1 N nɩmballɩ, nɩ mana sɩba mɩra, die wɩa nɩ nan bɩagɩ sɩba wudieke n bala n balɩ naa chɩaŋ. Mɩra yige vuodieke dɩ benne ʊ miivoli me mɩŋ. 2 Die wɩa mɩraha sʊŋ, dɩ yiwo talasɩ dɩ hɔgʊ lagɩma aŋaŋ ʊ chʊrʊ saŋŋa dieke ʊ chʊrʊ dɩ yene bie ʊ mɩsɩ ma, ama saŋŋa dieke ʊ chʊrʊ wa dɩ keŋ kpi, mɩraha ka bɩ yigi hɔgʊ wa. 3 Die wɩa, dɩɩ yi saŋŋa dieke ʊ chʊrʊ wa dɩ yene bie ʊ mɩsɩ ma, ta ʊ beri aŋaŋ dembigaaŋ, ba nan dɩ wasa wa daakpannagɩrʊ; ama dɩɩ yi ʊ chʊrʊ wa dɩ kpi, mɩraha kaaŋ bɩ yigi wo. Dɩɩ yi ʊ yallɩ dembigaaŋ ʊ chʊrʊ wa kuŋ kʊaŋ chaaŋ, ʊ ka yi daakpannagɩrʊ. 4 N nɩmballɩ, die gbaŋ die dɩ sɩɩ aŋaŋ nɩ, nɩ yiwo Masia nyɩŋgbanɩŋ lʊgɩŋ, ta die kpi ta mɩraha ka bɩ yige nɩ, ama lele nɩŋ nɩ taasɩya mɩŋ aŋaŋ Masia vuodieke die dɩ hagɩna kumbu me wo, nɩ yime wʊvɩɩna a yɩma Ŋmɩŋ. 5 Saŋŋa dieke dɩ tɩanna wa die tɩ yie tɩ nyɩŋgbanɩŋ choti ta mɩraha dɩ vaa tɩ yaa lɔlɩbɩatɩ ta a tʊma tɩ nyɩŋgbanɩŋ ma, ta yaa wudieke dɩ yine kuŋ a kieŋ tɩ ma. 6 Ama lele nɩŋ, mɩraha ka bɩ yigi tɩ, dama die tɩ kpiye mɩŋ ta mɩraha dɩ bɩ wo tɩ hagɩrɩŋ. Die wɩa, tɩ wa bɩagɩ a tʊma yɩa Ŋmɩŋ aŋaŋ miivoli haalɩ dieke Ŋmɩŋ Halɩkasɩka dɩ yɩna tɩ wa; tɩ ka bɩ tʊma aŋaŋ mɩrɩkʊraha die ba maagɩna gbaŋkʊ ma wa. 7 Die wɩa, bɩa tɩ baa tɩ balɩ? Tɩ nan balɩ dɩ mɩraha ka vɩɩna yaa? Aayɩ, tɩ kaaŋ balɩ die. Mɩraha dɩ tɩŋ wori, n tɩŋ kaaŋ dɩ sɩba bɩaŋ dɩ yine jadieke. Mɩraha dɩ tɩŋ ka dagɩya dɩ n daa yallɩma lɔla aŋaŋ n chanchaaŋ jaaŋ, n tɩŋ kaaŋ dɩ sɩba lɔla dɩ yine jadieke. 8 Ama bɩaŋ ye wo ka hagɩrɩŋ a nyɩŋ wa mɩraha sʊŋ, ta lɔla yiri yiri pam dɩ hagɩ n sʊŋ ma. Mɩraha dɩ tɩŋ wori, bɩaŋ tɩŋ nan yi jakpiikiŋ. 9 Saŋŋa dieke die n kana ka sɩba mɩraha, die n yaa miivoli mɩŋ; ama n kenne sɩba mɩraha, bɩaŋ dieke dɩ benne n sʊkʊ dɩ hagɩ, 10 ta maŋ kpi. Ta mɩra dieke dɩ tɩnna mʊ ka yaa miivoli a keŋ wo, die dɩ yaa kuŋ a keŋ. 11 Bɩaŋ die dɩ ye sieŋ mɩraha sʊŋ ta gaaŋ mɩŋ, ta kʊʊ mɩŋ. 12 Mɩraha aŋaŋ ka dagɩkʊ nɩŋ yiwo kasɩ, ta yi wusie ta bɩ vɩɩna. 13 Die nɩŋ, dɩ baaŋ dagɩ dɩ wudieke dɩ vɩɩna wa yalla kumbu a keŋ n ma wa? Aayɩ, daa die. Bɩaŋ dɩ wa wudieke dɩ vɩɩna a yaa kumbu a keŋ n ma, amʊ ka nan yuori dagɩ tɩ bɩaŋ dɩ sɩna dene. Die wɩa tɩ wa sɩba dɩ bɩaŋ faasɩ yiwo jabɩaŋ pam. 14 Tɩ sɩba a baarɩ dɩ mɩraha nyɩŋ wa Ŋmɩŋ jigiŋ, ama manɩŋ nɩŋ n yiwo vuota, ta yi bɩaŋ yɔmʊ. 15 N ka sɩba wudieke n yinene chɩaŋ; ta ka yie wʊvɩɩna dieke n yaalala dɩ n yi; ama ta yie tʊmbɩatɩ dieke n hana. 16 Dɩɩ yi maŋ yie tʊmbɩatɩ dieke n kana ka yaala dɩ n yi, dɩ dagɩya dɩ n saagɩya mɩŋ dɩ mɩraha vɩɩna mɩŋ. 17 Die wɩa, dɩ ka yi n gbaŋ n tʊnnanaha, ama dɩ yiwo bɩa dieke dɩ benne a ma wa vanana maŋ yie he. 18 N sɩba a baarɩ dɩ wʊvɩɩnɩŋ wo n sʊŋ ma, n yaala n yiwo wudieke dɩ vɩɩna, ama n ka bɩagɩ yie ke. 19 Wʊvɩɩŋ dieke n yaalala dɩ n yi wo, n ka bɩagɩ yie, ama ta tʊmbɩatɩ dieke n kana ka yaala dɩ n yiwo, kanɩŋ ma yie. 20 Die wɩa, dɩɩ yi maŋ yie wudieke n kana ka yaala dɩ n yiwo, dɩ dagɩya dɩ daa manɩŋ n gbaŋ n yinene he ama dɩ yiwo bɩa dieke dɩ benne n ma yinene he. 21 Wʊbalɩmɩŋ maŋ ye ta ka bie n ma saŋŋa mana, maŋ keŋ yaala dɩ n yi wudieke dɩ vɩɩna, bɩaŋ ŋaaŋ beri aŋaŋ mɩŋ. 22 Ŋmɩŋ mɩraha yɩnana mɩŋ sʊgɩfɩalɩŋ, 23 ta maŋ yese mɩrɩ dieke dɩ tʊnnana n nyɩŋgbanɩŋ ma a waga aŋaŋ mɩrɩ dieke n sʊŋ dɩ yaalala, ta bɔbɩ mɩŋ sɩba dansarɩka vuoŋ, dɩ n saagɩ a yi bɩa dieke dɩ benne n sʊŋ ma wa. 24 Aba, n yiwo sʊgɩchʊʊsɩŋ tieŋ. Mɩnɩa baaŋ gbatɩ mɩŋ a nyɩŋ nyɩŋgbaŋ dieke dɩ yalla mɩŋ a gara kuŋ me naa? 25 N bɩra Ŋmɩŋ vuodieke dɩ gbatɩna mɩŋ a taaŋ naa, tɩ Yɔmʊtieŋ Yisa Masia wɩa. Die wɩa, n dɩ wa Ŋmɩŋ mɩraha n sʊŋ ma, ama ta n nyɩŋgbanɩŋ dɩaŋ dɩ dɩ bɩaŋ sieku.
