TITUS 2

1Ɔzzànga annɔ akopolo kɛssanga ssɔn la lukopolo gwa lulenɛ bbwak. 2Abwɔɔlɔ bagɛlɛnya bakɔɔmbɛ kɛyɔɔng, basan kɔlɔɔk, bakatbɛ kɛyɔɔng, bayanga kiyila sa bbwak, la kɛsaap la kɛbbɔ akama. 3Assɛ abwɔɔlɔ bagelenya bwanavva attɛ banaang tɛ̀ttɛ̀ bwanavva ba bafalnɛ lafal a kitele Ɔlɔɔmɔlɔɔm banaangnɛ. Tɛ̀ttɛ́ bale babwɔɔlɔ-ibwɔɔlɔ. Tɛ̀ttɛ́ bale babili-batak. Bakopolo kwa kɔyyɛɛpnɛ, 4nkwaaning bakopolo bwaanabwanavva tɛ̀ttɛ̀ bale batele bwalam abbɛ la bwaan abbɛ. 5Bakɔɔmbɛ kɛyɔɔng, basɛlɛ bubbi ka kkwɔɔt. Bale bwanavva ba badoddo ka ssala bwalam abbɛ, nkwaaning ɔlɔɔt ɔlɔk usi bubbi lɛlɔɔk utum lɛmmwɔɔl Ɔlɔɔmɔlɔɔm. 6Assɛ abwɔɔlɔ bakolobbya attɛ bakɔɔmbɛ kɛyɔɔng. 7Annɔ biini anaang budoddo ka itɔk-itɔk ɔkkpɛlɛ ayɔɔ balɔɔt. Alɔɔk lɔkkwɔɔn a kɔlɔɔk, kɔbɛtɛwɔ ka lukopolo annɔ. 8Atolo kutolo kwa bale basiwɔ lɛkpɛn, nkwaaning izzit inaang balɔɔt a kɔfɔk annɔ ka bale basɛlɛ ubbu kɔlɔɔk wa bale balɔɔk batumyɛlɛ. 9Babili batele ibassɛ abbɛ. Banaang kwa kɔsaapnɛbɛ itɔk itɔk ɔkkpɛlɛ. Ka lilɔɔk, tɛ̀ttɛ́ bappyɛlɛbɛ kamma kwa kusinɛ lɛyyɛɛp, 10ɔlɔk vvenɛ la bàzzi ikkpoko gɔɔ bɛfɛɛn ibassɛ abbɛ. Lutini ’gwɔng bayɔɔbɛ kɛyɔɔng ɛkɛtɛ ɔkkpɛlɛ battɛ abbɛ bale balɔɔt ba doddo, nkwaaning bagbaa kuttu lukopolo Ɔlɔɔmɔlɔɔm ɔkkala ikkala ayyɔɔt ka bɛfɛɛn ɔkkpɛlɛ bya banaangnɛ. 11Ɔlɔɔmɔlɔɔm ɔyɔɔbong ppyɛɛ ammɛ wa kuddu ka balɔɔt ɔkkpɛlɛ. 12Ppyɛɛ Ɔlɔɔmɔlɔɔm ’wɔng baang ukopoloyɛlɛ ɔttɛ ikkyaa lɛfal za Ɔlɔɔmɔlɔɔm usinɛ lɛggyan la kusapa bɛfɛɛn a vveengodde ifɔngɔ. Iddu kuddu kwa kɛkɔɔmyɛlɛ kɛyɔɔng la kɛtaa bbwak, iddu kwa kɔsaapnɛ Ɔlɔɔmɔlɔɔm ka vveeng ’wɔng. 13Ka ilenɛ ka kɛtaa kɛkat Kɛtɔm-a-ppyɛɛ sa ilenɛ baang ka ittinanɛ ifɔngɔsɛ. Assɛ kilenɛ sa Ɔlɔɔmɔlɔɔm ayyɔɔt la ɔkkala-ikkala ayyɔɔt Jesus Christ bale baffu. 14Ɔsammɛ kɛyɔɔng unnyiyɛlɛ ɔttɛ ɔkkalayɛlɛ ka lilɔɔk ibbyap ɔkkpɛlɛ. Ɔnaangyɛlɛ izzanga balɔɔt ba doddo. Ile balɔɔt ammɛ kɛyɔɔng ba baggyannɛ kɛnaang a budoddo. 15Akopolo bɛfɛɛn ’byɔng mung. Akɔɔm lakke annɔ ka ale assɛɛn balɔɔt ba ba gɔpɔlɔwɔnɛ luttina la ɛkɛtɛ ale attamabɛ. Tɛ̀ttɛ́ ayila ɔlɔɔt vvɔn gbɔɔ ɔtɔkwɔ ka biwaan.

will be added

X\