ROMANS 5

1Mung ka ilenɛ lɛssɛ ka Jesus Christ, itaa bbwak la Ɔlɔɔmɔlɔɔm ka kiyila ayyɔɔt issɛbong issɛ ka ammɛ, Uyini ayyɔɔt, iyanga bɔkaat. 2Kɔssɛ ka kiyila sa iyanganɛ, ɔnaangyɛlɛ isan kibbe-lɛttɔ Ɔlɔɔmɔlɔɔm sa iddunɛ kwa assɛ. Issɛ iggele ka luttina gwa iyanganɛ lɔttɛ vvenɛ iyanga lakke Ɔlɔɔmɔlɔɔm. 3Ayyɔɔt ɔgbaa issɛ iggele ka lilɔɔk ayyɔɔt ka isannɛ ittɛ assɛ linaangnɛyɛlɛ ibbɔ akama. 4Ɔlɔɔmɔlɔɔm ɔnaangyɛlɛ ppyɛɛ ka kɛbbɔ akama ayyɔɔt. Ppyɛɛ wa ɔnaangnɛyɛlɛ unnyiyɛlɛ luttina. 5Luttina ’gwɔng yɛlɛ ba lɔdɛm gbɔɔ ka Ɔlɔɔmɔlɔɔm ulenɛ Kuyeeng ammɛ lɛkɔɔm ɔssɛɛnyɛlɛ kɛsaap ammɛ ka ippyam ka lɛsɔɔk. 6Ka ɛkɛtɛ ya isinɛ tɛ̀ttɛ̀ inaangnɛ lɛsan, Christ ubbe ka bubbi ayyɔɔt ka ɛkɛtɛ ya Ɔlɔɔmɔlɔɔm ɔlɔɔknɛ uloko. 7Ɔlɔɔt kibbe ka lɛttɔ ɔlɔɔt wa ɔnaangnɛ kwa kɔsaapnɛ Ɔlɔɔmɔlɔɔm kukoolo-ukoolo. Usinɛkkyam ɔlɔɔt ɔlɔk ɔbbɔ mung ubbe ka lɛttɔ ɔlɔɔt wa ɔnaangnɛ budoddo. 8Ɔzzànga Ɔlɔɔmɔlɔɔm ɔyɔɔbongyɛlɛ tɛ̀ttɛ̀ isaapmɛnɛ iffɔ. Christ ɔdɔkɔ ubbe ɔkkalayɛlɛ ka itiinɛ ka bubbi! 9Lubbe ammɛ lɔdɛmbongyɛlɛ itaa bbwak la Ɔlɔɔmɔlɔɔm. Ule usseke ikkala ya ɔkkalanɛyɛlɛ ɔfɔngɔ ka kitun a kɔlɔɔk Ɔlɔɔmɔlɔɔm ɔɔ? 10Idɔkɔ balɔɔt a kɔfɔk Ɔlɔɔmɔlɔɔm, ɔzzànga mung lubbe Waan ammɛ lɔnaangbongyɛlɛ isseke inngwa ammɛ. Anngwa tɛ̀ttɛ̀ ile isaapmɛ gedegede mung wa ilenɛ inngwa ammɛ! 11Ɔzzànga ’kwɔng baang keem lissi. Issɛbong ka Jesus Christ wa ɔnaangnɛyɛlɛ inngwa Ɔlɔɔmɔlɔɔm iggele Ɔlɔɔmɔlɔɔm. 12Bubbi bwa buffunɛ ka vveeng ’wɔng mung, bussi ka lɛttɔ ɔlɔɔt vvɔn. Bubbi ammɛ bakɔɔmnɛ lubbe buffu. Kwakkwɛ baang lubbe lɔwaalanɛ ɔkkpɛlɛ ɔssɛbibit, ka ɔlɔɔt ɔkkpɛlɛ ulenɛ bubbi lɛnaang. 13Bubbi budɔkɔ baang ka ɛkpansi tɛ́ttɛ́ bannyi balɔɔt Lafɔɔ; ɔzzànga ka ɛfɛɛn ya lafɔɔ lasinɛ lile, bubbi ba bakɔɔlɔ. 14Lubbe lɔdɔkɔ lɔyanga likke ka ɛkpansi mung ka ussinɛ ka ɛkɛtɛ Uyya umii ɔffɔ ka ɛkɛtɛ a Moses. Ɔgbaa lɔyanga lakke la balɔɔt ba basinɛ bubbi lɛnaang tɛ̀ttɛ̀ Uyya ɔnaangnɛ ka ufimnɛ Lafɔɔ Ɔlɔɔmɔlɔɔm kitele. Úyyá ɔdɔkɔ ɔtaa tɛ̀ttɛ̀ ɔlɔɔt wa ɔdɔkɔnɛ ka kiffu. 15Ɔkkpɛlɛ abbyɛ bɛffa ba bɛbal, ka lɛsɔɔk Ɔlɔɔmɔlɔɔm lisinɛ tɛ̀ttɛ̀ bwa Uyya ɔnaangnɛ lile. Kule ka lɔkkwɔɔn, balɔɔt ppwap babbe ka lɛttɔ bubbi ɔlɔɔt ’wɔng baang vvɔn. Ɔ̀zzànga kibbe-lɛttɔ Ɔlɔɔmɔlɔɔm kɛttanɛ. Kibbe-lɛttɔ sa unnyinɛ ɔssɛbibit ka ibɔɔk a Jesus kɛssɛ kɛttala ning baang. 16Lɛsɔɔk Ɔlɔɔmɔlɔɔm la bubbi ɔlɔɔt vvɔn bile buubuu. Bubbi ɔlɔɔt vvɔn budɛmnɛ “Kizzi Kibbi” kiffu. Ɔppyɛɛnɛ uffu ɔffɔ ka bubbi buttalanɛ, lɛsɔɔk za lisinɛyɛlɛ lɛkkɔnɔ liffu. Azzɛ lilenɛ “Kibbi ba Azzi!” 17Kule ka lɔkkwɔɔn. Kussi ka bubbi ɔlɔɔt vvɔn, lubbe lusseke ka lɔkɔɔmnɛyɛlɛ ka lɛttɔ ɔlɔɔt ’wɔng baang vvɔn. Kwa ɔlɔɔt ’wɔng baang vvɔn Jesus Christ, ulenɛ lɛnaang unnyiyɛlɛ kɔttanɛ! Balɔɔt ɔkkpɛlɛ ba Ɔlɔɔmɔlɔɔm unnyinɛbɛ lɛsɔɔk za kɛtaa la ammɛ bbwak, vvenɛ bassɛ ka Christ bakɔɔm ɛfɛɛn kɛfal a kɛfal. 18Tɛ̀ttɛ̀ bubbi ’bwɔng baang bbwɔn bulenɛ balɔɔt ɔkkpɛlɛ lɛwwɔɔl; linaang ɔlɔɔt vvɔn wa doddo lisangabong balɔɔt ɔkkpɛlɛ ka kɔlɔɔk linnyibɛ kuddu. 19Tɛ̀ttɛ̀ balɔɔt ggbadam battɔnɛ ka bubbi ka kɔlɔɔk ɔlɔɔt vvɔn usinɛ Ɔlɔɔmɔlɔɔm litele, vvenɛ Ɔlɔɔmɔlɔɔm ɔssɛ ɔnaang balɔɔt ggbadam bataa la ammɛ bbwak ɔssanga latele za ɔlɔɔt vvɔn ’wɔng baang utelemɛnɛ. 20Banaang Lafɔɔ nkwaaning itɔk a kɛssɛɛp iyipi. Ɔzzànga ka ɛfɛɛn a bubbi buttalanɛ, lɛsɔɔk Ɔlɔɔmɔlɔɔm vvenɛ lɛssɛ lɛttala baang lɛsak. 21Tɛ̀ttɛ̀ bubbi budɔkɔnɛ bukɔɔm lubbe, bukɔɔm ɛkpansi; lɛsɔɔk Ɔlɔɔmɔlɔɔm lɛssɛbong lɛkɔɔm kɛsɛlɛ bubbi, lɛkɔɔm ɛkpansi, lɛsamyɛlɛ imii ka kuddu kwa kɛfal a kɛfal kwa itɔknɛ ka labɔɔk a Jesus Christ Uyini ayyɔɔt.

will be added

X\