ROMANS 3

1Ɛtɔk ’yɔyɔng elenɛ ya balɔɔt a Jews battanɛ Ikanakana? Kkpɔɔ isak a kɛzza lɛtaa ilenɛ ka ’bɔng? 2Ile gaang gaang ka itɔk itɔk ɔkkpɛlɛ! Ka kɛkɔɔm ɛtɔk, Ɔlɔɔmɔlɔɔm ɔdɔkɔ usekele balɔɔt a Jews lɛmmwɔɔl ammɛ. 3Ulenɛ bɔfɛɛn a balɔɔt balɔk basinɛ lɛmmwɔɔl Ɔlɔɔmɔlɔɔm liyila, babɛpɛ nsekele wa banaangnɛ la Ɔlɔɔmɔlɔɔm bɛɛ? Attina attɛyɔng Ɔlɔɔmɔlɔɔm vvenɛ ɔssɛ ɔbɛpɛ nsekele kwakkwɛ baang ɔɔ? 4Ning ba kule! Ɔlɔɔmɔlɔɔm ɔlɔɔk lɔkkwɔɔn a kɔlɔɔk gbisii mkkpa ɔlɔɔt ɔkkpɛlɛ ule ɔkkala-lɛlaak. Tɛ̀ttɛ̀ luvva Ɔlɔɔmɔlɔɔm lɔlɔɔknɛ lɔttɛ, “Bale bayɔɔwɔ asan attɛ kulewɔ bbwak ka ɛkɛtɛ ale alɔɔk; Ale asan attɛ kɛkaal vvenɛ kɛyyɛɛpwɔ ka ɛkɛtɛ ya alenɛ ka kɛkaal assɛ.” 5Mung kule kɔtaa nang, ulenɛ ka babbu linaang ayyɔɔt lippyɛɛnɛ liyɔɔyɛlɛ kkpelegedee littɛ linaang Ɔlɔɔmɔlɔɔm lile bbwak? Ile ilɔɔk nang? Ile ittɛ Ebinukkpaapi bbwak ba ɛnaang ka ɛyɔɔyɛlɛ akama ka lɛttɔ bubbi ayyɔɔt ɔɔ? (Gedegede mung nlɔɔk tɛ̀ttɛ̀ balɔɔt balɔɔknɛ). 6Ning baang kpong-kpong ba kule! Ɔlɔɔmɔlɔɔm usinɛ lɛyyɛɛp, ɔnaang nang ukkwoong ɔkaal kɛkaal a vveengodde? 7Ulenɛ bɔfɛɛn a kɛkkala lalaak anaam kɛnaangnɛ lɔkwɔɔn a kɔlɔɔk Ɔlɔɔmɔlɔɔm lɔtta kkpelegedee lɔgbaa bɛɛ? Mbɔng tɛ́ttɛ́ Ɔlɔɔmɔlɔɔm ɔbbalnɛ akama lɛyɔɔ tɛ̀ttɛ̀ ɔnaang-a-bubbi? 8Kulenɛ ning, mbɔng isinɛ lɛlɔɔk ittɛ, “Inaang bubbi nkwaaning budoddo buffu?” Balɔɔt balɔk bassɛɛnnɛbong ka izzit ka bannyinɛnɛ kibbi ka nlɔɔknɛ kɛssanga kɔlɔɔk ’kwɔng! Vvenɛ battɔ ka kɔlɔɔk ka kulebɛ bbwak a kɛttɔ ka akkwɛ. 9Mung kwa ayyɔɔt balɔɔt a Jews kɔttanɛ kwa Ikanakana lɛyyɛɛp ɔɔ? Ning baang ba kule. Nggba lɛyɔɔ nttɛ lutini Ɔssɛbibit ɔkkpɛlɛ bale banaang-a-bubbi; mkkpa ule wa Jews ɔlɔk wa Ikanakana. 10Luvva-Ɔlɔɔmɔlɔɔm lɔlɔɔknɛ lɔttɛ, “Ɔlɔɔt wa bbwak ba ule, 11Ɔlɔɔt vvɔn wa ɔsannɛ ba ule, gɔɔ ɔlɔɔt wa ɔggyannɛ Ɔlɔɔmɔlɔɔm ba ule. 12Balɔɔt ɔkkpɛlɛ bammabong basseke Ɔlɔɔmɔlɔɔm. Ɔkkpɛlɛ abbɛ bassɛɛpbong; Ɔlɔɔt wa ɔnaangnɛ kwa kɔyyɛɛpnɛ ba ule, gɔɔ ɔlɔɔt vvɔn gbɔɔ. 13Imma abbɛ itaa tɛ̀ttɛ̀ lilli za lilenɛ ppwool. Ibbyap a lɛlaak isseke ka ittanɛbɛ ka kamma lusso ggwɔn. Babbu lammwɔɔl lasseke ka lattanɛbɛ ka bɛkkpa-kamma tɛ̀ttɛ̀ okke ɛzzɔkɔ. 14Imma abbɛ isseke lifɔk a lifɔk sa libbɔlnɛ. 15Ɛkɛtɛ ba batɔk, baddopo balɔɔt bawwɔɔlbɛ. 16Ɛfɛɛn duu ya bamiinɛ bànàang kɔlɔɔk a kɛnnyama la akama. 17Ɛtɔk a bɔkaat ba bataka basan. 18Gɔɔ Ɔlɔɔmɔlɔɔm ka zzeen bɛ ba ule.” 19Gedegede mung isan lɔsan ittɛ, bɛfɛɛn ɔkkpɛlɛ bya bilenɛ Lafɔɔ bile bya balɔɔt ba Lafɔɔ lakɔɔmnɛbɛ, nkwaaning batunu luteele ɔssɛbibit, bakɔɔm ɛkpansi ɔkkpɛlɛ baffu kɛkaal ka ɛfɛɛn Ɔlɔɔmɔlɔɔm. 20Ɔlɔɔt wa ule ɔtaa bbwak la Ɔlɔɔmɔlɔɔm ka ɔnaangnɛ bwa lafɔɔ lalɔɔknɛ ba ule. Bwa Lafɔɔ lanaangnɛ ule kwa lanaangnɛ ɔlɔɔt ɔsan ɔttɛ ɔnaangbong bubbi. 21Gedegede mung Ɔlɔɔmɔlɔɔm ɔyɔɔbongyɛlɛ ɛtɔk ya ile ikup itaa bbwak la ammɛ. Kɔlɔɔk a Lafɔɔ ka ɛtɔk ’yɔng baang ba kule. Lafɔɔ la Bappyee-kutolo Ɔlɔɔmɔlɔɔm ɔkkpɛlɛ bibee ittɛɛsɛ ɛtɔk ’yɔng baang. 22Ɔlɔɔmɔlɔɔm ɔnaang balɔɔt bataa bbwak la ammɛ ka bayilanɛ kwa Jesus Christ. Ɔlɔɔmɔlɔɔm ɔnaangbong ɔlɔɔt ɔkkpɛlɛ wa uyilanɛ kwa Christ, ɔtaa bbwak la ammɛ ka bubuubuu bulɔk businɛ lile kpong-kpong. 23Balɔɔt ɔkkpɛlɛ banaangbong bubbi; basɛlɛ ppyɛɛ Ɔlɔɔmɔlɔɔm. 24Ɔzzànga ka lɛsɔɔk a ppyɛɛ Ɔlɔɔmɔlɔɔm, bassɛbong ka labɔɔk a Christ Jesus wa ɔkkalanɛbɛ, bappyɛlɛ bataa bbwak la Ɔlɔɔmɔlɔɔm. 25Ɔlɔɔmɔlɔɔm unnyimɛ ammɛ ɔttɛ bawwɔɔl nkwaaning lubbe ammɛ lule ɛtɔk ya bubbi balɔɔt bùlé búlè la kɛsɔɔk, ulenɛ ka bayilanɛ kwa Jesus. Ɔlɔɔmɔlɔɔm ɔnaang ’kwɔng nkwaaning ɔyɔɔ budoddo ammɛ. Ka isimi, ubbebong luppyam ɔfɔngɔ balɔɔt banaang bubbi. 26Ɔzzànga gedegede mung ule ka ɔttɔngnɛ kɔlɔɔk a banaang-a-bubbi ɔssɛɛl usseke ɔyɔɔ bɔllɛ ammɛ ka ɛtɔk ’yɔng mung. Uwɔng ulenɛ tɛ̀ttɛ̀ Ɔlɔɔmɔlɔɔm ɔyɔɔnɛyɛlɛ ɔttɛ ammɛ ulenɛ ɔlɔɔt wa bbwak. Ɔgbaa ɔnaang nkwaaning isan ittɛ ɔnaang ɔlɔɔt ɔkkpɛlɛ wa uyilanɛ kwa Jesus ɔtaa bbwak la ammɛ. 27Ngkka mung kamma ile inaang itum ’bɔng? Bulɔk ba bule. Ifɛɛt a ’kwɔng ilenɛ ’bɔng? Mung ka itelenɛ Lafɔɔ ɔɔ? Maaye. Ule ka ile iyanga kiyila. 28Itele lɛttɔ ittɛ ɔlɔɔt ɔ̀táà bbwak la Ɔlɔɔmɔlɔɔm ka kɛyanga kiyila, ka ɔnaangnɛ kwa Lafɔɔ laggyannɛ lissi. 29Faa mung Ɔlɔɔmɔlɔɔm ule wa balɔɔt a Jews keem ɔɔ? Ammɛ lissi ulenɛ Ɔlɔɔmɔlɔɔm Ikanakana ɔɔ? Kwaabong, Ammɛ. 30Ɔlɔɔmɔlɔɔm ule vvɔn. Vvenɛ uloko balɔɔt a Jews bbwak la ammɛ ka kiyila abbɛ. Vvenɛ ɔssɛ uloko Ikanakana bbwak la ammɛ biini ka kiyila abbɛ. 31Mung ittina ittɛ ifimbong Lafɔɔ kwa kiyila ’sɔng ɔɔ? Maaye. Ning baang ba kule ffet a ffet. Lutini ’gwɔng iloko Lafɔɔ igbaa.

will be added

X\