1 Daaŋ kaanɩ Yisa die dɩ bie Ŋmɩŋ jɩamɩŋ juokpeŋkpɩɩkʊ ma a daga vuotamba ta mʊʊla Ŋmɩŋ wʊvɩɩnaha a yɩa vuosi, ta Ŋmɩŋ kɩkaabɩtɩba nyɩŋkʊraha aŋaŋ mɩraha dɩdagɩrɩba aŋaŋ tɩka nyɩŋkʊraha die dɩ keŋ ʊ jigiŋ, 2 a pɩasɩ wa dɩ, “Balɩ tɩ, mɩnɩa yiko me fʊ yie wɩaha gie? Mɩnɩa yɩna fʊ kanɩŋ yiko ke mi?” 3 Yisa die dɩ yiŋŋi a balɩ ba dɩ, “N gbaŋ n baa n pɩasɩ nɩ wa wʊpɩasɩkɩŋ. Nɩ balɩ mɩŋ, 4 Jɔɔn vuodieke die dɩ sɩnana vuosi Ŋmɩŋ nyaabʊ, Ŋmɩŋ die yɩna wa kanɩŋ yiko ke mi yaa vuota?” 5 Die ba piili a bala yɩa taŋ dɩ, “Wʊbɩa tɩ baa tɩ balɩ? Dɩɩ yi tɩ baarɩ dɩ Ŋmɩŋ yɩna wa yiko ke mi, ʊ nan baarɩ dɩ ta bɩa wɩa die tɩ ka yiwo yada? 6 Ta tɩ bɩ baarɩ dɩ, dɩ vuota die yɩna wa, kpɩkpaakʊ gie mana nan taa tɩ tana dama ba yi yada dɩ Jɔɔn die yiwo Ŋmɩŋ naazʊa.” 7 Die wɩa die ba yiŋŋi balɩ dɩ, “Tɩ ka sɩba jigidieke die ka nyɩnna.” 8 Yisa die dɩ yiŋŋi a balɩ yɩ ba dɩ, “Die nɩŋ, n gbaŋ n kaaŋ balɩ nɩ, vuodieke dɩ yɩna mɩŋ yiko ke gie maŋ yaa yie wɩaha gie.” 9 Womi Yisa die dɩ taaŋ vuotamba nandagɩrɩ gie dɩ, “Daa wʊnyɩ die sone tɩɩsɩ dɩ nyɩnana bie ʊ kʊaŋ ma, ta die nagɩ ka a yɩ tʊntʊntɩŋ nuusi me ta dɩa a ga jigiŋ a ga yʊasɩ. 10 Die a kpaala saŋŋa dɩ tʊgɩ ʊ tʊŋ ʊ yɔmʊ tʊntʊntɩba jigiŋ dɩ ʊ ga tuo ʊ tʊaŋ a keŋ. Ama die tʊntʊntɩba die dɩ nɩgɩ ʊ yɔmʊ wa ta vaa ʊ yiŋŋi ga aŋaŋ nuuwɩaga. 11 Die wɩa die ʊ bɩ tʊŋ yɔmʊ gaaŋ, tʊntʊntɩba die dɩ nɩgɩ wa ta nagɩ wa yi viivi me ta vaa ʊ viiri ga aŋaŋ nuuwɩaga. 12 Womi die ʊ bɩ tʊŋ yɔmʊ dieke dɩ gʊtɩna bʊtaa ma, die ba yɩ wa daŋŋa ta vigi wa taaŋ. 13 Womi kʊakʊ tieŋ die dɩ baarɩ dɩ ‘Bɩa maŋ baa yi? Die nɩŋ lele n nan tʊŋ n gbaŋ gbaŋ n bʊa dieke n chone. Wʊnɩŋ nɩŋ ba nan yɩ wa jɩlɩma.’ 14 Ama die tʊntʊntɩba dɩ yene wo wo die ba balɩ yɩ taŋ dɩ, ‘Kʊakʊ tieŋ faarɩ diiru wʊnna. Nɩ vaa tɩ kʊʊ wa ta ʊ faarɩ yi tɩ sɩɩtɩ.’ 15 Die wɩa die ba nagɩ wa a nyɩŋ kʊakʊ ma a ga kʊʊ wa.” Yisa die dɩ pɩasɩ ba dɩ, “Bɩa kʊakʊ tieŋ dɩ nan yi tʊntʊntɩba gie? 16 Ʊ nan keŋ a kʊʊ banɩŋ vuosi mi ta nagɩ kʊakʊ a yɩ vuogaasɩ.” Die vuosisi die dɩ wʊnna naa wa, ba baarɩ dɩ “Ŋmɩŋ nagɩ die a ga saasaa.” 17 Yisa die dɩ daansɩ ba ta pɩasɩ ba dɩ, “Ŋmɩŋ wɩɩrɩ gie chɩaŋ? Dɩ ‘Taŋ dieke mɩmɩɩrɩba die dɩ zetine ta baarɩ ba ka yaala ka wa die yine gɔŋgɔŋyʊgɩrɩŋ taŋ vɩɩnɩŋ.’ 18 Vuodieke dɩ nanna tanɩ gie sikpeŋ nan ŋmabɩ ŋmabɩ ama vuodieke tanɩ dɩ keŋ nan ʊ sikpeŋ ʊ nan nʊŋ nʊŋ sɩba zɔŋ.” 19 Die mɩraha dɩdagɩrɩba aŋaŋ Ŋmɩŋ kɩkaabɩtɩba nyɩŋkʊraha die dɩ mɩŋŋɩna dɩ ba wɩa Yisa dɩ taana nandagɩrɩ gie wo, die ba mɩa dɩ ba yigi wo mi, ama die ba chɩga vuotamba ŋmaamɩŋ. 20 Die wɩa die ba maansa daansa wa, die ba bɩ a yɩ mɩmaansɩ daansɩrɩba ligire dɩ ba ga Yisa jigiŋ a ga gaaŋ wa sɩba ba yiwo vuovɩɩna, ta pɩasɩ wa wʊpɩasɩka ta ye dɩ ʊ nan balɩ a chʊʊsɩ aŋ ba yigi wo a ga tɩka jakʊʊrɩ jigiŋ. 21 Die mɩmaansɩ daansɩrɩba dɩ balɩ yɩ Yisa dɩ, “Dɩdagɩrʊ, tɩ sɩba baarɩ wudieke fʊ balala ta daga wa yiwo wusie, ta ka luge ama a daga Ŋmɩŋ sieŋ aŋaŋ wusie. 22 Balɩ tɩ, tɩ mɩraha yɩ sieŋ mɩŋ dɩ tɩ tumme lampo a yɩma Romani tɩŋ naaŋ wa Siiza yaa tɩ da tumme?” 23 Ama Yisa die dɩ mɩŋŋɩ ba sanna die wo, ta balɩ yɩ ba dɩ, 24 “Nagɩ ligiribiŋ a dagɩ mɩŋ. Mɩnɩa nine chaaŋ aŋaŋ ʊ saaŋ diisine ka ma?” Die ba baarɩ dɩ, “Naaŋ Siiza.” 25 Ta Yisa dɩ balɩ yɩ ba dɩ, “Die nɩŋ nɩ nagɩ yɩ Naaŋ Siiza jadieke dɩ yine ʊ sɩɩtɩ ta nagɩ yɩ Ŋmɩŋ dɩaŋ jadieke dɩ yine Ŋmɩŋ sɩɩtɩ.” 26 Die ba ka bɩagɩ a yigi wo aŋaŋ wɩɩŋ vuosisi nɩŋŋa, die ʊ yiŋŋi balɩkʊ die yine be mamachi die ba ka bɩagɩ a balɩ wɩɩŋ. 27 Die Sadusisi bataŋ die dɩ keŋ Yisa jigiŋ; banɩŋ die ba balala dɩ vuosi kaaŋ daansɩ hagɩ kuŋ me; die ba pɩasɩ wa dɩ, 28 “Dɩdagɩrʊ, Mosisi die maagɩna mɩrɩka gie a yɩ tɩ dɩ, dɩɩ yi ‘Dembiŋ dɩ keŋ faarɩ ʊ hɔgʊ ta kpi ta wo ballɩ, dɩ mʊ daa wa mi nɩmbʊa faarɩ kpihɔgʊ wa amʊ ʊ mɩɩrɩ ballɩ a yɩ vuodieke dɩ kpine wo.’ 29 Die dembisi bayʊpɔyɩ die benne a yi nɩmballɩ, jakʊʊrɩ chaaŋ die dɩ faarɩ hɔgʊ, ta ka mɩɩrɩ ballɩ ta kpi; 30 womi vuodieke dɩ diisine bule wo dɩ faarɩ hɔgʊ wa, ta ka mɩɩrɩ ballɩ ta kpi; 31 vuodieke dɩaŋ dɩ diisine bʊtaa gbaŋ dɩ faarɩ wa ta kpi ta ka mɩɩrɩ ballɩ. Vuotɩalɩkaha mana die dɩ faarɩ hɔgʊ wa ta kpi ta ka mɩɩrɩ ballɩ. 32 Ka kʊaŋ kʊaŋ chaaŋ hɔgʊ wa dɩaŋ dɩ kpi. 33 Lele, kuŋ hagɩŋ daraaŋ mɩnɩa hɔgʊ bala ʊ yi wo? Dama ba bayʊpɔyɩ wa mana die faarɩ wa mɩŋ.” 34 Yisa die dɩ yiŋŋi a balɩ ba dɩ, “Tɩŋgbaŋka gie vuosi faara hɔɔŋ ta naga ba lɩaŋ yɩa chʊllɩŋ, 35 ama vuodiekemba dɩ mʊna aŋaŋ kuŋ hagɩŋ ta nan keŋ hagɩ a bemme dʊnɩa haalɩkʊ ma wa, ka faara hɔɔŋ yaa a naga ba lɩaŋ yɩ chʊllɩŋ, 36 dama ba kaaŋ bɩ kpi bɩbra; ba nan dɩ sɩɩ sɩba malakasi, ta bɩ yi Ŋmɩŋ ballɩ dama ba hagɩ wa kuŋ me. 37 Mosisi gbaŋ die dagɩya dɩ kunti nan daansɩ a hagɩ kuŋ me. Mosisi die dɩ maagɩna yaa gamma tɩɩka diilehe, die ʊ wa wa tɩ Yɔmʊtieŋ Nabidie Ŋmɩŋ dɩ, ‘Abarahami Ŋmɩŋ aŋaŋ Aziki Ŋmɩŋ aŋaŋ Jakobu Ŋmɩŋ.’ 38 Vuosi gie die wɔŋ kpi mɩŋ ama ba ye ko bie wo ba mɩsɩ ma dama Ŋmɩŋ ka yi wo kunti Ŋmɩŋ, ʊ yiwo vuodiekemba dɩ benne ba mɩsɩ ma ma Ŋmɩŋ, dama ʊ nɩŋŋa ba mana dɩ beri ba mɩsɩ ma.” 39 Die wɩa mɩraha dɩdagɩrɩba bataŋ dɩ balɩ a yɩ Yisa dɩ, “Dɩdagɩrʊ, mɩŋŋɩ a balɩ mɩŋ.” 40 Die wɩa die ba chɩga dɩ ba bɩ pɩasɩ wa wʊpɩasɩkɩŋ. 41 Yisa die dɩ balɩ yɩ ba dɩ, “Lalɩa ba baarɩ dɩ Ŋmɩŋ vuovʊarɩkɩrɩ Masia wa baa ʊ yiwo Davidi haagɩŋ? 42 Dama Ŋmɩŋ gbaŋkʊ sʊŋ, Davidi gbaŋ gbaŋ die maagɩya yɩla gbaŋkʊ sʊŋ dɩ ‘Nabidie Ŋmɩŋ die balɩ a yɩ n Yɔmʊtieŋ dɩ: kala n nuudiigiri gie chaaŋ 43 a ga tʊgɩ saŋŋa dieke n baaŋ nan nagɩ fʊ dataasɩ a yi fʊ nuusi me.’ 44 Davidi die wasa Masia wa dɩ, ‘N Yɔmʊtieŋ’, ta lalɩa Masia wa dɩ bɩ baa ʊ yi Davidi haagɩŋ?” 45 Die vuosi mana dɩ wʊnnana Yisa wa, die ʊ balɩ a yɩ ʊ kʊaŋandɩɩsɩrɩba dɩ, 46 “Nɩ sɩmma vuodiekemba dɩ dagɩnana Ŋmɩŋ mɩraha, ba nan dɩ yaala ba yeegi guuwagɩtɩ a chʊmma giliŋ me, ta yaala ba wasɩma ba aŋaŋ jɩlɩma nyugiti ma, ba keŋ juu Ŋmɩŋ jɩamɩŋ juone me, ba ŋaaŋ yaala vuokpɩɩma jigikasɩka, ba keŋ laalɩŋ jigiŋ ba yaala sikpeŋ kpɩɩmatieliŋ jigikasɩka. 47 Banɩŋ ba nyɩra kpihɔgʊba ta gbata ba nyinti mana, ta jʊʊsa Ŋmɩŋ aŋaŋ jʊʊsɩwagɩtɩ sɩba ba chɩga Ŋmɩŋ. Ba tɩbɩdatɩŋ nan faasɩ dala pam.”
