1 Die ba gana a ga tʊga Jerusalemi ba keŋ Betifiji aŋaŋ Betani tɩgɩsɩ, tɩgɩsɩ gie die bie wo kunkogiŋ dieke ba wasɩnana Olivi Tɩɩsɩsɩ lʊgɩŋ, Yisa dɩ tʊŋ ʊ kʊaŋandɩɩsɩrɩba bale ta 2 balɩ ba dɩ, “Nɩ gamma tɩŋkpaŋŋɩ dieke dɩ benne nɩ nɩŋka, nɩ die keŋ a juu tɩka ma nɩ nan ye bonpɔlɩ dɩ bɔbɩna zie vuoŋ dɩ ye ka jʊalɩ ka, nɩ forisike a yaa keŋ giena. 3 Vuoŋ dɩ a keŋ keŋ pɩasɩ nɩ, dɩ bɩa nɩ yi dene, nɩ balɩ wa dɩ, tɩ Yɔmʊtieŋ yaalala ka, ama ʊ nan yiŋŋi a yaa ka a keŋ lele.” 4 Die ba ga a ye bonpɔlɩka dɩ ka zie sieku me a bɔbɩ juoŋ kaanɩ sanʊaŋ ma. Die ba forisinene ke 5 vuosi bataŋ die zie mi, a pɩasɩ ba dɩ, “Bɩa nɩ yie, nɩ forise bonpɔlɩka mɩŋ?” 6 Ba balɩ ba Yisa die dɩ bala die wo gbaŋ gbaŋ, die wɩa vuosisi die dɩ vaa ba yaa a ga. 7 Die ba yaa bonpɔlɩka a keŋ Yisa jigiŋ a nagɩ ba garɩtɩ a diisi ka sikpeŋ Yisa die dɩ wa jʊalɩ kalɩ ka sikpeŋ. 8 Vuosi pam die dɩ nagɩ ba gaatɩ a jaatɩ sieku me bataŋ dɩaŋ dɩ nagɩ vaatɩ ba chɩana nyɩŋ haagɩŋ ma a jaata sieku me. 9 Vuodiekemba die dɩ benne ʊ nɩŋŋa aŋaŋ ʊ kʊaŋ, die dɩ wa a piili keesiŋ, “Tɩ Yɔmʊtieŋ, hozaana gbatɩ tɩ a taaŋ lele. Ŋmɩŋ yi alibarika a yɩ vuodieke dɩ kienene wʊnɩŋ Ŋmɩŋ saaŋ ma. 10 Ŋmɩŋ bɩ yi alibarika a yɩ tɩ chɔɔŋkʊʊŋ Davidi naarɩ dieke dɩ kienene wo ma. Hozaana! Ŋmɩŋ, vuodieke dɩ benne ŋmɩŋsikpeŋ, gbatɩ tɩ taaŋ leleke gie.” 11 Yisa die dɩ ga tʊgɩ Jerusalemi, a ga Ŋmɩŋ jɩamɩŋ juoku sʊŋ, a daansɩ jaaŋ mana ka sʊŋ. Ama saŋŋa dieke ŋmɩŋ dɩ yaala ka nan die ʊ ŋaŋ ʊ kʊaŋandɩɩsɩrɩba, baŋ aŋaŋ bale wo die dɩ nyɩŋ ga Betani. 12 Tʊŋ die dɩ vʊnna ba nyɩŋ Betani a kieŋ, kɔŋ die dɩ yallɩ Yisa, 13 die ʊ ye kɩnkamɩŋ tɩɩŋ dɩ gana ga zie ŋaŋ vaatɩ, die ʊ ga ʊ daansɩ ye sɩba ka yaa nyɩŋnyɩŋka mɩŋ. Die ʊ tʊgɩna mi die ʊ ye wo vaatɩ nyɩɩna ka sikpeŋ, dama ka saŋŋa die ye ka tʊgɩya aŋaŋ ka baaŋ nan nyɩŋ. 14 Yisa dɩ balɩ a yɩ tɩɩka dɩ, “Vuoŋ kaaŋ bɩ ye nyɩŋnyɩŋka fʊ ma a dii bɩbra.” Die ʊ kʊaŋandɩɩsɩrɩba dɩ wʊŋ ʊ bala wa. 15 Die ba gana ga tʊgɩ Jerusalemi, Yisa dɩ ga juu Ŋmɩŋ jɩamɩŋ juokpeŋkpɩɩkʊ ma, a piili a yaga vuodiekemba die dɩ yalla nyinti a daa aŋaŋ vuodiekemba die dɩ daanana nyintiti ta kpaŋŋɩ vuodiekemba dɩ yalla ligire a tarɩga aŋaŋ vuodiekemba die dɩ yalla ŋmarɩsɩ a daa teebulisi a bubi bubi. 16 Ta ka saagɩya dɩ vuoŋ chii jaaŋ a daagɩ Ŋmɩŋ jɩamɩŋ juokpeŋkpɩɩkʊ gbaakʊ sʊŋ. 17 Die ʊ wa dagɩ vuosisi ta baarɩ, “Ŋmɩŋ wɩa baarɩ, Ŋmɩŋ tigiŋ baa ka yiwo Ŋmɩŋ jʊʊsɩŋ jigiŋ a yɩ vuoŋ mana, ta nɩ nagɩ ka a bɩrɩŋ gaarɩŋ tigiŋ?” 18 Die Ŋmɩŋ kɩkaabɩtɩba nyɩŋkʊra aŋaŋ Ŋmɩŋ mɩraha dɩdagɩrɩba die dɩ wʊnna naa wa, die ba piili a yaala sieti dɩ ba kʊʊ Yisa. Die ba chɩga wa mɩŋ, dama die ʊ dagɩkʊ die yi daadamba mana mamachi mɩŋ. 19 Die jɩŋmɩŋ dɩ tʊgɩna Yisa aŋaŋ ʊ kʊaŋandɩɩsɩrɩba die dɩ nyɩŋ mi. 20 Tuŋ die dɩ vʊnna sʊkʊleeliŋ, ba chʊŋ sieku me die ba ye tɩɩ dieke Yisa die dɩ kana a yɩ wa, die ka mana dɩ kpi. 21 Piita die dɩ tɩɩnsɩ wudieke die dɩ yine wo ta balɩ a yɩ Yisa dɩ, “Dɩdagɩrʊ, daansɩ, tɩɩka die fʊ kana a yi wa kpiye!” 22 Yisa dɩ balɩ ba dɩ, “Nɩ yi Ŋmɩŋ yada. Nɩ keŋ a yi Ŋmɩŋ yada, 23 nan bɩagɩ a balɩ a yɩ kunkogiri gie, vʊʊ a ga nan nyaakpɩɩbʊ ma, fʊ gbaŋ gbaŋ fʊ keŋ a balɩ die ta ka chɩɩlɩya fʊ sʊŋ ma, yi yada sɩba fʊ bala die wo nan yi, aŋ ka yi a yɩ fʊ. 24 Vaa n balɩ nɩ, naa chɩaŋ ma nɩ keŋ a jʊʊsa Ŋmɩŋ a yaala jaaŋ nɩ tuo a dii sɩba ye ke mɩŋ, aŋ ka yi nɩ jaaŋ. 25 Ta nɩ keŋ a zie jʊʊsa Ŋmɩŋ ta vuodieke mana dɩ yine nɩ bɩaŋ, nɩ vaa ʊ taalɩ a chaa wa aŋ nɩ Chɔɔŋ Nabidie Ŋmɩŋ dɩ benne arɩzanna ma dɩaŋ nan nagɩ nɩ taalɩ a chaa nɩ. 26 ((Ama nɩ keŋ a ka nagɩ nɩ chanchaalɩŋ wʊbɩatɩ a chaa ba, nɩ chɔɔŋ dieke dɩaŋ dɩ benne arɩzanna ma kaaŋ nagɩ nɩ wʊbɩatɩ a chaa nɩ.))” 27 Die ba bɩna a yiŋŋi keŋ tʊgɩ Jerusalemi Yisa die dɩ juu Ŋmɩŋ jɩamɩŋ juokpeŋkpɩɩŋ ma a dɩ chʊŋ, Ŋmɩŋ kɩkaabɩtɩba nyɩŋkʊra aŋaŋ Ŋmɩŋ mɩraha dɩdagɩrɩba aŋaŋ tɩŋgbaŋka nyɩŋkʊra bataŋ dɩ keŋ ʊ jigiŋ, 28 a pɩasɩ wa dɩ, “Bɩa yiko fʊ yaa yie nyinti gie? Mɩnɩa yɩna fʊ kanɩŋ yiko ke mi?” 29 Yisa dɩ balɩ ba dɩ, “Nɩ vaa n pɩasɩ nɩ wʊbalɩmɩŋ amʊ nɩ keŋ bɩagɩ a mɩŋŋɩ balɩ mɩŋ ka chɩaŋ, n nan balɩ nɩ vuodieke yiko n yalla a tʊma nyinti gie wo. 30 Nɩ balɩ mɩŋ Jɔɔn die ye wo yiko sɩa a yaa sɩa vuosisi Ŋmɩŋ nyaabʊ, sɩa yiko ke mi die dɩ nyɩŋ, Ŋmɩŋ jigiŋ yaa vuotaŋ jigiŋ?” 31 Die ba yiŋŋi a pɩasa taŋ dɩ, “Tɩ baa tɩ balɩ wa lalɩa? Tɩ keŋ baarɩ bʊ nyɩŋ wa Ŋmɩŋ jigiŋ, ʊ nan baarɩ, bɩa die wana yi tɩ ka yi Jɔɔn yada? 32 Tɩ nan bɩagɩ baarɩ, vuotaŋ jigiŋ?” (Die ŋmaamɩŋ die yalla ba aŋaŋ vuosisi, dama vuoŋ mana die baarɩ Jɔɔn die yiwo Ŋmɩŋ dɩ tʊnna vuodieke.) 33 Die ba balla wudieke a yɩ Yisa die wone “Tɩ zɩ.” Yisa dɩ balɩ ba dɩ, “Die nɩŋ n gbaŋ n kaaŋ balɩ nɩ jigidieke n yene yiko ke gie a yie nyintiti gie.”
