1 N nɩmballɩ, die n kenne nɩ jigiri die n ka mʊʊla Ŋmɩŋ wɩaha a yɩa nɩ aŋaŋ nʊanansɩŋ yaa vuota sɩbɩŋ. 2 Dama saŋŋa dieke die n benne aŋaŋ nɩ wa, die n wo sʊŋanyile a gʊtɩ Yisa Masia aŋaŋ ʊ dagarɩkʊ ma kumbu wɩa. 3 Die wɩa die n kenne nɩ jigiri, die n bɩrɩŋ wa wabʊ ta cheele aŋaŋ ŋmaamɩŋ, 4 ta die n ka dagɩ ta mʊʊlɩ wɩaha aŋaŋ vuota sɩbɩŋ die dɩ baaŋ nan yi vuosi nansɩŋ ta ba ye tuoke, ama die n mʊʊlɩya mɩŋ, ta Ŋmɩŋ Halɩkasɩka die dɩ dagɩ aŋaŋ ka hagɩrɩŋ dɩ a yiwo wusie. 5 Die wɩa dɩ ka yi vuota sɩbɩŋ vana nɩ yi Yisa Masia yada ama dɩ yiwo Ŋmɩŋ hagɩrɩŋ. 6 Wusie, tɩ bala aŋaŋ yɩaŋ a yɩa vuodiekemba dɩ mɩŋŋɩna a sɩba Ŋmɩŋ wɩaha. Ama daa tɩŋgbaŋka gie vuosi yɩaŋ yaa tɩŋgbaŋka gie naakpɩɩma, vuodiekemba dɩ bala ba waarɩ ba hagɩrɩbʊ. 7 Yɩaŋ dieke n balala naa yiwo Ŋmɩŋ yɩaŋ lɔbɩrɩkɩŋ ʊ nagɩna a lɔbɩrɩ vuota, yɩaŋ dieke Ŋmɩŋ die dɩ wolinne a vʊarɩ ta ye ka naaŋ dʊnɩa dɩ ka nan vaa tɩ ye jɩlɩma ka. 8 Tɩŋgbaŋka gie naakpɩɩmaha wʊnyɩ wori a ye sɩba yɩabʊ gie. Ba tɩŋ sɩbaka ba tɩŋ kaaŋ kpaasɩ tɩ Yɔmʊtieŋ dagarɩkʊ ma, wʊnɩŋ ʊ sɩna bɩrɩŋ mana. 9 “Dɩ maagɩya Ŋmɩŋ gbaŋkʊ ma dɩ: Jadieke vuota dɩ yene ka yeye yaa ta wʊŋ, ta ka bɩ yile dɩ ka nan bɩagɩ a yi, kanɩŋ ka yine jadieke Ŋmɩŋ dɩ yine siri a zieŋ vuodiekemba dɩ chone wo.” 10 Kanɩŋ Ŋmɩŋ Halɩkasɩka dɩ yi tɩ sɩbaka, dama Halɩkasɩka sɩba jaaŋ mana aŋaŋ Ŋmɩŋ wʊlɔbɩrɩka wɩa gbaŋ. 11 Vuota haalɩbʊ dieke dɩ benne ʊ sʊkʊ kasɩŋ sɩbɩna vuota sʊŋanyile. Die gbaŋ dɩ sɩɩ, vuoŋ ka sɩba Ŋmɩŋ sʊŋanyile sie Ŋmɩŋ Halɩkasɩka kasɩŋ. 12 Haalɩbʊ dieke tɩ tuone wo, ʊ ka yi tɩŋgbaŋka gie haalɩbʊ, ama ʊ yiwo Ŋmɩŋ Halɩkasɩka dieke dɩ baaŋ nan vaa tɩ sɩmma piini dieke ʊ yɩna tɩ wa. 13 Die wɩa, tɩ ka bala wudieke dɩ yine vuota yɩaŋ dagɩŋ; ama tɩ bala wudieke Ŋmɩŋ Halɩkasɩka dɩ dagɩna tɩ, ta bɩ daga Ŋmɩŋ wusieke a yɩa vuodiekemba dɩ yalla Halɩkasɩka. 14 Ama vuodieke dɩ wone Halɩkasɩka nɩŋ, die vuoke ka tuose Halɩkasɩka wɩaha, dama ka yiwo wʊtɔgʊ a yɩ wa ta ʊ kaaŋ dɩ sɩba a chɩasɩ, dama Halɩkasɩka suŋŋinene vuosi ba sɩba a chɩasɩ. 15 Ama vuodieke dɩ yalla Halɩkasɩka sɩba jaaŋ mana dɩ sɩna dene, ama vuoŋ kaaŋ bɩagɩ sɩba ʊ sɩna dene. 16 Sɩba a maagɩna Ŋmɩŋ gbaŋkʊ sʊŋ die wo, dɩ “Mɩnɩa baaŋ nan bɩagɩ mɩŋŋɩ Ŋmɩŋ sʊŋanyile ta kpaaŋ wa?” Ama tɩnɩŋ tɩ sɩba Yisa Masia sʊŋanyile mɩŋ.
