1 Bɩa nyʊarɩ Juu vuosi dɩ ye a tɩaŋ vuodiekemba dɩ kana ka yi Juu vuosi? Ba kɔla gobiŋ yaa nyʊarɩ? 2 Ka yaa nyʊarɩ pam. Wudieke Ŋmɩŋ dɩ yɩna Juu vuosisi ka yi nɩŋŋmɩna jaaŋ a tɩaŋ a mana die ʊ yiwo ʊ wɩaha, dɩ ba gbara. 3 Dɩ yiwo wusie dɩ bataŋ die ka yi wɩaha yada. Die nɩŋ dɩ dagɩya dɩ Ŋmɩŋ ka yi wusietieŋ ba kana ka yi yada wa wɩa? 4 Aayɩ, ka ka dagɩ die. Dɩɩ yi vuoŋ mana dɩ yi ŋmɩnchɩbɩtieliŋ, ama Ŋmɩŋ nɩŋ yiwo wusiebɩbalɩtʊ. Sɩba ba maagɩna Ŋmɩŋ gbaŋkʊ sʊŋ die wo dɩ: “Dɩɩ yi fʊnɩŋ Ŋmɩŋ fʊ balɩ wɩa, ba nan ye dɩ yaa wusie ta ba dii fʊ sarɩya, nan dii wusie.” 5 Ama dɩɩ yi tɩ tʊntʊmbɩatɩ dɩ dagɩ dɩ Ŋmɩŋ yaa wusie, bɩa tɩ baaŋ tɩ balɩ? Dɩɩ yi Ŋmɩŋ dɩ datɩ tɩ tɩba tɩ nan bɩagɩ balɩ dɩ Ŋmɩŋ yiwo bɩaŋ? (Vuota sʊŋanyile maŋ bala naa.) 6 Aayɩ daa die! Ŋmɩŋ dɩ seŋ ka yi wusiebɩbalɩtʊ, lalɩa ʊ baa ʊ yi a dii tɩŋgbaŋka gie vuosi sarɩya? 7 Vuoŋ nan dɩ nɩga nɩnhagɩrɩŋ dɩ, “Dɩɩ yi n ŋmɩnchɩbɩsɩ dɩ daga dɩ Ŋmɩŋ seŋ yiwo wusietieŋ, ta vuosi dɩ yɩa wa jɩlɩma, bɩa wɩa ʊ nan datɩ n tɩbɩŋ dɩ n yiwo wʊbɩayiiru?” 8 Bataŋ dɩaŋ dɩ bala dɩ, “Nɩ vaa tɩ yi wʊbɩatɩ amʊ wʊvɩɩna nan keŋ.” Vuosi bataŋ zɩa mɩŋ ta baarɩ dɩ manɩŋ n bala naa. Ŋmɩŋ nan datɩ ba tɩbɩŋ sɩba ba mʊna die. 9 Lalɩa tɩ baa tɩ balɩ? Tɩnɩŋ vuodiekemba dɩ yine Juu vuosi wo beriŋ tɩaŋ wa vuodiekemba dɩ kana ka yi Juu vuosisi beriŋ mɩŋ? Aayɩ, n wɔŋ balɩ mɩŋ dɩ Juu vuosi aŋaŋ vuodiekemba dɩ kana ka yi Juu vuosi mana bie wo bɩaŋ ma, 10 sɩba dɩ maagɩna Ŋmɩŋ gbaŋkʊ sʊŋ dɩ: “Vuoŋ wori a yi vuovɩɩnʊ, Aayɩ, daa vuobalɩmɩŋ gbaŋ. 11 Vuoŋ wori ta yaa sɩbɩŋ, ta vuoŋ ka jɩama Ŋmɩŋ. 12 Vuoŋ mana yiŋŋiye mɩŋ ta vaa Ŋmɩŋ, vuoŋ mana yiwo bɩaŋ; vuoŋ wori a yie vɩɩnɩŋ, daa vuobalɩmɩŋ gbaŋ. 13 Ba nʊa sɩɩ sɩba kunti vɔrɩtɩ ta ŋmɩnchɩbɩsɩ dɩ nyɩnna a ma, ta wudieke dɩ nyɩnnana ba nʊa ma sɩɩ sɩba javʊʊkɩŋ tʊaŋ; 14 ba nʊa suuli wo aŋaŋ kaatɩtʊatɩ. 15 Ta ba yie lagɩ dɩ ba yi vuoŋ daŋŋa ta kʊʊ; 16 ta jigidieke mana ba gana, chʊʊsɩŋ aŋaŋ sʊgɩchʊʊsɩŋ ŋaaŋ kieŋ mi. 17 Ta ba ka sɩba sie dieke ba baa nan dɩɩ a ye sʊgɩdʊagɩŋ. 18 Ta ba ka bɩ chɩga Ŋmɩŋ.” 19 Lele, tɩ sɩba dɩ wudieke mana Ŋmɩŋ mɩraha dɩ bala wa, bala yɩa vuodiekemba dɩ benne ka yiko me, amʊ vuoŋ mana kaaŋ bɩagɩ yuori ʊ nʊaŋ a balɩ wɩɩŋ, ta tɩŋgbaŋka gie vuosi mana bemme Ŋmɩŋ sarɩya diile me. 20 Dama vuoŋ wori a nan bɩagɩ a dɩɩ Ŋmɩŋ mɩraha dɩ dagɩna die a yi vuovɩɩnʊ Ŋmɩŋ nɩŋŋa; mɩraha wɩa vuota dɩ sɩba dɩ ʊ tʊma tʊmbɩatɩ. 21 Ama lele, Ŋmɩŋ dɩ daagɩnana sie dieke a vasɩnana vuota dɩ bɩrɩma vuovɩɩnʊ ʊ nɩŋŋa wa wa bie yaalɩŋ ma, ta ʊ naazʊalɩŋ wɩa aŋaŋ mɩraha dɩ daga a wɩa, ama dɩ ka nyɩŋ mɩraha dɩɩsɩŋ ma. 22 Ŋmɩŋ vasa vuota dɩ bɩrɩma vuovɩɩnʊ ʊ nɩŋŋa ba yine Yisa Masia yada wa wɩa. Ŋmɩŋ yie naa, a yɩa vuodiekemba mana dɩ yine Yisa Masia yada ta ka luge, 23 dama vuota mana yiwo bɩaŋ die wɩa tɩ ka bie vɩɩnɩŋ sɩba Ŋmɩŋ dɩ yaalala dene wo. 24 Ama Ŋmɩŋ zɔɔlɩnchɩgɩla wɩa ʊ baarɩ dɩ ba yi vuovɩɩna ʊ nɩŋŋa, ka yiwo piini, dama Yisa Masia gbatɩ tɩ a taaŋ mɩŋ yɔrɩ. 25 Ŋmɩŋ die vaa wa Yisa Masia dɩ nyɩŋ yaalɩŋ ma, ta bɩ yi ʊ zɩŋ dieke dɩ nyɩnna ʊ ma wa dɩ yi kaabɩŋ tɩ bɩaŋ wɩa, dɩɩ yi tɩ yi naa yada Ŋmɩŋ nan nagɩ chaa tɩ tɩ talɩ; naa daga dɩ Ŋmɩŋ yiwo sʊgɩyɩalɩntieŋ. Saŋŋa dieke dɩ tɩanna wa, Ŋmɩŋ die ka datɩ vuota tɩbɩŋ ba tʊmbɩatɩ wɩa, dama ʊ suguru wɩa; 26 ama lele nɩŋ die ʊ yie, amʊ ka nan dagɩ tɩ dɩ wʊnɩŋ Ŋmɩŋ yiwo sʊgɩyɩalɩntieŋ, ta vasa vuodieke nɩŋ mana dɩ yine Yisa yada dɩ bɩrɩma vuovɩɩnʊ ʊ nɩŋŋa. 27 Die wɩa, jaaŋ beri mɩŋ tɩ nan kuuli aŋaŋ ka? Aayɩ, jaaŋ wori. Daa vuota dɩ dɩna mɩraha wɩa tɩ nan ye gbatɩtaanɩŋ, ama tɩ yine Yisa Masia yada wa wɩa. 28 Dama tɩ bala a baarɩ dɩ vuota yada yiile wɩa, Ŋmɩŋ dɩ baarɩ dɩ ʊ yi vuovɩɩnʊ ʊ nɩŋŋa; daa ʊ dɩna mɩraha wɩa. 29 Ŋmɩŋ yiwo Juu vuosi nyɩɩna ma Ŋmɩŋ? Aayɩ, Ʊ yiwo Juu vuosi aŋaŋ vuodiekemba dɩ kana ka yi Juu vuosi Ŋmɩŋ. 30 Ŋmɩŋ yiwo Ŋmɩŋ balɩmɩŋ ta nan balɩ dɩ Juu vuosi aŋaŋ vuodiekemba dɩ kana ka yi Juu vuosi mana yiwo vuovɩɩna ʊ nɩŋŋa, ba yada wɩa. 31 Tɩ balala dɩ vuota yese gbatɩtaanɩŋ ʊ yada wɩa, die nan yi mɩraha yi yɔrɩ? Aayɩ, daa die. Ama tɩ ye zie wo mɩraha kʊaŋ mɩŋ.
