1 Die saŋka die dɩ gbigi dɩ ba dii dʊʊga dieke ba ŋaana ŋɔba paanʊ dieke ba kana ka nagɩ dabɔtɩ a yi wo, die ba wasa kanɩŋ dʊʊgaka mi gasɩtɩanɩŋ dʊʊga, 2 ta die Ŋmɩŋ kɩkaabɩtɩba aŋaŋ mɩraha dɩdagɩrɩba die dɩ mɩa a yaala sieti dɩ ba kʊʊ Yisa, ama die ba chɩga daadamba ŋmaamɩŋ. 3 Womi Sitaani die dɩ juu Judasi vuodieke die ba wasɩnana Asikaroti ta bɩ yi Yisa kʊaŋandɩɩsɩrɩba baŋ aŋaŋ bale wo wʊnyɩ. 4 Die wɩa wʊnɩŋ Judasi die dɩ ga balɩ Ŋmɩŋ kɩkaabɩtɩba nyɩŋkʊraha aŋaŋ ba sojasi nyɩŋkʊraha ʊ baaŋ nan yi die a vaa ba yigi Yisa. 5 Die ba sʊgɩtɩ dɩ fɩalɩ ta die ba baarɩ ba nan yɩ wa ligire. 6 Die Judasi die dɩ saagɩ ta wa piili a yaala sie dieke ʊ baaŋ nan nagɩ Yisa a yi ba nuusi me saŋŋa dieke kpɩkpaaŋ dɩ worine. 7 Die ba dinene paanʊ dieke ba kana ka nagɩ dabɔtɩ a yi wo saŋŋa dieke ba ŋaana kʊa yiisehe a yie gasɩtɩaŋkʊ dʊʊga nyindiikehe dɩ keŋ tʊgɩ, 8 Yisa die dɩ tʊŋ Piita aŋaŋ Jɔɔn aŋaŋ nʊarɩ gie dɩ, “Nɩ ga a yi tɩ gasɩtɩaŋkʊ dʊʊga nyindiikehe siri aŋ tɩ dii.” 9 Die ba pɩasɩ wa dɩ, “Sɩa fʊ yaala tɩ ga a yi he siri?” 10 Ʊ baarɩ dɩ, “Nɩ wʊmma, nɩ ganana tɩka sʊkʊ nɩ nan haarɩ daa wʊnyɩ dɩ chine jaaŋ aŋaŋ nyaaŋ, nɩ dɩa wa a ga juu tigidieke me ʊ junene wo, 11 a balɩ tigiri tieŋ dɩ, ‘Dɩdagɩrʊ wa baarɩ, chaamba juodieke manɩŋ aŋaŋ n kʊaŋandɩɩsɩrɩba dɩ balla tɩ dii gasɩtɩaŋkʊ nyindiikehe bie sɩa?’ 12 Ʊ nan dagɩ juokpeŋkpɩɩŋ dɩ benne sikpeŋ me a yallɩ jaaŋ mana a gbarɩ, mi nɩ nan yi nyindiikehe.” 13 Die ba nyɩŋ ga a ye jaaŋ mana sɩba Yisa die dɩ balla ba wa die wo, die wɩa die ba yi gasɩtɩaŋkʊ dʊʊgaka nyindiikehe mi. 14 Die gasɩtɩaŋkʊ dʊʊga nyindiikehe diile saŋŋa dɩ tʊgɩna, Yisa die dɩ ga kalɩ aŋaŋ ʊ tʊntʊntɩba baŋ aŋaŋ bale wo dɩ ba dii. 15 Die ʊ balɩ a yɩ ba dɩ, “N paalɩ yaala mɩŋ dɩ n dii gasɩtɩaŋkʊ gie dʊʊga nyindiikehe aŋaŋ nɩ ta wahalaka ye keŋ n ma. 16 N bala nɩ, n kaaŋ bɩ dii he bɩbra a yaa ga tʊgɩ saŋŋa dieke wusie diile he dɩ bala dɩ yi Ŋmɩŋ naarɩ ma.” 17 Womi die ʊ tuo nyaaŋ chibiŋ aŋaŋ daaŋ ta bɩrɩ Ŋmɩŋ ta baarɩ dɩ, “Nɩ tuo geŋke a tɩa yɩ taŋ a nyuu; 18 N bala nɩ, a nyɩŋ jinne yaa gamma, n kaaŋ bɩ nyuu daabʊ gie sie Ŋmɩŋ naarɩ keŋ keŋ.” 19 Die ʊ bɩ nagɩ paanʊ ta bɩrɩ Ŋmɩŋ ta gbieri gbieri ke a nagɩ yɩ ba ta baarɩ dɩ, “N nyɩŋgbanɩŋ wʊnna maŋ baa n nagɩ aŋ ba kʊʊ mɩŋ nɩ wɩa. Nɩ yime naa a tɩɩnsɩma n wɩa.” 20 Die gbaŋ gbaŋ die ba dine kpatɩ wa ʊ nagɩ nyaaŋchibike aŋaŋ daabʊ a baarɩ dɩ, “Nyaaŋchibike aŋaŋ daabʊ gie yiwo Ŋmɩŋ nʊahaalɩ dieke n ziene aŋaŋ n zɩmbʊ dɩ nyɩnna wa a yɩ nɩ. 21 “Ama nɩ ye, vuodieke dɩ balla ʊ posi n chɩaka kalɩ wa gie a lagɩŋ a die aŋaŋ mɩŋ. 22 Manɩŋ vuota Bʊa nan seŋ kpi sɩba Ŋmɩŋ dɩ sanna die wo, ama wʊbɩaŋ bie vuodieke dɩ balla ʊ posi n chɩaka.” 23 Womi die ba piili a pɩasa tamba ba jabɩa balla ʊ yi die. 24 Die nɩnhagɩrɩŋ die dɩ nan ʊ kʊaŋandɩɩsɩrɩba sʊnsʊŋ dɩ ba jabɩa balla ʊ yi jakʊʊŋ. 25 Yisa die dɩ balɩ a yɩ ba dɩ, “Tɩŋgbaŋka gie naalɩŋ ŋaaŋ pɔgɩlɩ ba vuosi aŋaŋ nɩŋŋmɩna ta vuodiekemba dɩ yine tɩŋgbaŋka nyɩŋkʊra yaala ba wasɩma ba vuoŋ mana zʊa. 26 Ama nɩnɩŋ dɩ ka baa dɩ sɩma die. Vuodieke dɩ yine vuokpɩɩŋ nɩ sʊnsʊŋ, sie ʊ yi sɩba bʊabiŋ, ta nɩŋŋandɩɩsɩrʊ wa yi sɩba tʊntʊntʊ. 27 Mɩnɩa yine vuokpɩɩŋ a tɩaŋ ʊ chanchaalɩŋ, vuodieke dɩ kala a die yaa vuodieke dɩ tɩanana nyindiikehe? Dɩ yiwo vuodieke dɩ kala die wo, ama manɩŋ n bie nɩ sʊnsʊŋ sɩba tʊntʊntʊ wa. 28 “Nɩnɩŋ nɩ yine vuodiekemba dɩ benne n jigiŋ n wumugisikehe ma saŋŋa ma ma. 29 N chʊa Ŋmɩŋ die dɩ kalɩnna mɩŋ naarɩ gie wo, die gbaŋ gbaŋ maŋ nan yɩ nɩ kanɩŋ naarɩ mi. 30 Nɩ nan dii ta nyuu aŋaŋ manɩŋ n naarɩ ma, ta kalɩ naagbaŋtɩ ma a dii Izara buurisi baŋ aŋaŋ ale wo sarɩya.” 31 Tɩ Yɔmʊtieŋ die dɩ balɩ yɩ Simoni Piita dɩ, “Simoni, Simoni, wʊmma, Sitaani jʊʊsa wa sieŋ dɩ ʊ magɩsɩ nɩ ta chaarɩ nɩ sɩba ba ŋaana a chaarɩ zaa aŋ ʊ ye dɩ nɩ yiwo zaa bie yaa zaavɔntɩ. 32 Ama fʊnɩŋ Simoni n jʊʊsɩ wa Ŋmɩŋ a yɩ fʊ dɩ fʊ yadaka da keŋ sʊʊŋ tɩŋgbaŋ, ta fʊ keŋ a yiŋŋi a keŋ n jigiŋ fʊ kpaŋŋɩsɩma fʊ nɩmballɩlɩ.” 33 Piita die dɩ yiŋŋi a balɩ wa dɩ, “N Yɔmʊtieŋ, n yi siri dɩ n juu dansarɩka aŋaŋ fʊ, ta kpi aŋaŋ fʊ.” 34 Yisa die dɩ yiŋŋi a balɩ wa dɩ, “Piita, n bala fʊ, kparaaŋ nan keŋ baa ka kʊmma ta fʊnɩŋ chiisi wo bʊtaa dɩ zɩ mɩŋ.” 35 Womi Yisa die dɩ pɩasɩ ba dɩ, “Die n tʊnna nɩ die nɩ ga ta ka pɔgɩlɩ ligire jasʊʊkɩŋ aŋaŋ bʊlɔgɩŋ aŋaŋ nɩɩraha die nɩ waarɩ jaaŋ mɩŋ?” Die ba yiŋŋi baarɩ dɩ, “Aayɩ.” 36 Yisa die dɩ baarɩ dɩ, “Ama lele nɩŋ, vuodieke mana dɩ yalla ligire jasʊʊkɩŋ yaa bʊlɔgɩŋ ʊ nagɩ ka, ta vuodieke dɩ kana ka yallɩ takoobi, ʊ nagɩ ʊ jayeekiŋ a daa a daa kaanɩ. 37 N bala nɩ, dɩ maagɩya Ŋmɩŋ gbaŋkʊ ma dɩ ‘Ba nagɩ wa mɩŋ a gʊtɩ vuobɩatɩ ma.’ Die wɩa, die gbaŋ gbaŋ ba nan yi mɩŋ, dama wudieke mana ba maagɩna yaa gamma n ma Ŋmɩŋ gbaŋkʊ ma wa nan keŋ yi wusie.” 38 Die ʊ kʊaŋandɩɩsɩrɩba dɩ baarɩ dɩ, “Tɩ Yɔmʊtieŋ, ye, takoobisi ale wʊnna.” Die ʊ yiŋŋi a baarɩ dɩ, “Dɩ mʊ.” 39 Die ʊ nyɩŋ mi a ga Olivi Tɩɩsɩ kunkogiŋ me sɩba ʊ ŋaana yie die wo; ta die ʊ kʊaŋandɩɩsɩrɩba die dɩ dɩ ʊ kʊaŋ a ga. 40 Die ʊ tʊgɩna mi wo, die ʊ balɩ a yɩ ba dɩ, “Nɩ jʊʊsɩma Ŋmɩŋ amʊ nɩ da keŋ juu magɩsɩŋ ma.” 41 Die ʊ chʊŋ ga ba nɩŋŋa bɩta a sʊʊŋ gbirigi a jʊʊsɩ Ŋmɩŋ dɩ, 42 “N Chʊa Ŋmɩŋ, dɩɩ yi fʊ dʊŋŋʊ fʊ vʊarɩ mɩŋ a nyɩŋ wʊbɩa dieke dɩ kienene n ma naa, ama vaa fʊ dʊŋŋʊ yi da manɩŋ n dʊŋŋʊ.” 43 Womi malaka die dɩ nyɩŋ arɩzanna ma a keŋ a kpaŋŋɩsɩ wa. 44 Die ʊ benne sʊgɩchʊʊsɩŋ ma wa die ʊ faasɩ a jʊʊsɩ Ŋmɩŋ aŋaŋ nɩŋŋmɩna, die ʊ walɩŋ die dɩ nanna tɩŋgbaŋ sɩba zɩŋ. 45 Die ʊ kenne hagɩ Ŋmɩŋ jʊʊsɩkʊ ma wa die ʊ yiŋŋi ga ʊ kʊaŋandɩɩsɩrɩba jigiŋ, ta ye ta ba gʊʊra, dama sʊgɩchʊʊsɩŋ die vana ba gbalɩgɩ. 46 Die ʊ pɩasɩ ba dɩ, “Bɩa wɩa nɩ gʊʊra? Nɩ hagɩ a jʊʊsɩma Ŋmɩŋ amʊ nɩ da keŋ a juu magɩsɩŋ ma.” 47 Yisa die ye ko bala wɩa ta ye kpɩkpaaŋ dɩ kienene. Ta Judasi ʊ kʊaŋandɩɩsɩrɩba wʊnyɩ die dɩna ba nɩŋŋa, a die keŋ Yisa jigiŋ dɩ ʊ mʊgɩsɩ ʊ kaamɩŋ. 48 Ama ta die Yisa die dɩ pɩasɩ wa dɩ, “Judasi, mʊgɩsɩ wa n kaamɩŋ dɩ fʊ nyɩŋ manɩŋ vuota Bʊa kʊaŋ?” 49 Die Yisa kʊaŋandɩɩsɩrɩba die dɩ yene wudieke dɩ bala ka yiwo, ba pɩasɩ wa dɩ, “Tɩ Yɔmʊtieŋ, tɩ wagɩ ba aŋaŋ takoobisi?” 50 Ama ta ba wʊnyɩ dɩ wɔŋ yi lagɩ a gobi Ŋmɩŋ kɩkaabɩtɩba jakʊʊŋ yɔmʊ nuudiigiŋ chaaŋ tɩbɩŋ a taaŋ. 51 Ama Yisa die dɩ baarɩ dɩ, “Dɩ mʊ”, ta die a nagɩ daa wa tɩbɩrɩ a yiŋŋi a marɩ. 52 Die Yisa dɩ pɩasɩ Ŋmɩŋ kɩkaabɩtɩba nyɩŋkʊraha aŋaŋ ba sojasisi nyɩŋkʊraha aŋaŋ tɩka nyɩŋkʊraha dɩ kenne dɩ ba yigi wo wo dɩ, “N yiwo gbɩgbatɩrʊ nɩ keŋ aŋaŋ takoobisi aŋaŋ dengbile dɩ nɩ yigi mɩŋ? 53 Manɩŋ die n bie nɩ jigiŋ Ŋmɩŋ jɩamɩŋ juokpeŋkpɩɩkʊ ma daaŋ mana ta nɩ ka mɩa dɩ nɩ yigi mɩŋ. Ama saŋka gie yiwo nɩ sɩɩtɩ aŋaŋ Sitaani dɩ yine lɩmɩŋ hagɩrɩtieŋ wo sɩɩtɩ.” 54 Mi die ba yigi Yisa a yaa wa a ga Ŋmɩŋ kɩkaabɩtɩba jakʊʊrɩ tigiŋ, ta Piita die dɩ bie saasaa ta dɩ ba. 55 Die ba chɔgɩsɩ wa boliŋ gbaakʊ sʊnsʊŋ a kalɩ a giliŋbu a weele, Piita die dɩ ga gʊtɩ ba a kalɩ. 56 Die tʊntʊntɩba havʊʊbiŋ wʊnyɩ die dɩ ye Piita dɩ kala bolibu jigiŋ, die ʊ keŋ a mɩŋŋɩ daansɩ wa die ta keŋ baarɩ dɩ, “Daa wa gie gbaŋ die gʊtɩ wa Yisa ma.” 57 Ama Piita die dɩ chiisike dɩ, “N lɩa, n ka wɔŋ sɩba wa.” 58 Die dɩ yi sʊaa, daa wʊnyɩ dɩaŋ die dɩ ye wo a baarɩ dɩ, “Fʊnɩŋ, fʊ gbaŋ yiwo ʊ kʊaŋandɩɩsɩrɩba wʊnyɩ?” Ama die Piita dɩ yiŋŋi balɩ wa dɩ, “N nɩmbʊa, n ka yi ba wʊnyɩ.” 59 Die dɩ bɩ yi sʊaa daa gaaŋ dɩ bɩ keŋ a baarɩ dɩ, “Wusie, daa wa gie gbaŋ die beri aŋaŋ wa dama ʊ gbaŋ yiwo Galili vuoŋ.” 60 Piita die baarɩ dɩ, “N nɩmbʊa, manɩŋ n ka wɔŋ sɩba wudieke fʊ balala wa.” Die ʊ yene ko bala wɩaha, kparaaŋ die dɩ kʊŋ. 61 Ta tɩ Yɔmʊtieŋ Yisa die dɩ yiŋŋi a daansɩ Piita nine me, ta Piita die dɩ tɩɩnsɩ wudieke tɩ Yɔmʊtieŋ Yisa die dɩ balɩ yɩ wa wa dɩ, “Kparaaŋ nan keŋ baa ka kʊmma soriŋ sʊkʊʊŋ ta baarɩ zɩ mɩŋ bʊtaa mama.” 62 Die Piita dɩ nyɩŋ yeŋ me a kʊŋ pam. 63 Die vuodiekemba die dɩ gbarɩna Yisa wa die dɩ vʊarɩ wa fala ta nɩgɩ wa, 64 ta nagɩ jaaŋ a bɔbɩ ʊ nine chaaŋ ta nɩgɩ wa ta balɩ wa dɩ, “Bʊgɩ a dagɩ vuodieke dɩ nɩgɩna fʊ wa.” 65 Ta die ba balɩ wɩa pam a chʊʊsa ʊ saaŋ ta zɩa wa. 66 Die tʊŋ dɩ vʊnna, die Juu vuosi nyɩŋkʊraha aŋaŋ Ŋmɩŋ kɩkaabɩtɩba nyɩŋkʊraha aŋaŋ mɩraha dɩdagɩrɩba die dɩ lagɩŋ taŋ nyɩŋkʊra lagɩmɩŋ jigiŋ, die ba yaa Yisa a keŋ ba jigiŋ. 67 Die ba pɩasɩ wa dɩ, “Balɩ tɩ, fʊnɩŋ fʊ yine Ŋmɩŋ Vuovʊarɩkɩrɩ Masia wa?” Die Yisa dɩ yiŋŋi baarɩ dɩ, “Dɩɩ yi maŋ balɩ nɩ, nɩ kaaŋ yi mɩŋ yada, 68 ama n dɩaŋ maŋ pɩasɩ nɩ wʊpɩasɩkɩŋ nɩ kaaŋ saagɩ a yiŋŋi mɩŋ. 69 Ama a nyɩŋ lele yaa gamma manɩŋ vuota Bʊa nan daansɩ kalɩ Hagɩrɩtieŋ Nabidie Ŋmɩŋ nuudiigiŋ chaaŋ.” 70 Die ba mana dɩ pɩasɩ wa dɩ, “Die nɩŋ fʊ yine Ŋmɩŋ Bʊa wa?” Ʊ yiŋŋi baarɩ dɩ, “Sɩba nɩ balla die wo.” 71 Womi die ba baarɩ dɩ, “Tɩ ka bɩ yaala daansɩatieliŋ bɩbra. Tɩ gbaŋ gbaŋ tɩ wʊŋ ʊ nʊaŋ wʊbalɩka mɩŋ.”
