1 Yisa die dɩ wa ʊ kʊaŋandɩɩsɩrɩba baŋ aŋaŋ bale wo a lagɩsɩ ʊ jigiŋ a yɩ ba yiko dɩ ba vʊarɩma jɩmbɩatɩ ta gbaama yʊagɩtɩ yiri yiri aŋaŋ vuodiekemba dɩ yʊagɩna yʊagɩbɩatɩ mana mana. 2 Ʊ tʊntʊntɩba baŋ aŋaŋ bale wo saara wʊnna; Simoni, (vuodieke ba bɩna a wasa Piita) aŋaŋ ʊ nɩmbʊabiŋ Andurusi; aŋaŋ Jemisi aŋaŋ ʊ nɩmbʊabiŋ Jɔɔn, Zebedi ballɩ; 3 aŋaŋ Filipi aŋaŋ Batolomiwo; aŋaŋ Tomasi aŋaŋ Matiwo, vuodieke die dɩ yine lampotuosiru wo; aŋaŋ Jemisi vuodieke dɩ yine Alifusi bʊa aŋaŋ Tadeusi, 4 aŋaŋ Simoni vuodieke dɩ yaala banɩŋ Juu vuosi yalla ba gbaŋ aŋaŋ Judasi Asikaroti, vuodieke die dɩ bala ʊ posi Yisa chɩaŋ. 5 Ta Yisa die dɩ tʊŋ ʊ kʊaŋandɩɩsɩrɩba baŋ aŋaŋ bale wo ta kpaaŋ ba, “Nɩ sɩmma nɩ keŋ a ga vuodiekemba dɩ kana a ka yi Juu vuosi buuriŋ yaa nɩ ga juu Samaria vuosi tɩŋ ma. 6 Ama nɩ gamma Izara vuosi jigiŋ nyɩɩna, ba sɩna sɩba yii diekemba dɩ bana. 7 Nɩ ganana wa nɩ balɩma Ŋmɩŋ wɩarɩ gie; ‘Ŋmɩŋ naarɩ diile saŋŋa gbigiye mɩŋ.’ 8 Nɩ gbaama vuodiekemba dɩ yʊagɩna, ta nɩ vaa kunti hagɩ kuŋ me, ta gbaaŋ vuodiekemba gamɩŋ yʊagɩŋ dɩ yalla ba, ta yagɩ jɩmbɩatɩ vuosi ma. Nɩ tuo wo yɔrɩ die wɩa nɩ gbaŋ nɩ nagɩ a yɩ yɔrɩ. 9 Nɩ da a keŋ nagɩ ligire. Nɩ sɩmma nɩ keŋ a nagɩ kobu gbaŋ a su nɩ ligire bʊlɔga ma; 10 Nɩ da keŋ a nagɩ bʊlɔga a gamma nɩ sieku; yaa nɩ pɔgɩlɩ jayeeki gaaŋ a gʊtɩ jadieke nɩ yeegine ma wa, yaa nɩɩrɩ gaasɩ a gʊtɩ nyindiekemba nɩ suune womi, yaa nɩ pɔgɩlɩ daaŋgbanɩŋ. Dama dɩ mʊ aŋ tʊntʊntʊ dii ʊ tʊʊma jigiŋ. 11 “Nɩ a keŋ a tʊgɩ tɩgɩkpɩɩŋ yaa tɩgɩbiŋ, nɩ juu a yaalɩ vuodieke dɩ yaalala ʊ tuo nɩ aŋ nɩ bemme ʊ jigiŋ a ga tʊgɩ saŋŋa dieke nɩ baaŋ nan nyɩŋ mi. 12 Nɩ a keŋ a juu tigidieke mana nɩ waasɩ ba vɩɩnɩŋ. 13 Tigiri mi vuosi dɩ a keŋ a mɩŋŋɩ a tuo nɩ, nɩ vaa nɩ waasɩkʊ aŋaŋ nɩ sʊgɩfɩalɩŋ wɩarɩ ka ma ama ba a keŋ a ka a mɩŋŋɩ a tuo nɩ, nɩ vaa nɩ sʊgɩfɩalɩŋ yiŋŋi keŋ nɩ jigiŋ. 14 Ta vuodieke mana dɩ ka tuo nɩ yaa dɩ ka wʊŋ nɩ wʊbalɩkaha nɩ kpaantɩ nɩ naatala tankɔlɩŋ a taaŋ mi saŋŋa dieke nɩ nyɩnnana kanɩŋ tigiri yaa tɩka ma. 15 Wusie maŋ bala nɩ daa dieke Ŋmɩŋ dɩ baaŋ nan dii vuosi sarɩya, die tɩka vuosi tɩbɩdatɩŋ nan faasɩ tɩaŋ Sodomi aŋaŋ Gomoraya vuosi tɩbɩdatɩkʊ. 16 “Nɩ wʊmma, n tʊma nɩ sɩba yii diekemba dɩ benne gbaanchʊra sʊnsʊŋ. Die wɩa nɩ yalla yɩaŋ sɩba nyinvuuke ta nɩ bemme sɔmm sɩba ŋmarɩsɩ. 17 Nɩ sɩmma nɩ gbaŋ aŋaŋ vuotaŋ wɩa, dama ba nan yigi nɩ a yaa nɩ ga sarɩya diile vuosi jigiŋ, ta bɩ nɩgɩ nɩ ba Ŋmɩŋ jɩamɩŋ juone sʊŋ. 18 Ba nan nagɩ nɩ a ga tɩka nyɩŋkʊra aŋaŋ naalɩba jige n saaŋ wɩa aŋ nɩ balɩ Ŋmɩŋ wʊvɩɩnaha a yɩ banɩŋ aŋaŋ vuodiekemba dɩ kana ka yi Juu vuosi. 19 Ama ba keŋ yaa nɩ ga aŋ ba dii nɩ sarɩya nɩ da vaa dɩ mugisi nɩ aŋaŋ nɩ baaŋ nan balɩ die yaa nɩ baaŋ nan yiŋŋi ba die; dama saŋka mi Ŋmɩŋ Haalɩŋ nan yɩ nɩ wudieke nɩ baaŋ nan yiŋŋi a balɩ. 20 Dama wudiekemba nɩ bala a baa nɩ balɩ wa kaaŋ nyɩŋ nɩ jigiŋ, ama nɩ Chɔɔŋ Ŋmɩŋ Haalɩbʊ nan dɩ bie nɩ sʊŋ a bala. 21 “Saŋka mi vuosi nan nagɩ ba gbaŋ gbaŋ ba nɩmballɩ a yɩ dɩ ba kʊʊ ba, chʊalɩŋ gbaŋ nan yi die gbaŋ gbaŋ a yɩ ba ballɩ. Ballɩ dɩaŋ nan yiŋŋi a wagɩ ba chʊalɩŋ aŋaŋ ba nɩɩlɩŋ ta nagɩ ba a yɩ dɩ ba kʊʊ ba. 22 Ta vuosi mana nan dɩ haa nɩ, nɩ dɩna n kʊaŋ wɩa. Ama vuodieke mana dɩ a keŋ a bɩagɩ a tuoli wɩaha a ga a tʊgɩ kpatɩkʊ nan ye gbatɩtaanɩŋ. 23 Ta ba keŋ mugisi nɩ tɩŋ kaanɩ ma, nɩ chɩgɩ a ga tɩgɩgaaŋ. Wusie maŋ bala nɩ, nɩ kaaŋ bɩagɩ kpatɩ nɩ tʊʊmaha Izara tɩgɩsɩ mana ma ta manɩŋ Vuota Bʊa keŋ. 24 “Bʊbʊgɩrʊ ka tɩaŋ ʊ dɩdagɩrʊ; yɔmʊ dɩaŋ ka tɩaŋ ʊ tieŋ. 25 Die wɩa dɩ mʊ aŋ bʊbʊgɩrʊ sɩmma sɩba ʊ dɩdagɩrɩ wa; ta yɔmʊ dɩaŋ sɩɩ sɩba ʊ tieŋ wo. Ba a keŋ a wa tigiŋ tieŋ jɩmbɩatɩ naaŋ wa Beelizebuli, die nɩŋ lalɩa ba baa ba wa ʊ dembe? 26 “Die wɩa, nɩ da a keŋ chɩgɩma vuotaŋ ŋmaamɩŋ, dama jadieke mana dɩ lɔbɩrɩna lele nan daansɩ nyɩŋ yaalɩŋ, ta wʊlɔbɩrɩkɩŋ mana dɩaŋ nan nyɩŋ yaalɩŋ. 27 Wudieke n balala nɩ lɩmɩŋ ma wa, nɩ balɩ ka yaalɩŋ ma; ta wudieke n pʊsɩna balɩ yɩ nɩ wa, nɩ balɩ ka yaalɩŋ ma. 28 Nɩ da keŋ a chɩgɩma vuodiekemba dɩ baaŋ nan bɩagɩ a kʊʊ nɩ nyɩŋgbaŋka, ama ta kaaŋ bɩagɩ a kʊʊ nɩ haalɩbʊ; ama nɩ chɩgɩma Ŋmɩŋ vuodieke dɩ baaŋ nan bɩagɩ a kʊʊ nɩ nyɩŋgbaŋka aŋaŋ nɩ haalɩbʊ mana boli dieke dɩ wone kpatɩkʊ ma. 29 Ba daa nembisi ale wo kobu, ama dɩ ka yi tɩ Chɔɔŋ Ŋmɩŋ dʊŋŋʊ, a kaanɩ mana kaaŋ nan tɩŋgbaŋ. 30 Nɩnɩŋ nɩŋ, Ŋmɩŋ sɩba nɩ zoosi nʊaŋ mɩŋ. 31 Die wɩa nɩ da chɩgɩma ŋmaamɩŋ; dama nɩ yaa nyʊarɩ a tɩaŋ nembisi pam. 32 “Vuodieke mana dɩ a keŋ a vʊarɩ ʊ gbaŋ vuosi me dɩ ʊ yiwo n vuoŋ, die gbaŋ gbaŋ maŋ nan vʊarɩ wa yaalɩŋ ma n Chɔɔŋ Ŋmɩŋ dieke dɩ benne arɩzanna ma jigiŋ. 33 Ama vuodieke dɩ baarɩ ʊ ka yi n vuoŋ vuosi jigiŋ, die gbaŋ gbaŋ maŋ nan balɩ dɩ n ka sɩba wa n Chɔɔŋ dieke dɩ benne arɩzanna ma jigiŋ. 34 “Nɩ da keŋ a yilime sɩba sʊgɩfɩalɩŋ maŋ yaa keŋ tɩŋgbaŋka gie vuosi jigiŋ; Aayɩ, n ka keŋ aŋaŋ sʊgɩfɩalɩŋ, ama n keŋ wo aŋaŋ puole. 35 N keŋ dɩ n yiwo ballɩ dembisi tuoli ba chʊalɩŋ, ta havʊʊbisi tuoli ba nɩɩlɩŋ, lɩahaalʊ tuoli ʊ nuŋ. 36 Vuota dataasɩ nan yi ʊ gbaŋ gbaŋ ʊ tigiŋ vuosi. 37 “Vuodieke mana dɩ chone ʊ chɔɔŋ yaa ʊ nuŋ a tɩaŋ mɩŋ ka mʊ ʊ yi n kʊaŋandɩɩsɩrʊ; vuodieke dɩaŋ dɩ chone ʊ naahaalʊ yaa ʊ havʊʊbiŋ a tɩaŋ mɩŋ ka mʊ ʊ yi n kʊaŋandɩɩsɩrʊ. 38 Vuodieke mana dɩaŋ dɩ kana ka vigi ʊ dagarɩkɩŋ a dɩa mɩŋ ka mʊ ʊ yi n kʊaŋandɩɩsɩrʊ. 39 Vuodieke mana dɩ yaalala dɩ ʊ gbatɩ ʊ gbaŋ gbaŋ ʊ miivoli nan waarɩ ka; ama vuodieke nɩŋ mana dɩ keŋ waarɩ ʊ miivoli n wɩa wʊnɩŋ nɩŋ nan daansɩ ye ke. 40 “Vuodieke mana dɩ mɩŋŋɩna a tuo nɩ chaantɩ, mɩŋŋɩ tuo mɩŋ mɩŋ; ta vuodieke dɩaŋ dɩ mɩŋŋɩna tuo mɩŋ, mɩŋŋɩ tuo wo Ŋmɩŋ dieke dɩ tʊnna mɩŋ wa mɩŋ. 41 Vuodieke mana dɩaŋ dɩ a keŋ a mɩŋŋɩ a tuo Ŋmɩŋ naazʊa chaantɩ ʊ yine Ŋmɩŋ naazʊa wɩa, nan daansɩ tuo Ŋmɩŋ naazʊa tune; vuodieke dɩaŋ mana dɩ mɩŋŋɩ a tuo sʊgɩyɩalɩntieŋ chaantɩ ʊ yine sʊgɩyɩalɩntieŋ wɩa, nan daansɩ tuo sʊgɩyɩalɩntieŋ tune. 42 Nɩ sɩmma a baarɩ vuodieke mana dɩ a keŋ a yuori nyasʊnsʊŋ a yɩ n kʊaŋandɩɩsɩrɩba gie wʊnyɩ dɩ ʊ yine n kʊaŋandɩɩsɩrʊ wɩa nan daansɩ ye tune.”
