1 Womi die maŋ ye ŋmɩŋsikpeŋ haalɩŋ aŋaŋ tɩŋgbaŋ haalɩŋ, ta bʊmbʊŋaŋ ŋmɩŋsikpeku aŋaŋ bʊmbʊŋaŋ tɩŋgbaŋka die dɩ bɩa, ta mʊgɩkpɩɩma ha dɩaŋ dɩ nyɩɩgɩ. 2 Ta maŋ ye Ŋmɩŋ tɩŋ dieke dɩ yine Jerusalemi haalɩkʊ dɩ nyɩnna Ŋmɩŋ jigiŋ arɩzanna ma a keŋ sʊʊna a yi siri a gbarɩ sɩba hɔgʊ dɩ ŋaana mɩŋŋɩ bɔbɩ a gbara dɩ ʊ tuoli ʊ chʊrʊ wa. 3 Ta die wʊŋ lɔlɩkpeŋkpɩɩŋ dɩ balala nyɩnna naagbaŋkʊ ma dɩ, “Lele, Ŋmɩŋ tigiŋ wa bie wo vuota jigiŋ, ta wʊnɩŋ Ŋmɩŋ nan dɩ beri aŋaŋ ba, ta ba yi ʊ vuosi. Ta ʊ gbaŋ gbaŋ ʊ nan dɩ beri aŋaŋ ba ta yi ba Ŋmɩŋ. 4 Ʊ nan chiti ba nintaantɩ mana, ta kuŋ yaa sʊgɩchʊʊsɩŋ yaa kpaŋ, yaa yʊagɩŋ kaaŋ dɩ beri bɩbra, dama wʊkʊra mana nan tɩaŋ ga.” 5 Womi vuodieke die dɩ kalla naagbaŋtɩ ma wa dɩ baarɩ dɩ, “Lele, n yi wo nyinti mana nyɩŋhaala.” Ta die bɩ balɩ a yɩ mɩŋ dɩ, “Maagɩ wɩaha gie dama wɩaha gie yiwo wusie ta vuoŋ nan bɩagɩ a tuohe a dii.” 6 Ta ʊ bɩ balɩ mɩŋ dɩ, “Ka wɔŋ yi mɩŋ. Manɩŋ n yine Alifa aŋaŋ Omega wa; ka chɩaŋ yiwo, piiliŋ aŋaŋ kpatɩŋ. Vuodiekemba nyanyuule dɩ yalla ba wa, n nan yɩ ba miivoli nyaaŋ dɩ bulinene a nyɩna buluŋ me aŋ ba nyu yɔrɩ. 7 Ta vuodieke nɩŋ mana dɩ nyaŋŋɩna nyaŋŋɩkʊ gie, nan ye nyinti gie mana a nyɩŋ n jigiŋ, ta n nan yi ʊ Ŋmɩŋ, ta ʊ dɩaŋ ʊ yi n bʊa. 8 Ama ŋmaantielibe, aŋaŋ vuodiekemba dɩ wone yada wa, aŋaŋ vuodiekemba dɩ yinene bɩaŋ, aŋaŋ vuokʊʊrɩŋ, aŋaŋ vuodiekemba dɩ yinene dɩgɩntɩ tʊʊma, aŋaŋ vuodiekemba dɩ bʊgɩnana, aŋaŋ vuodiekemba dɩ jɩannana bugile, aŋaŋ ŋmɩnchɩbɩtielibe mana, ba jigiberisikiŋ yiwo vɔrɩgoli dieke dɩ dinene boliŋ aŋaŋ maafa jiribi wo me, ka yine kuŋ dieke dɩ gʊtɩna bule wo.” 9 Die malakasi ayʊpɔyɩ diekemba die dɩ pɔgɩlɩna tɩmbala ayʊpɔyɩ ta a suuli aŋaŋ kpatɩŋ wahalaha wʊnyɩ die dɩ keŋ n jigiŋ a balɩ mɩŋ dɩ, “Keŋ giena aŋ n dagɩ fʊ hɔgʊhaalʊ wa, wʊnɩŋ ʊ yine Yiipɔlɩka hɔgʊ wa.” 10 Womi die Ŋmɩŋ Halɩkasɩka die dɩ hagɩ n ma, malakaka die dɩ nagɩ mɩŋ a ga jʊalɩ a zieŋ taŋ dieke dɩ faasɩna a bɩrɩŋ sikpeŋ biŋ me, a dagɩ mɩŋ Ŋmɩŋ tɩŋ Jerusalemi dɩ nyɩnna arɩzanna ma Ŋmɩŋ jigiŋ a keŋ sʊʊna wa. 11 Ta die nyɩgɩsa aŋaŋ Ŋmɩŋ chuulikpeŋkpɩɩŋ, ta bɩ nyɩgɩsa sɩba tanbɩsɩ diekemba dɩ faasɩna a yaa ligire ba wasa ha jasipa wa, ta bɩ nyɩgɩsa sɩba nyaasɩga. 12 Ta tɩka dɩ yaa gaaŋkpɩɩŋwaŋ a giliŋ ke, ta ka yaa sanʊa baŋ aŋaŋ ale ta malakasi baŋ aŋaŋ bale dɩ gbarɩ sanʊaha kaanɩ mana. Ta Izara buuriŋ baŋ aŋaŋ bale wo saara dɩ maagɩ a diisi sanʊaha kaanɩ mana ma. 13 Die sanʊa ataa die dɩ bie ŋmɩŋ pɔsɩŋ chaaŋ, ta a ataa dɩ bie nuudiigiŋ chaaŋ, ta ataa dɩ bie ŋmɩŋ nanɩŋ chaaŋ ta ataa dɩaŋ dɩ bie nuugalɩ chaaŋ. 14 Tɩka nyabɩlɩŋ zie wo tana baŋ aŋaŋ ale me, ta Yiipɔlɩka tʊntʊntɩba baŋ aŋaŋ bale wo wʊnyɩ mana saaŋ die dɩ maagɩ a diisi a kaanɩ mana ma. 15 Malaka dieke die dɩ balala wɩa aŋaŋ mɩŋ wa die dɩ pɔgɩlɩ daa dieke ba nagɩna a magɩsa nyinti ta ba nagɩ salɩma a wʊnsɩ ka, dɩ ʊ magɩsɩ tɩka aŋaŋ ka sanʊaha aŋaŋ ka gaamaha. 16 Tɩka lʊga anɩɩsa wa mana die mʊwa taŋ, malakaka die dɩ magɩsɩ ka a ye ta ka wagɩrɩŋ die yiwo malisi tusiŋ aŋaŋ kɔbɩsɩ-nʊ. Ka teeliŋ aŋaŋ ka jʊalɩŋ gbaŋ dɩ mʊ die gbaŋ gbaŋ. 17 Ta ʊ bɩ magɩsɩ tɩka gaanɩ jʊalɩŋ, ka dɩaŋ ka yi naŋ magɩsɩŋ kɔbɩsɩ-le aŋaŋ baŋ aŋaŋ ayʊaba. Die ʊ magɩsɩya mɩŋ sɩba vuotaŋ dɩ ŋaana magɩsa nyinti dene wo. 18 Die ba nagɩ wa taŋ diekemba ba wasɩnana Jasipa a mɩɩ tɩka gaanɩ, ta nagɩ salɩma a mɩɩ tɩka aŋaŋ ka nyinti mana ta ka nyɩgɩsa sɩba nyaasɩga. 19 Die ba nagɩ taŋ vɩɩŋ diekemba dɩ faasɩna a yaa ligire yiri yiri a dʊaŋ gaamaha nyabɩlɩŋ. Bʊmbʊŋaŋ tanɩ die yiwo jasipa, ta taŋ dieke dɩ gʊtɩna bule wo dɩ yi saafari, ta taŋ dieke dɩ gʊtɩna bʊtaa wa ma die yiwo agatɩ, ta taŋ dieke dɩ gʊtɩna bʊnɩɩsa wa die yiwo emalerali, 20 ta taŋ dieke dɩ gʊtɩna bʊnʊ wa ma die yiwo onikisi, ta taŋ dieke die dɩ gʊtɩna bʊyʊaba wa die yiwo kaneliani, ta taŋ dieke die dɩ gʊtɩna bʊyʊpɔyɩ wa die yiwo kirisollati, ta buniiŋ wo dɩ yi berili, ta bʊwayɩ wa dɩ yi topasi, ta baŋka ma wa dɩ yi kirisopasi, ta jadieke die dɩ gʊtɩna baŋ aŋaŋ kaanɩ wa dɩ yi jasinti, ta baŋ aŋaŋ ale wo dɩ yi ametisi. 21 Ta ka sanʊa baŋ aŋaŋ ale wo die yiwo taŋ dieke ba wasɩnana peeli wo, ta ba nagɩ ka taŋ balɩmɩŋ a wʊnsɩ sanʊaŋ mana. Ta nagɩ salɩma a wʊnsɩ tɩka siekpɩɩkʊ ta ka nyɩgɩsa sɩba nyaasɩga. 22 Die n ka ye Ŋmɩŋ jɩamɩŋ juoŋ tɩka ma, dama tɩ Yɔmʊtieŋ Nabidie Ŋmɩŋ vuodieke dɩ yalla hagɩrɩbʊ mana aŋaŋ Yiipɔlɩka, banɩŋ ba benne mi ta vuosisi dɩ jɩama ba. 23 Ta tɩka die ka bɩ yaala chaanɩŋ a nyɩna ŋmɩŋ yaa chɩɩkʊ jigiŋ, dama Ŋmɩŋ chuulikpeŋkpɩɩkʊ die chaana yɩa ka mɩŋ ta Yiipɔlɩka dɩaŋ dɩ yi ka popoli. 24 Ta tɩŋgbaŋka gie vuosi mana nan dɩ bie chaaŋkʊ ma, ta tɩŋgbaŋka gie naakpɩɩmaha nan yaa ba nyinti a keŋ ka ma. 25 Tɩka sanʊaha mana nan yuori zie daaŋ mana ta kaaŋ wɔŋ ligi, dama yuŋ kaaŋ dɩ bie mi. 26 Ta tɩŋgbaŋka gie buuriŋ mana nan yaa nyɩŋvɩɩna aŋaŋ ba nyinti mana a keŋ tɩka ma. 27 Ama jadieke dɩ kana ka yi kasɩ yaa vuodiekemba dɩ yinene viivi tʊʊma yaa a chɩba ŋmɩnchɩbɩsɩ kaaŋ juu tɩka ma, sie vuodiekemba ba maagɩna ba saara a yi Yiipɔlɩka miivoli gbaŋkʊ ma wa nyɩɩna ma baaŋ juu ka ma.
