TITUS 1

1Lɛmmwɔɔl ’zɔng lissi ka anaam Paul, bɔɔyi Ɔlɔɔmɔlɔɔm, Uyilabɔtɔɔm a Jesus Christ. Ɔsanganɛ ɔtɔɔm ɔttɛ nffu nnaang kiyila balɔɔt ba Ɔlɔɔmɔlɔɔm ɔsanganɛ kɛkkaam. Ɔttɛ nyɔɔbɛ ɛtɔk a lukopolo gwa lɔkkwɔɔn ka luzɔɔm ayyɔɔt. 2Akkwɛ kulenɛ ka ikkala kuddu kwa kɛfal a kɛfal. Ɔlɔɔmɔlɔɔm wa usinɛ lɛlaak lɛlɔɔk ɔdɔkɔ usekeleyɛlɛ kuddu kwa kɛfal a kɛfal ’kwɔng mung, tɛ́ttɛ́ ɛkɛtɛ ya ɔlɔɔmnɛ ɛkpansi ɛffɔ. 3Ɔyɔɔ nsekele ammɛ ka bbwak ka bɔtɔɔm bwa ɔtɔɔmnɛ. Nkwɔng ɔdɔkɔ ɔssɛɛnnɛ anaam ka kɔbɔɔk, nbwɔɔlɔkwɛ ka lakke Ɔlɔɔmɔlɔɔm, ɔkkala ikkala ayyɔɔt. 4Nkkpɔk nfeewɔ annɔ Titus, waan anaam ka lɔkkwɔɔn ka kiyila sa iyanganɛ la annɔ. Numa Dedde Ebinukkpaapi, Ɔlɔɔmɔlɔɔm ayyɔɔt, la Christ Jesus, ɔkkala ikkala ayyɔɔt banaangwɔ ppyɛɛ, bassɛɛnwɔ bɔkaat ka luppyam. 5Ngbata nkɔngɔwɔ ka Crete nttɛ ɔkkɔɔnɛ alɔngɔlɔ lilɔɔk sa litiinɛ sa kɛlɔngɔlɔ. Assang balɔɔt ba balenɛ bagɛlɛnya luzɔɔm ka lɛffɛ la zzɔn. Akke lɔttama anaam. 6Ɔgɛlɛnya luzɔɔm úle ɔlɔɔt wa usinɛ kibbi ka kɔlɔɔk lizzi. Ule ɔlɔɔt wa ɔtɔknɛ wanavva vvɔn keem. Bwaan ammɛ bale bwɔɔn ba bayanganɛ kiyila. Tɛ̀ttɛ́ ule ɔlɔɔt wa ɔbbyapnɛ. Ule ɔlɔɔt wa babbɛ batelemɛnɛ. 7Ka ulenɛ uzzilɛttɔ luzɔɔm, tɛ̀ttɛ́ ule ɔlɔɔt wa ɔnaangnɛ lɛlaak. Tɛ̀ttɛ́ ule ɔlɔɔt wa ɔkkyaamɛnɛ ɔsak ɔnaang kamma la balɔɔt. Ɔfɔngɔ ɔlɔɔt wa ɔyanganɛ ubbu luppyam kile, ɔlɔk ɔvva-batak, ɔlɔk ɔggyan-a-kɔlɔɔk, ɔlɔk ɔwɔnɔ. 8Ulé ɔlɔɔt wa uggwoomnɛ kɔlɔɔk, kɔlɔɔk kwa kɔyyɛɛpnɛ kɔsaapmɛ. Ule ɔlɔɔt wa ɔkɔɔmmɛnɛ kɛyɔɔng. Ule ɔlɔɔt wa bbwak. Utele Ɔlɔɔmɔlɔɔm. Ule ɔlɔɔt wa ɔsannɛ kɔlɔɔk. 9Ule ɔlɔɔt wa ubeenɛ bbwak ka bɔtɔɔm Ɔlɔɔmɔlɔɔm bwa bulenɛ kɔlɔɔk a lɔkkwɔɔn, bule bbwak la lukopolo luzɔɔm ’gwɔng baang. Ning vvenɛ ukkwoong ɔkɔɔm lukopolo gwa lɔkkwɔɔn, ɔbba balɔɔt bikɔɔm, ɔgbaa ɔyɔɔ kɛsɛpɛ balɔɔt ’bɔng baang ba bafimnɛkwɛ tɛ̀ttɛ̀ basɛpɛnɛ. 10Balɔɔt bakɔɔng lɔkɔɔng, gaang gaang balɔɔt ba badɔkɔnɛ bakup luzɔɔm gwa balɔɔt a Jews kkpal, mung basseke ka bakupnɛ Christ. Abbɛ bafimnɛ kwa Ɔlɔɔmɔlɔɔm, bafɛɛt balɔɔt la babbu ittina abbɛ. 11Kɔyyɛɛp ka atununɛbɛ. Asinɛbɛ litunu, vvenɛ babbum itutum ɔkkpɛlɛ ka kikopolo lukopolo gwa búsinɛ̀ likopolo. ɔssanga ubbu luttina kɛnaang ikkpoko. 12Ɔdɔkɔ ule ɔlɔɔt a Crete biini wa uppyeenɛ kutolo ɔlɔɔknɛ ɔttɛ, “Balɔɔt a Crete bakkala lɛlaak ɛkɛtɛ ɔkkpɛlɛ. Bale tɛ̀ttɛ̀ babbyap isɛɛn ka kɛmat. Bakpɛkkpɛlɛ balɔɔt ba basinɛ kɔlɔk lɛsan ɔgbaa la kizzi kazzi.” 13Kwa ɔlɔɔknɛ, kule ka lɔkkwɔɔn. Kwakkwɛ baang ale attamabɛ gaang gaang nkwaaning bayanga kiyila sa doddo, 14ɔlɔk kusibɛ lɛbɛtɛ ka lissa balɔɔt a Jews la lafɔɔ za lassinɛ ka balɔɔt ba balenɛ lɔkkwɔɔn a kɔlɔɔk lifim. 15Bɛfɛɛn ɔkkpɛlɛ bɛyyɛɛp-ɔyyɛɛp ka labɔɔk a balɔɔt ba tɔkɔlɔ abbɛ ulenɛ kpaladada. Ɔzzànga bɔfɛɛn bwa buyyɛɛpnɛ la balɔɔt ’bɔng baang, ba babbɔlnɛ tɔkɔlɔ basɛlɛ kiyila ba bule, ka ippyam abbɛ la ittina abbɛ isinɛ lɛyyɛɛp. 16Babbwa battɛ abbɛ basan Ɔlɔɔmɔlɔɔm lɔsan, ɔzzànga linaang abbɛ ba liyɔɔ littɛ basan mung Ɔlɔɔmɔlɔɔm. Bayanga latun ka ippyam. Ɔlɔɔt ba batele. Balɔɔt ’bɔng baang ba bakkɔnɔ kɛnaang a budoddo kinnyibɛ.

will be added

X\