ROMANS 6

1Ile ilɔɔk nang? La ilɔɔk ittɛ ikama-ɔkama inaang bubbi nkwaaning kibbe-lɛttɔ Ɔlɔɔmɔlɔɔm kiggbenge kɛgbaa ɔɔ? 2Ning baang ba kule. Ibbebong kwa bubbi; ile inaang nang ibbal lɛppyɛlɛ imii inaangbwɛ? 3Asanyɔng mung ’kwɔng ittɛ: Ka inaangnɛ baptizim itaa ka bɔkaat la Christ Jesus, itulbong lubbe ggwɔn ibbe la ammɛ. 4Ka banaangnɛyɛlɛ baptizim itúl lubbe ggwɔn la ammɛ ibbe, bassɛbong balliyɛlɛ la ammɛ. Ka ufungalanɛ ka lubbe ka lakke abassɛ, ayyɔɔt ɔgbaa vvenɛ issɛ iyanga ufaa kɛfal. 5Ulenɛ bɔfɛɛn ayyɔɔt la ammɛ ilenɛ bɔfɛɛn bbwɔn ka lubbe ammɛ, vvenɛ issɛ ile bɔfɛɛn bbwɔn la ammɛ ka kifungala ka lubbe tɛ̀ttɛ̀ ammɛ ufungalanɛ. 6Isan mung ’kwɔng: ittɛ bawwɔɔlbong ɔtɔm a lɛfal ayyɔɔt la Christ ka Cross, nkwaaning lakke bubbi lafal ayyɔɔt labɛpɛ, ɔlɔk ifɔngɔ babili bubbi kɛbɛlɛ lile. 7Ɔlɔɔt ubbenɛ ɔttabong ka lakke bubbi. 8Ilenɛ libbe la Christ, iyilabong ittɛ vvenɛ issɛ itaa la ammɛ ka kuddu. 9Isanbong ittɛ Ɔlɔɔmɔlɔɔm ufungalabong Christ ka lubbe, ba ɔbɛlɛ libbe. Lubbe lakke ba lɔbɛlɛ lɛyanga ka kkwɔɔt ammɛ. 10Lubbe gwa ubbenɛ ɔdɔkɔ ubbe kwa bubbi. Ɔzzànga kuddu kwa uddunɛ gedegede mung uddu kwa Ɔlɔɔmɔlɔɔm. 11Issɛ ittinayɛlɛ kɛyɔɔng ittɛ ibbebong kwa bubbi. Ɔzzànga iddubong kwa Ɔlɔɔmɔlɔɔm ka ilenɛ ka bɔkaat la Christ Jesus. 12Tɛ̀ttɛ́ bubbi bubɛlɛ kkwɔɔt annyɔɔng lɛkɔɔm, tɛ̀ttɛ́ affu anaangyɔng kwa luttina lafal annyɔɔng lɔlɔɔknɛ. 13Gɔɔ tɛ̀ttɛ́ akkyaayɔng kikeep annyɔɔng kɛlɔk afɔngɔyɔng bubbi bukɔɔm bunaang ibbyap. Lutini ’gwɔng asamwɔyɔng kɛyɔɔng annyiyɔng Ɔlɔɔmɔlɔɔm tɛ̀ttɛ̀ balɔɔt ba balenɛbɛ ka lubbe lifungala bataa ka kuddu. Asamwɔyɔng kɛyɔɔng ɔkkpɛlɛ annyimɛyɔng, ɔkɔɔmwɔyɔng ɔnaang kɔlɔɔk kwa bbwak. 14Bubbi tɛ̀ttɛ́ bubɛlɛwɔyɔng lɛkɔɔm. Kwa Lafɔɔ ba adduyɔng; adduyɔng kwa kibbe-lɛttɔ Ɔlɔɔmɔlɔɔm. 15Ile inaang nang? Inaang bubbi ka isinɛ ka Lafɔɔ lile, ile ka kibbe-lɛttɔ Ɔlɔɔmɔlɔɔm ɔɔ? Ning lissi! 16Asanyɔng lɔsan attɛyɔng asamwɔnɛyɔng kɛyɔɔng ɔkkpɛlɛ assekeyɔng tɛ̀ttɛ̀ babili ka kitele ɔlɔɔt, ɔlɔɔt ’wɔng baang wa atelenɛyɔng ussekenɛ ssaawɔ annyɔɔng. Mkkpa ule wa bubbi, wa kitele lɛttɔ kilé kilè lubbe. Ɔlɔk wa latele, wa kitele lɛttɔ kile kile kɛtaa bbwak tɛ̀ttɛ̀ Ɔlɔɔmɔlɔɔm ɔggyannɛ. 17Ɔzzànga luwomo lule gwa Ɔlɔɔmɔlɔɔm! Ka ɛkɛtɛ nnyɔn adɔkɔyɔng babili bubbi, ɔzzànga ateleyɔng lɔkkwɔɔn a kɔlɔɔk gwa lulenɛ ka lukopolo gwa appyeenɛyɔng la ippyam annyɔɔng ɔkkpɛlɛ. 18Basangawɔyɔng ka bubbi, assekɛyɔng babili kɛtaa tɛ̀ttɛ̀ Ɔlɔɔmɔlɔɔm ɔggyannɛ. 19(Nlɔɔk nnyiwɔyɔng ka lɛmmwɔɔl za ɔlɔɔt ɔkkpɛlɛ uppyeenɛ ka akoolonɛyɔng kippyee kɔlɔɔk.) Asamwɔyɔngbong kɛyɔɔng ɔkkpɛlɛ kkpal annyiyɔng ka bubili babbu lilɔɔk la ibbyap ka ɛtɔk a bubbi. Assɛ asamwɔyɔng kɛyɔɔng gedegede mung annyiyɔng ka bubili kɛtaa tɛ̀ttɛ̀ Ɔlɔɔmɔlɔɔm ɔggyannɛ ka ɛtɔk a budoddo. 20Ka adɔkɔnɛyɔng babili bubbi, luttina gwa kɛnaang kwa Ɔlɔɔmɔlɔɔm ɔggyannɛ asiyɔng lɛyanga. 21Isak annyɔɔng ɔdɔkɔnɛ bɔng, ka anaangnɛyɔng bɛfɛɛn bya bɛnaangwɔnɛyɔng izzit gedegede mung? Kitele lɛttɔ lilɔɔk ’sɔng baang ulenɛ lubbe! 22Ɔzzànga gedegede mung ɔsangawɔyɔngbong ka bubbi, assekeyɔng babili Ɔlɔɔmɔlɔɔm. Isak annyɔɔng ulenɛ lɛfal za asamnɛ ɔkkpɛlɛ azzɛ annyi Ɔlɔɔmɔlɔɔm. Ikipili a ’kwɔng ulenɛ kuddu kwa kɛfal a kɛfal. 23Ikipili bubbi ulenɛ lubbe, ɔzzànga lɛsɔɔk Ɔlɔɔmɔlɔɔm ulenɛ kuddu kwa kɛfal a kɛfal ka bɔkaat la Christ Jesus, Uyini ayyɔɔt.

will be added

X\