាក់ឈើធ្នឹម។ 7 គេសង់ព្រះដំណាក់ ដោយប្រើថ្មដែលគេដាប់ទុកជាមុន ហេតុនេះ ក្នុងពេលសង់ គេពុំឮស្នូរញញួរដែកដាប់ ឬ គ្រឿងប្រដាប់ធ្វើពីដែកណាមួយនៅក្នុងព្រះដំណាក់ទេ។ 8 ទ្វារចូលបន្ទប់ ជាន់ខាងក្រោម ស្ថិតនៅប៉ែកខាងស្តាំនៃព្រះដំណាក់ ហើយមានជណ្តើរមួយ សំរាប់ឡើងទៅជាន់កណ្តាល និង ពីជាន់កណ្តាលទៅជាន់ខាងលើ។ 9 ក្រោយពីសង់ព្រះដំណាក់រួចហើយ ស្តេចសង់ពិដាន និង ធ្នឹមអំពីឈើតាត្រៅ។ 10 ស្តេចក៏បានសង់បន្ទប់អមនៅជុំវិញព្រះដំណាក់ដែរ បន្ទប់ទាំងនោះមានកំពស់ប្រាំហត្ថ ក្នុងជាន់នីមួយៗ ហើយភ្ជាប់នឹងជញ្ជាំងព្រះដំណាក់ ដោយឈើតាត្រៅ។ 11 ពេលនោះ ព្រះអម្ចាស់មានព្រះបន្ទូលមកកាន់ព្រះបាទសាឡូម៉ូនថា៖ 12 «អ្នកកំពុងតែសង់ដំណាក់នេះសំរាប់យើង។ ប្រសិនបើអ្នកប្រតិបត្តិតាមច្បាប់របស់យើង ប្រសិនបើអ្នកគោរពតាមវិន័យរបស់យើង ហើយប្រសិនបើអ្នកកាន់ និង ធ្វើតាមបទបញ្ជារបស់យើងនោះ យើងនឹងប្រព្រឹត្តចំពោះអ្នកតាមពាក្យដែលយើងបានសន្យាជាមួយដាវីឌជាបិតារបស់អ្នក។ 13 យើងនឹងស្ថិតនៅជាមួយជនជាតិអ៊ីស្រាអែល យើងនឹងមិនបោះបង់ចោលអ៊ីស្រាអែល ជាប្រជារាស្ត្ររបស់យើងឡើយ »។ 14 ក្រោយបានសង់ព្រះដំណាក់រួចហើយព្រះបាទសាឡូម៉ូន 15 អោយគេពាសជញ្ជាំងខាងក្នុងពីឈើតាត្រៅ តាំងពីក្រោមរហូតដល់ពិដាន ព្រមទាំងក្រាលក្តារពីឈើកកោះដែរ។ 16 ស្តេចអោយគេយកឈើតាត្រៅ ពាសជញ្ជាំងប៉ែកខាងក្រោយព្រះដំណាក់ពីក្រោមរហូតដល់លើ មានប្រវែងម្ភៃហត្ថ។ ផ្នែកខាងក្នុងនេះ ទ្រង់អោយគេរៀបចំធ្វើជាទីសក្ការៈ និង ទីសក្ការៈបំផុត។ 17 បន្ទប់ធំដែលនៅខាងមុខទីសក្ការៈមានបណ្តោយសែសិបហត្ថ។ 18 ឈើតាត្រៅដែលគេពាសផ្នែកខាងក្នុងព្រះដំណាក់ មានឆ្លាក់ជាក្បាច់រចនារូបផ្កាក្រពុំ និង រូបផ្ការីក។ គេពាសជញ្ជាំងទាំងអស់ពីឈើតាត្រៅ ដោយឥតឃើញថ្មឡើយ។ 19 ស្តេចរៀបចំទីសក្ការៈនៅផ្នែកខាងក្រោយព្រះដំណាក់ សំរាប់តម្កល់ហិបនៃសម្ពន្ធមេត្រីរបស់ព្រះអម្ចាស់។ 20 ជ្រុងនីមួយៗរបស់ទីសក្ការៈមានប្រវែងម្ភៃហត្ថ កំពស់ម្ភៃហត្ថ ហើយស្រោបមាសសុទ្ធទាំងអស់។ រីឯអាសនៈមានពាសទៅដោយឈើតាត្រៅ។ 21 ព្រះបាទសាឡូម៉ូនបានយកមាសសុទ្ធមកស្រោបប៉ែកខាងក្នុងព្រះដំណាក់ ហើយយកច្រវាក់ធ្វើពីមាសមកចងខ័ណ្ឌនៅមុខទីសក្ការៈដែលស្តេចបានស្រោបមាសដែរ។ 22 ដូច្នេះព្រះដំណាក់ទាំងមូលសុទ្ធតែស្រោបមាស អាសនៈនៅខាងមុខទីសក្ការៈក៏ស្រោបមាសដែរ។ 23 នៅក្នុងទីសក្ការៈ ស្តេចអោយគេឆ្លាក់រូបចេរូប៊ីន មួយគូធ្វើអំពីឈើអូលីវ ចេរូប៊ីននីមួយៗមានកំពស់ដប់ហត្ថ។ 24 ស្លាបនីមួយៗរបស់ចេរូប៊ីនទីមួយ មានប្រវែងប្រាំហត្ថ គឺពីចុងស្លាបម្ខាងទៅចុងស្លាបម្ខាងទៀត មានប្រវែងដប់ហត្ថ។ 25 ស្លាបទាំងពីររបស់ចេរូប៊ីនទីពីរ ក៏មានប្រវែងដប់ហត្ថដែរ។ ចេរូប៊ីនទាំងពីរ មានទំហំ និង ទ្រង់ទ្រាយដូចគ្នា។ 26 ចេរូប៊ីនទីមួយមានកំពស់ដប់ហត្ថ ហើយរូបទីពីរក៏មានកំពស់ប៉ុនគ្នាដែរ។ 27 ស្តេចដាក់ចេរូប៊ីនទាំងពីរនៅកណ្តាលទីសក្ការៈចេរូប៊ីនទាំងពីរត្រដាងស្លាប គឺចុងស្លាបចេរូប៊ីនទីមួយលាតទៅទល់នឹងជញ្ជាំងម្ខាង រីឯចុងស្លាបចេរូប៊ីនទីពីរលាតទៅទល់នឹងជញ្ជាំងម្ខាងទៀត។ ចុងស្លាបម្ខាងទៀតរបស់ចេរូប៊ីននីមួយៗលាតទល់គ្នានៅចំកណ្តាលទីសក្ការៈ។ 28 ស្តេចអោយគេស្រោបរូបចេរូប៊ីនទាំងពីរនេះ ដោយមាស។ 29 នៅតាមជញ្ជាំងព្រះដំណាក់ទាំងខាងក្នុង និង ខាងក្រៅ ស្តេចអោយគេឆ្លាក់ក្បាច់ចេរូប៊ីនក្បាច់ដើមចាក និង ក្បាច់ផ្ការីកផង។ 30 រីឯក្តារក្រាលព្រះដំណាក់ទាំងខាងក្នុង ទាំងខាងក្រៅសុទ្ធតែស្រោបមាស។ 31 នៅច្រកចូលទីសក្ការៈ ស្តេចអោយគេធ្វើទ្វារពីឈើអូលីវ។ ក្របទ្វារនេះមានកំពស់មួយភាគប្រាំនៃជញ្ជាំង។ 32 សន្លឹកទ្វារទាំងពីរធ្វើពីឈើអូលីវ។ នៅលើសន្លឹកទ្វារទាំងពីរនោះស្តេចអោយគេឆ្លាក់ក្បាច់ចេរូប៊ីនក្បាច់ដើមចាក និង ក្បាច់ផ្ការីក ព្រមទាំងស្រោបមាស គឺទាំងក្បាច់ចេរូប៊ីនទាំងក្បាច់ដើមចាកសុទ្ធតែស្រោបមាស។ 33 រីឯច្រកចូលព្រះវិហារ ស្តេចអោយគេធ្វើក្របទ្វារពីឈើអូលីវដែរ។ ក្របទ្វារនោះមានកំពស់មួយភាគបួននៃជញ្ជាំង។ 34 សន្លឹកទ្វារទាំងពីរធ្វើពីឈើកកោះ សន្លឹកនីមួយៗមានពីរផ្ទាំងដែលអាចបត់ចូលគ្នាបាន។ 35 នៅលើសន្លឹកទ្វារទាំងពីរស្តេចអោយគេឆ្លាក់ក្បាច់ចេរូប៊ីនក្បាច់ដើមចាក និង ក្បាច់ផ្ការីក ព្រមទាំងស្រោបមាសតំរូវតាមក្បាច់នោះផង។ 36 បន្ទាប់មក ស្តេចអោយគេធ្វើទីលានខាងក្នុងពីថ្មដាប់បីជាន់ និង ឈើតាត្រៅមួយជាន់។ 37 ក្នុងឆ្នាំទីបួន នៃរជ្ជកាលព្រះបាទសាឡូម៉ូននៅខែពិសាខ គេបានចាក់គ្រឹះព្រះដំណាក់របស់ព្រះអម្ចាស់។ 38 ក្នុងឆ្នាំទីដប់មួយនៃរជ្ជកាលព្រះបាទសាឡូម៉ូន នៅខែកត្តិក គឺជាខែទីប្រាំបី គេបានសង់ព្រះដំណាក់រួចជាស្រេចតាមគំរោងសំណង់។ ដូច្នេះ ព្រះបាទសាឡូម៉ូនសង់ព្រះដំណាក់ អស់រយៈពេលប្រាំពីរឆ្នាំ។
