ROMANS 7

1Ikpana anaam asanyɔng lɔsan bwa nle ka nlɔɔknɛ ntum, ka ɔkkpɛlɛ annyɔɔng asannɛyɔng lafɔɔ. Lafɔɔ lakɔɔm ɔlɔɔt ka ɛkɛtɛ ulenɛ ka kuddu. 2Lafɔɔ lalokonɛ wanavva ullu walam ɔddɔkɔddɔkɔ ulam ubbe. Ulam ubbenɛ, wanavva ɔttabong ka lafɔɔ ’zɔng baang, za lakɔɔmnɛ killu abbɛ la ammɛ. 3Ɔzzànga ullunɛ walam ɔlɔk ka walam ammɛ utiinɛ ikokolo, vvenɛ bakkwɔɔmɛ, Umini-la-walam-ɔlɔk. Ɔzzànga walam ubbenɛ, usseke wanavva wa gbɔɔ ka lakke lafɔɔ. Ullunɛ walam ɔlɔk la bubbi ba ule. 4Ikpana anaam, kule ning baang la annyɔɔng. Annyɔɔng ɔgbaa assɛbong abbeyɔng, ikupnɛ kwa Lafɔɔ, ka alenɛyɔng kikkeep a kkwɔɔt a Christ. Gedegede mung aleyɔng ba ammɛ ba Ɔlɔɔmɔlɔɔm ufungalanɛ ka lubbe, ɔttɛ nkwaaning ile balɔɔt ba doddo ka kɛnaang Ɔlɔɔmɔlɔɔm. 5Itaanɛ tɛ̀ttɛ̀ lafal ayyɔɔt lalɔɔknɛ, Lafɔɔ lafeele babbu ittina ya ilenɛ ka kɛnaang ka kkwɔɔt ayyɔɔt isseke ba doddo ka kɛnaang a lubbe. 6Ɔzzànga gedegede mung ittabong ka Lafɔɔ ka ibbenɛ innyizɛ azzɛ za ladɔkɔnɛ lakɔɔmyɛlɛ tɛ̀ttɛ̀ balɔɔt igbakkɔpɔ. Gedegede mung ba ibɛlɛ lɛnaang ikup kwa Lafɔɔ za bakkpɔknɛ, isseke ka inaangnɛ ikup kwa ufaa ɛtɔk wa Kuyeeng Ɔlɔɔmɔlɔɔm. 7Mung ile ilɔɔk nang? Ile ilɔɔk ittɛ Lafɔɔ biini lanaang bubbi ɔɔ? Ning baang lissi! ɔzzànga Lafɔɔ lanaangnɛnɛ nsan bwa bubbi bulenɛ. Lafɔɔ businɛ lɛttɛ, “Tɛ̀ttɛ́ akkɔlɔ ikkɔlɔ” nzang nsi lɛsan bwa ikkɔlɔ ilenɛ ka luppyam. 8Bubbi bussɛ la Lafɔɔ buyɛn kufuk bufeelenɛ bɛssanga ikkɔlɔ ɔkkpɛlɛ ka luppyam. Bubbi bule bɔfɛɛn bwa nzang bulenɛ libbe, Lafɔɔ lasinɛ lile. 9Anaam biini ntaabong ikokolo kkpal ka Lafɔɔ lasinɛ lile. Lafɔɔ laffunɛ, bubbi butum bufeele buffu lɛfal. 10Anaam nbbe. Lafɔɔ za ladɔkɔnɛ za kɛkɔɔm a kuddu kiffu, ka kwa anaam ladɔkɔ lappyɛɛ lakɔɔm lubbe lafeenɛ. 11Bubbi bussɛ la Lafɔɔ buyanga kufuk bufɛɛtnɛ, bukɔɔm Lafɔɔ ’zɔng baang buwwɔɔlnɛ. 12Ka kulenɛ ning, Lafɔɔ biini bubbi ba layanga. Lafɔɔ layyɛɛp lɔyyɛɛp lale bbwak ɔgbaa. 13Ngkka mung ulenɛ kɛttɛ bɔfɛɛn bwa buyyɛɛpnɛ bunaangnɛnɛ nbbe ɔɔ? Ning lissi ffet. Bubbi bunaangnɛ ning. Bukɔɔm bɔfɛɛn bwa buyyɛɛpnɛ bufɛɛtnɛ. Bubbi bukɔɔm lubbe bufeenɛ nkwaaning balɔɔt ɔkkpɛlɛ basan lɛfal abbwɛ ka bulenɛ bubbi. Kwakkwɛ ikɔɔmnɛ Lafɔɔ isan ittɛ bubbi bule bɔfɛɛn bwa bubbɔlnɛ ka lɔkkwɔɔn. 14Isan lɔsan ittɛ Lafɔɔ layyɛɛppɔyyɛɛp. Ɔzzànga anaam ɔlɔɔt wa basammɛnɛ tɛ̀ttɛ̀ ubili bataan bubbi. 15Ba nsan bwa nnaangnɛ, ka nsinɛ lɛnaang bwa nggyannɛ nttɛ nnaang, nppyɛɛ nnaang kwa kusinɛnɛ lɛsaap. 16Nnaangnɛ kwa nsinɛ lɛggyan nttɛ nnaang, ning baang nyilabong nttɛ Lafɔɔ lale bbwak. 17Anaam biini lissi nnaangnɛ bɛfɛɛn ’byɔng mung, bubbi bwa bullunɛ ka kkwɔɔt anaam bunaangnɛ. 18Nsan lɔsan nttɛ budoddo ka tɔkɔlɔ nɛ ba bukkwoong butaa ka lɛfal anaam ka nlenɛ ɔlɔɔt. Mkkpa luttina gwa kɛnaang a budoddo lulenɛ baang ka tɔkɔlɔ, ba nkkwoong nnaangbwɛ. 19Budoddo bwa bunaangnɛ, ba nnaang, nppyɛɛ nnaang bubbi bwa nsinɛ lɛggyan nttɛ nnaang. 20Nnaagnɛ bwa nsinɛ lɛggyan nttɛ nnaang, ning baang anaam lissi nlenɛ ɔlɔɔt wa ɔnaangnɛbwɛ, bubbi bwa bulenɛnɛ ka tɔkɔlɔ ka butaanɛ bunaangnɛ. 21Ɔzzánga nkɔɔlɔ nttɛ lafɔɔ lale ka kɛnaang: Ɛkɛtɛ ya nttɛnɛ nnaang kwa kɔyyɛɛpnɛ, kɛnaang a bubbi kɛppyɛɛnɛ kɛttanɛ lɛsaap. 22Luttina anaam luggele kwa Lafɔɔ Ɔlɔɔmɔlɔɔm. 23Ɔzzanga nppyɛɛ nyɛn kɛssanga lafɔɔ lalɔk ka kɛnaang ka kkwɔɔt anaam. Lafɔɔ ’zɔng baang lallu kullu la lafɔɔ za lasaapnɛ luppyam anaam. Lanaangnɛ nsseke ubili azzɛ za lalenɛ lafɔɔ bubbi. 24Nsibong ɔlɔɔt wa ɔkkyaamɛnɛ lɛbɛlɛ lile! Nyinɔɔng ule ɔkkalanɛ ka kkwɔɔt ’sɔng mung lile ka lisammɛnɛ linnyi lubbe? 25Nssɛbong ka Uyini ayyɔɔt, Jesus Christ, ɔkkala-ikkala, nwomo Ɔlɔɔmɔlɔɔm kɛnaang! Uwɔng ulenɛ kɛfal anaam: Anaam biini nkkwoong mung ntele Lafɔɔ Ɔlɔɔmɔlɔɔm ka luttina anaam keem, lɛfal anaam, ka nlenɛ ɔlɔɔt, litele lafɔɔ bubbi.

will be added

X\