ROMANS 4

1Ile ilɔɔkyɔng nang kwa Abraham, dedde lɔkaan ayyɔɔt balɔɔt a Jews, wa iyɛddɛ-iyɛddɛ? Bɔkka kɔlɔɔk kɔnaangmɛnɛ? 2Abraham butaanɛ bbwak la Ɔlɔɔmɔlɔɔm ka bɛfɛɛn bya ɔnaangnɛ, nzang ɔyanga bɔfɛɛn bwa ɔnaangnɛ kamma utum. Ɔzzànga ba ukkwoong ɔnaang kamma ka lusso Ɔlɔɔmɔlɔɔm. 3Luvva Ɔlɔɔmɔlɔɔm lɔttɛ, “Abraham uyila kwa Ɔlɔɔmɔlɔɔm. Kussi ka kiyila ammɛ Ɔlɔɔmɔlɔɔm ɔtɔkmɛ tɛ̀ttɛ̀ ɔlɔɔt wa bbwak.” 4Ɔlɔɔt wa ɔnaangnɛ kɛnaang, ɔyanga ikipili. Ikipili ammɛ baala batɔkyɛ tɛ̀ttɛ̀ lɛsɔɔk, batɔkyɛ tɛ̀ttɛ̀ bɔfɛɛn bwa ɔnaangnɛ. 5Ɔzzànga ɔlɔɔt wa kɔbɛtɛmɛnɛ kwa kiyila ammɛ usseke kwa linaang, ɔzzánga uyila kwa Ɔlɔɔmɔlɔɔm wa ɔttɛnɛ battɔ-ka-kɔlɔɔk battabong ka akkwɛ, Ɔlɔɔmɔlɔɔm uttina kwa kiyila sa ɔlɔɔt ’wɔng baang ɔyanganɛ ɔnaangmɛ ɔtaa bbwak tɛ̀ttɛ̀ ammɛ Ɔlɔɔmɔlɔɔm biini ɔggyannɛ. 6Nkwɔng kulenɛ kwa David ɔlɔɔknɛ ka kɔlɔɔk a laggele ɔlɔɔt wa Ɔlɔɔmɔlɔɔm ɔtɔknɛ ɔttɛ ule bbwak, usinɛ kwa bɛnaang bɛlɔk lile. Ɔttɛ, 7“Laggele lale za balɔɔt ba Ɔlɔɔmɔlɔɔm ulenɛ babbu linaang abbɛ lisumala, ule bubbi abbɛ livvoong! 8Laggele lale za ɔlɔɔt wa Ɔlɔɔmɔlɔɔm ule usi bubbi ammɛ liffik!” 9Laggele za David, ɔlɔɔknɛ ’zɔng mung lale za balɔɔt ba balenɛ lɛtaa lɛzza keem ɔɔ? Maaye. Lale za balɔɔt ba batakanɛ lɛtaa lɛzza ɔgbaa. Ka bakkpɔknɛ ka luvva Ɔlɔɔmɔlɔɔm battɛ, “Abraham uyila kwa Ɔlɔɔmɔlɔɔm. Kussi ka kiyila ammɛ Ɔlɔɔmɔlɔɔm ɔtɔkmɛ tɛ̀ttɛ̀ ɔlɔɔt wa bbwak.” 10Nkwɔng mung kɔdɔkɔ kɔnaang ka ɛkɛtɛ Abraham ɔzzanɛ lɛtaa ɔɔ? Faa ka ɔtakanɛ lɛtaa lɛzza? Kɔnaang ka ɔtakanɛ lɛtaa lɛzza, ka ulenɛ lɛtaa lɛzza lissi. 11Abraham ɔdɔkɔ ɔzza lɛtaa ka ’kwɔng kulenɛ lɛnaang. Kɛzza lɛtaa ammɛ ulenɛ kɛyɔɔ kɛttɛ, ka Abraham ɔyanganɛ kiyila, Ɔlɔɔmɔlɔɔm ɔtɔkmɛbong ɔttɛ ɔlɔɔt wa bbwak tɛ́ttɛ́ ɔzza lɛtaa. Abraham ulenɛ abassɛ balɔɔt ɔkkpɛlɛ ba bayilanɛ kwa Ɔlɔɔmɔlɔɔm. Kwakkwɛ baang Ɔlɔɔmɔlɔɔm ɔtɔknɛbɛ tɛ̀ttɛ̀ balɔɔt ba bbwak la ammɛ mkkpa bataka lataa lɛzza. 12Ɔlɔɔmɔlɔɔm ɔgbaa ɔssɛ ule abassɛ balɔɔt ba balenɛ lataa lɛzza, ka kwa balenɛ lataa lɛzza keem lissi, bayanga kɛssanga lɛfal zzɔn ka kiyila sa dedde ayyɔɔt Abraham ɔyanganɛ tɛ́ttɛ́ ɔzza lɛtaa. 13Ɔlɔɔmɔlɔɔm ɔnaang nsekele la Abraham la balɔɔt a kikkwu ammɛ ɔttɛ vveeng ’wɔng mung ule wa ammɛ. Nsekele ’wɔng mung kwa Abraham utelenɛ Lafɔɔ, ba ɔnaang; ɔnaang ka ɔyanganɛ kiyila keem, ɔtɔkmɛ tɛ̀ttɛ̀ ɔlɔɔt wa bbwak ka ɛfɛɛn Ɔlɔɔmɔlɔɔm. 14Ulenɛ bɔfɛɛn a basamnɛ nsekele Ɔlɔɔmɔlɔɔm bannyi balɔɔt ba balokonɛ Lafɔɔ, ɔzzánga nzang kiyila bɔfɛɛn bwa gbɔɔ, nsekele Ɔlɔɔmɔlɔɔm ɔssɛ bɔfɛɛn bwa gbɔɔ. 15Lafɔɔ lanaangnɛ kɛkaal Ɔlɔɔmɔlɔɔm kiffu. Ɔzzànga ka ɛfɛɛn a Lafɔɔ lasinɛ lile, kɛbɛpɛ Lafɔɔ baala kile. 16Nsekele ’wɔng baang ɔdɔkɔ ule ka kiyila, nkwaaning nlɔɔk-nloko ’wɔng baang ɔtaa tɛ̀ttɛ̀ kɛbɛtɛ kɛnnɔ ka lɛsɔɔk za Ɔlɔɔmɔlɔɔm unnyinɛ balɔɔt a kikkwu Abraham. Ba unnyi balɔɔt ’bɔng baang keem ba batelenɛ Lafɔɔ, unnyinɛzɛ balɔɔt ɔkkpɛlɛ ba bayilanɛ kwa tɛ̀ttɛ̀ Abraham uyilanɛ Ɔlɔɔmɔlɔɔm, ka Abraham ulenɛ abassɛ balɔɔt ayyɔɔt ɔkkpɛlɛ ba bayilanɛ. 17Tɛ̀ttɛ̀ luvva Ɔlɔɔmɔlɔɔm lɔlɔɔknɛ lɔttɛ, “Nnaangwɔbong abassɛ ifɔɔn ggbadam.” Ɔzzánga nsekele ’wɔng baang ɔyyɛɛp ka lusso Ɔlɔɔmɔlɔɔm ka Abraham ɔyanganɛ kiyila utum Ɔlɔɔmɔlɔɔm wa ufungalanɛ balɔɔt ka lubbe, bataa ka kuddu. Ɔlɔɔmɔlɔɔm wa ɔkɔɔmnɛ lɛmmwɔɔl a kamma ɔnaang bɛfɛɛn bya bisinɛ lɛfal liffu biffu lɛfal. 18Abraham ɔyanga kiyila, ɔtaa ɔkat ka ɛkɛtɛ ya usinɛ lɛbɛlɛ lile wa kɛfɔɔn a waan, ɔzzànga ɔppyɛɛ usseke “Abassɛ ifɔɔn ggbadam.” Tɛ̀ttɛ̀ luvva Ɔlɔɔmɔlɔɔm lɔlɔɔknɛ lɔttɛ, “Balɔɔt a kikkwu annɔ bale bayipi ning mung tɛ̀ttɛ̀ bwaanittuma ka libat.” 19Ɔdɔkɔ kɛtɛkɛtɛ lalɔp a likkpa kubbwɔɔk, ɔzzànga kiyila ammɛ kisi lɛmɛɛm ka uttinanɛ ka ulenɛ lɛkkpɛɛm, kkwɔɔt ammɛ lile lɛkpɛlɛ, avva Sarah ule ulleep. 20Usi kiyila ammɛ lɛkkyaa ɔfɔngɔ. Ndeeta ka luppyam usi lɛyanga utum nsekele Ɔlɔɔmɔlɔɔm. Kiyila ammɛ kinnyimɛ lakke ubungu Ɔlɔɔmɔlɔɔm. 21Ɔsan bbwak ɔttɛ Ɔlɔɔmɔlɔɔm vvenɛ ukkwoong ɔnaang kwa ɔlɔɔknɛ. 22Kwakkwɛ baang kussinɛ ka kiyila sa Abraham ɔyanganɛ, “Ɔlɔɔmɔlɔɔm ɔtɔkmɛ tɛ̀ttɛ̀ ɔlɔɔt wa bbwak.” 23Lɛmmwɔɔl za lɛttɛnɛ, “Ɔlɔɔmɔlɔɔm ɔtɔkmɛ tɛ̀ttɛ̀ ɔlɔɔt wa bbwak” basi lɛkkpɔk kwa ammɛ keem. 24Badɔkɔ bakkpɔk kwa ayyɔɔt ɔgbaa ba ule ɔtɔkyɛlɛ tɛ̀ttɛ̀ balɔɔt ba bbwak ba iyilanɛ kwa ammɛ wa ufungalanɛ Jesus, Uyini ayyɔɔt, ka lubbe. 25Basammɛ bannyi battɛ ubbe ka bubbi ayyɔɔt, ufungalamɛ ɔtaa ka kuddu; nkwaaning kɛtaa kɛyyɛɛpyɛlɛ la Ɔlɔɔmɔlɔɔm.

will be added

X\