ROMANS 8

1Balɔɔt ba balenɛ ka bɔkaat la Christ Jesus gedegede mung ba kɔwwɔɔl ba babɛlɛ lile. 2Lafɔɔ za Kuyeeng za lannyinɛyɛlɛ kuddu ka Christ Jesus lasanganɛbong ka lafɔɔ bubbi la lubbe. 3Bwa Lafɔɔ lasinɛ likkwoong lanaang ka lɛfal ɔlɔɔt lɛkkpɛlɛnɛ, Ɔlɔɔmɔlɔɔm ɔnaang, Ɔwwɔɔl bubbi ka lɛfal ɔlɔɔt ka ɔtɔɔmnɛ Waan ammɛ wa uffunɛ la lɛfal tɛ̀ttɛ̀ za ɔlɔɔt wa ɔnaangnɛ bubbi, ɔbɛtɛ bubbi. 4Ɔlɔɔmɔlɔɔm ɔnaang nkwɔng nkwaaning ayyɔɔt ba lafal ayyɔɔt lalenɛ za Kuyeeng, lasi za ɔssɛbibit lile ikkwoong inaang bwa Lafɔɔ za bbwak lalɔɔknɛ iffata. 5Balɔɔt ba bataanɛ tɛ̀ttɛ̀ lɛfal abbɛ lɛbwɔɔlɔnɛbɛ, basambong ippyam abbɛ bannyi kwa lɛfal lɛggyannɛ. Balɔɔt ba bataanɛ tɛ̀ttɛ̀ Kuyeeng-Ɔlɔɔmɔlɔɔm kɔbwɔɔlɔnɛbɛ, basambong ippyam abbɛ bannyi kwa Kuyeeng-Ɔlɔɔmɔlɔɔm kɔggyannɛ. 6Asamnɛ luttina annɔ annyi kɛfal annɔ, kitele lɛttɔ akkwɛ ulenɛ lubbe. Asamnɛ luttina annɔ annyi Kuyeeng-Ɔlɔɔmɔlɔɔm, kitele lɛttɔ akkwɛ ulenɛ kɛyanga kuddu la bɔkaat. 7Ɔlɔɔt ule ka kɔfɔk la Ɔlɔɔmɔlɔɔm ka ɔsamnɛ luttina ammɛ unnyi kɛfal ammɛ. Lafɔɔ Ɔlɔɔmɔlɔɔm ba utele, gɔɔ usi likkwoong uteleze. 8Balɔɔt ba batelenɛ lafal abbɛ ba bakkwoong banaang kwa kɔsaapnɛ Ɔlɔɔmɔlɔɔm. 9Ɔzzànga annyɔɔng ba ataanɛyɔng tɛ̀ttɛ̀ lafal annyɔɔng lattɛnɛ ataayɔng, ataayɔng tɛ̀ttɛ̀ Kuyeeng-Ɔlɔɔmɔlɔɔm kɔbwɔɔlɔwɔnɛyɔng, ulenɛ ka Kuyeeng-Ɔlɔɔmɔlɔɔm kulenɛ la annyɔɔng. Ɔlɔɔt duu wa usinɛ Kuyeeng a Christ lɛyanga, wa ammɛ ba ule. 10Ɔzzanga Christ ɔtaanɛ la annyɔɔng, mkkpa kkwɔɔt annyɔɔng libbe ka bubbi annyɔɔng, Kuyeeng-Ɔlɔɔmɔlɔɔm kulenɛ kuddu annyɔɔng ka ataanɛyɔng tɛ̀ttɛ̀ Ɔlɔɔmɔlɔɔm ɔggyannɛ. 11Ulenɛ ka Kuyeeng-Ɔlɔɔmɔlɔɔm kwa kufungalanɛ Jesus Christ ka lubbe kɔtaanɛ la annyɔɔng, nzang Ɔlɔɔmɔlɔɔm wa ufungalanɛ Christ ka lubbe, vvenɛ unnyiwɔyɔng kuddu kwa kkwɔɔt ka Kuyeeng ammɛ kulenɛ la annyɔɔng. 12Ikpana anaam, iyangayɔng lafɔɔ, ɔzzanga tɛ̀ttɛ́ itaayɔng tɛ̀ttɛ̀ lafal ayyɔɔt laggyannɛ lattɛ itaa. 13Ataanɛ tɛ̀ttɛ̀ lɛfal annɔ lɛggyannɛ vvenɛ abbe. Ɔzzánga akɔɔmnɛ Kuyeeng awwɔɔl babbu linaang annɔ vvenɛ addu. 14Balɔɔt ba bataanɛ la Kuyeeng-Ɔlɔɔmɔlɔɔm balenɛ bwaan-Ɔlɔɔmɔlɔɔm. 15Kuyeeng kwa Ɔlɔɔmɔlɔɔm ulewɔnɛyɔng linnyi ba kɔnaangwɔyɔng azzangayɔng babili, ɔlɔk ɔbbwɔpɔwɔyɔng. Lutini ’gwɔng, kɔnaangwɔyɔng azzangayɔng bwaan-Ɔlɔɔmɔlɔɔm. Ikkwa ikkwɔɔ Ɔlɔɔmɔlɔɔm ka lakke Kuyeeng ittɛ, “Dedde! Dedde anaam!” 16Kuyeeng-Ɔlɔɔmɔlɔɔm kutoolonɛ, la kwa ayyɔɔt, kɔyɔɔyɛlɛ kɔttɛ ayyɔɔt bwaan-Ɔlɔɔmɔlɔɔm. 17Ayyɔɔt ka ilenɛ bwaan ammɛ, vvenɛ itɔk ppyɛɛ wa ulokonɛ balɔɔt ammɛ. Vvenɛ itul bwa Ɔlɔɔmɔlɔɔm ulokonɛ la Christ. Iyɛnnɛ akama la Christ vvenɛ issɛ iggele la ammɛ. 18Nttinanɛ akama wa iyɛnnɛ gedegede mung baala akkwoong asam akakala la laggele za ile iyɛn ka ussoonɛ. 19Ɛkpansi ɔkkpɛlɛ ɛtaabong ɛkat ɛttɛ ɛyɛn Ɔlɔɔmɔlɔɔm ka ule ɛyɔɔyɛ bwaan ammɛ. 20Ɛkpansi ɔkkpɛlɛ ɛbɛpɛ esseke bɔfɛɛn bwa gbɔɔ, ka kɔsaapnɛ ɛkpansi lissi, ɔzzanga Ɔlɔɔmɔlɔɔm ɔttɛnɛ kɔtaa ning baang. Ɔzzanga luttina lutii baang 21kɔttɛ kɛtɔm ssɔn vvenɛ ɔsanga ɛkpansi ɔkkpɛlɛ ka bubili lubbe batul laggele kɛtta ka bubili za bwaan-Ɔlɔɔmɔlɔɔm. 22Isan lɔsan ittɛ ka ussinɛ bakang uffu ɔffɔ ka gedegede mung, ɛkpansi ɔkkpɛlɛ effimibong ka eppyeenɛ bɔssɔp tɛ̀ttɛ̀ bɔssɔp a lɛmaat. 23Ɛkpansi keem lissi elenɛ ka kiffimi. Ayyɔɔt balɔɔt ba iyanganɛ Kuyeeng-Ɔlɔɔmɔlɔɔm tɛ̀ttɛ̀ lɛsɔɔk ammɛ za kɛkɔɔm ɛtɔk, issɛ iffimi ning baang ittɛ ɔnaangyɛlɛ izzanga bwaan ammɛ; ɔsangayɛlɛ ɔkkpɛlɛ ka bubili. 24Kɛkkala ayyɔɔt kissi ka kwa ikkɔlɔnɛ. Iyɛnnɛ bwa ikkɔlɔnɛ, nzang baang ikkɔlɔ ssɔng lissi. Nyinɔɔng ɔkkɔlɔnɛ bɔfɛɛn bwa ulenɛ lɛyanga? 25Ikkɔlɔ bwa itakanɛ lɛyanga, ibbe luppyam itaa ikatbwɛ. 26Kuyeeng-Ɔlɔɔmɔlɔɔm kɔssɛ kuffu kutteleyɛlɛ ning baang ka ilenɛ lɛkkpɛlɛ mung. Ba isan tɛ̀ttɛ̀ bussɛɛnnɛ luzɔɔm, Kuyeeng-Ɔlɔɔmɔlɔɔm kukkpenge Ɔlɔɔmɔlɔɔm kunnyiyɛlɛ, kukkpenge la akama wa asinɛ lɛmmwɔɔl likkwoong azza. 27Ɔlɔɔmɔlɔɔm wa ɔyɛnnɛ ippyam a balɔɔt ɔsan mung luttina Kuyeeng ka kukkpengenɛ ka lɛttɔ balɔɔt ammɛ tɛ̀ttɛ̀ ɔggyannɛ. 28Isan lɔsan ittɛ, Ɔlɔɔmɔlɔɔm ɔkɔɔm bɛfɛɛn ɔkkpɛlɛ ɔnaang budoddo la balɔɔt ba batelemɛnɛ. Abbɛ balenɛ ba ammɛ biini ulenɛ lɛkkwɔɔ ka luttina ammɛ. 29Balɔɔt ba Ɔlɔɔmɔlɔɔm ulenɛ lɛggba lɛsanga, ɔsangabongbɛ uloko zzekep basseke tɛ̀ttɛ̀ Waan ammɛ, nkwaaning ule ɔkɔɔm-ɛtɔk a ikpana ammɛ ggbadam. 30Ɔzzánga Ɔlɔɔmɔlɔɔm ɔkkwɔɔ balɔɔt ba ulenɛ lɛsanga uloko zzekep. Balɔɔt ba ulenɛ lɛkkwɔɔ ɔssɛ ulokobɛ bbwak la ammɛ biini. Ba ulokonɛbɛ la ammɛ biini bassɛ batul kibeet ammɛ. 31Nkwɔng ka kulenɛ ning mung, ile ilɔɔk nang? Ulenɛ ka Ɔlɔɔmɔlɔɔm ulenɛ la ayyɔɔt, nnyinɔɔng ule ukkwoong ulokoyɛlɛ kɔfɔk? 32Waan ammɛ ka isimi usi lɛsam uloko. Ɔsammɛ unnyi ka lɛttɔ ayyɔɔt ɔkkpɛlɛ. Ka unnyinɛyɛlɛ Waan ammɛ, vvenɛ ɔssɛ unnyiyɛlɛ bɛfɛɛn ɔkkpɛlɛ ka lɛsɔɔk ɔɔ? 33Nyinɛ ule unnyi balɔɔt ba Ɔlɔɔmɔlɔɔm ɔsanganɛ kibbi? Ka Ɔlɔɔmɔlɔɔm biini ɔttɛnɛ kibbi ba bataka bazzi! 34Ɔlɔɔt ɔlɔk ule baang wa ule ukkwoong ɔwwɔɔlbɛ ɔɔ? Christ Jesus ulenɛ ɔlɔɔt wa ubbenɛ, Ɔlɔɔmɔlɔɔm ufungalamɛ ka lubbe, ɔtaa ka kuddu ka kɔbɔɔk ɛlaabɔɔk ammɛ. Ammɛ ukkpengenɛ Ɔlɔɔmɔlɔɔm unnyiyɛlɛ! 35Mung nnyinɛ ule ukkwoong utunu kɛsaap a Christ ka kkwɔɔt ayyɔɔt? Kɛggyan a kɔlɔɔk kikkwoong mung ɔɔ? Faa akama? Faa buwɔɔng? Faa ibbɔl? Faa lubbe? 36Tɛ̀ttɛ̀ luvva Ɔlɔɔmɔlɔɔm lɔlɔɔknɛ lɔttɛ, “Ile ka akama lubbe ɛkɛtɛ ɔkkpɛlɛ ka lɛttɔ annɔ; Bayɔɔyɛlɛ akama tɛ̀ttɛ̀ itɔɔn ya bale ka bawwɔɔlnɛ.” 37Ɔzzanga ning baang ba kule. Lilɔɔk ’sɔng mung ɔkkpɛlɛ ibɛtɛsɛ lɔbɛtɛ ka lakke Ammɛ wa isaapmɛnɛ. 38Nsanbong nttɛ bɔfɛɛn bwa bukkwoongnɛ buggbayɛlɛ ka kɛsaap ammɛ ba bule; mkkpa ule lubbe gɔɔ kuddu; gɔɔ bayilabɔtɔɔm Ɔlɔɔmɔlɔɔm; gɔɔ bakɔɔm ɛfɛɛn ka libat; gɔɔ lakke gɔɔ kɛkkpa kɛssɛ; mkkpa ule gedegede mung gɔɔ ussoonɛ; 39Mkkpa ule vveeng wa libat gɔɔ wa kuttɔɔk. Bulɔk ba bule bwa Ɔlɔɔmɔlɔɔm ɔlɔɔmnɛ bwa bule bukkwoong butunuyɛlɛ ka kɛsaap Ɔlɔɔmɔlɔɔm sa Christ Jesus, Uyini ayyɔɔt, unnyinɛyɛlɛ.

will be added

X\