1 N bɩ bala nɩ mɩŋ dɩ bʊadembiŋ dieke dɩ bala ʊ keŋ dii ʊ chɔɔŋ faarɩ wa, saŋŋa dieke ʊ yene yi bʊanyaalɩŋ ba ŋaaŋ pɔgɩlɩ wa mɩŋ sɩba yɔmʊ. 2 Saŋŋa dieke ʊ yene yi bʊanyaalɩka, vuosi bataŋ ŋaaŋ wube wo ta daansa ʊ nyinti dee a ga tʊgɩ saŋŋa dieke ʊ chɔɔŋ wa dɩ ziene wo. 3 Die gbaŋ gbaŋ dɩ sɩɩ aŋaŋ tɩ, saŋŋa dieke tɩ kana ka sɩba Masia wa, die tɩ sɩɩ sɩba bʊanyaalɩsɩ, ta dʊnɩaka gie haalɩŋ hagɩrɩŋ die pɔgɩlɩna tɩ. 4 Ama saŋka die Ŋmɩŋ dɩ ziene dɩ kenne tʊgɩ, Ŋmɩŋ die tʊŋ wa ʊ gbaŋ gbaŋ ʊ Bʊadembiŋ tɩŋgbaŋka gie me, ta hɔgʊ dɩ mɩɩrɩ wa, ta ʊ bie Juu vuosi mɩraha ma, 5 dɩ ʊ gbatɩ vuodiekemba dɩ benne mɩraha hagɩrɩŋ ma, amʊ tɩ bɩrɩŋ Ŋmɩŋ ballɩ wusie. 6 Tɩ yine ʊ ballɩ wɩa ʊ tʊŋ ʊ Bʊadembike Halɩkasɩka ʊ bie tɩ sʊgɩtɩ ma aŋ tɩ wasa wa dɩ “N Chʊa.” 7 Die wɩa, ka bɩ yi yɔmʊ, ama yiwo Ŋmɩŋ bʊa, fʊ yine ʊ bʊa wa wɩa ʊ nan yɩ fʊ jadieke mana ʊ yallɩnana a yɩa ʊ ballɩ. 8 Saŋŋa dieke dɩ tɩanna wa die nɩ ka sɩba Ŋmɩŋ, saŋka mi die nɩ yiwo yɔŋɩsɩ a yi jadieke dɩ senne ka yi Nabidie Ŋmɩŋ. 9 Ama lele nɩŋ, nɩ wa sɩba Ŋmɩŋ yaa nɩ vaa n balɩ dɩ Ŋmɩŋ sɩba nɩ mɩŋ, dɩ wa yiwo lalɩa nɩ bɩ yaala nɩ yiŋŋi a dɩ dʊnɩaka gie haalɩtɩ wabɩtɩ dɩ pɔgɩlɩna tɩŋgbaŋka gie? Bɩa yine nɩ bɩ yaala nɩ bɩrɩŋ ba yɔŋɩsɩ? 10 Nɩ faasɩna vaa nɩ baga dɩ bie wo daraa ataŋ aŋaŋ chɩɩtɩ ataŋ aŋaŋ saŋŋa ataŋ aŋaŋ bɩna ataŋ ma pam, 11 ta die dɩ yi ŋmaamɩŋ dɩ yigi mɩŋ yaa gamma nɩ ma dɩ wudieke mana n yine a yɩ nɩ wa yiwo yɔrɩ. 12 N nɩmballɩ, n jʊʊsa nɩ, nɩ sɩmma sɩba manɩŋ, dama n gbaŋ n sɩɩ sɩba nɩnɩŋ mɩŋ. Nɩ ka yi wɩɩŋ a chʊʊsɩ mɩŋ. 13 Nɩ tɩɩnsɩ saŋŋa dieke n wolinne a mʊʊlɩ wʊvɩɩnaha a yɩ nɩ wa; die n yʊagɩna wɩa maŋ ye sieŋ a woliŋ mʊʊlɩ wʊvɩɩnaha a yɩ nɩ wa. 14 Ama aŋaŋ n yʊagɩbʊ die dɩ faasɩna a yi mugisiŋ a yɩ nɩ mana yɔrɩ, die nɩ ka daansɩ mɩŋ yɔrɩ ta zeti mɩŋ, ama ta die tuo mɩŋ sɩba nɩ tɩnna baa nɩ tuo Ŋmɩŋ malaka dene, ta bɩ tuo mɩŋ sɩba nɩ tɩnna baa nɩ tuo Yisa Masia dene wo. 15 Ta die nɩ sʊgɩtɩ die dɩ fɩalɩ pam, bɩa wana yi? N nan bɩagɩ a balɩ dɩ saŋka mi die nɩ tɩŋ nan bɩagɩ a vʊarɩ nɩ nine a yɩ mɩŋ nɩ tɩŋ nan yi die. 16 Lele n wa yiwo nɩ dataaŋ die n bala nɩ wusieke wɩa? 17 Vuosi mi mɩa mɩŋ aŋaŋ nɩŋŋmɩna amʊ nɩ nan yiŋŋi a dɩ ba, ama ba wo sʊŋanyile vɩɩna. Wudieke ba yaalɩnana yiwo dɩ ba puo maŋ aŋaŋ nɩ amʊ nɩ nan yi nɩŋŋmɩna a dɩ ba. 18 Dɩ vɩɩna mɩŋ dɩ fʊ dɩa vuoŋ aŋaŋ nɩŋŋmɩna dɩɩ yi wudieke ʊ dagɩnana wa dɩ vɩɩna. Nɩ yime naa saŋŋa mana daa maŋ keŋ bie nɩ jigiŋ nyɩɩna ma. 19 N ballɩ choti, dɩ bɩ yʊagɩ mɩŋ bɩbra nɩ wɩa sɩba hɔgʊ dɩ ŋaana baa ʊ mɩɩrɩ ta dɩ yʊagɩ wa dene wo. N nan dɩ bie kanɩŋ yʊagɩbʊ ma a ga tʊgɩ saŋŋa dieke nɩ beriŋ dɩ baaŋ nɩasɩ Masia beriŋ. 20 Dɩ tɩnɩŋ nan yi mɩŋ nansɩŋ pam maŋ tɩŋ bie nɩ jigiŋ lele gie, amʊ n nan bɩagɩ tarɩgɩ n balɩŋ aŋaŋ nɩ dama dɩ mugisi mɩŋ mɩŋ pam nɩ wɩa. 21 Nɩnɩŋ vuodiekemba dɩ yaala mɩraha pɔgɩlɩ nɩ wa, nɩ ka wʊŋ wudieke mɩraha dɩ dagɩna wa? 22 Dɩ maagɩya mɩŋ dɩ Abarahami die yaa wa ballɩdembisi bale; ta wʊnyɩ nuŋ dɩ yi yɔmʊ ta wʊnyɩ wa dɩaŋ nuŋ dɩ ka yi yɔmʊ. 23 Yɔmʊ wa die mɩɩrɩ ʊ bʊa dembike sɩba ba ŋaana a mɩɩrɩ vuota dene wo, ama hɔgʊ dieke dɩ kana ka yi yɔmʊ wa die dɩ mɩɩrɩ ʊ bʊa dembike sɩba Ŋmɩŋ die dɩ yɩna nʊaŋ dene wo. 24 Hɔgʊba bale wo gie mana zie wo Ŋmɩŋ nʊazielikiŋ ale wo nagɩsɩ ma mɩŋ. Yɔmʊ wa saaŋ die yiwo Haga, ta ʊ die zie nʊa dieke Ŋmɩŋ die dɩ yɩna Sayina Kunkogiri me wo ta die mɩɩrɩ ʊ bʊa ʊ yɔŋɩsɩ ma wa. 25 Haga zie a yi wa Sayina Kunkogiri dɩ benne Arabia tɩŋgbaŋ ma wa, ta sɩɩ sɩba tɩgɩkpɩɩka gie Jerusalemi wo, ta wʊnɩŋ aŋaŋ ʊ ballɩ yiwo yɔŋɩsɩ. 26 Ta arɩzanna Jerusalemi dɩ sɩ-ʊ-gbaŋ, wʊnɩŋ ʊ yine tɩ nuŋ. 27 Dama dɩ maagɩya Ŋmɩŋ gbaŋkʊ sʊŋ dɩ; “Fʊnɩŋ hɔgʊpɩrɩŋ, yallɩma sʊgɩfɩalɩŋ! Fʊnɩŋ vuodieke dɩ yene ka sɩba maarɩŋ yʊagɩŋ dɩ sɩna dene, chɩama sʊgɩfɩalɩŋ yɩla Dama hɔgʊ dieke ba zetine wo nan keŋ yaa ballɩ pam a tɩaŋ hɔgʊ dieke dɩ benne aŋaŋ ʊ chʊrʊ wa.” 28 Tɔ, n nɩmballɩ, nɩnɩŋ nɩ wana yi Ŋmɩŋ nʊaŋ ballɩ, sɩba Aziki die dɩ yine dene wo. 29 Die saŋka mi die bʊa dieke ba mɩɩrɩna wa sɩba ba mɩɩrɩna vuota dene wo die dɩ mugise vuodieke ba mɩɩrɩna wa aŋaŋ Ŋmɩŋ Halɩkasɩka hagɩrɩbʊ, die dɩ sɩɩ lele gbaŋ. 30 Ama lalɩa ba maagɩ Ŋmɩŋ gbaŋkʊ sʊŋ? Dɩ maagɩya mɩŋ dɩ, “Yagɩ hɔgʊ yɔmʊ wa aŋaŋ ʊ bʊadembike a taaŋ, dama hɔgʊ yɔmʊ bʊadembike kaaŋ gʊtɩ dii ʊ chɔɔŋ wa faarɩ aŋaŋ hɔgʊ dieke dɩ kana ka yi yɔmʊ wa bʊa wa.” 31 Die wɩa n nɩmballɩ, tɩnɩŋ tɩ ka yi hɔgʊ yɔmʊ wa ballɩ, ama tɩ yiwo hɔgʊ dieke dɩ kana ka yi yɔmʊ wa ballɩ.
